NGOLONEYA woshitukulwa shaHangwena Usko Nghaamwa ke udite ombili eshi fiyo onena eembila dimwe dovakwaita va fila moita yekondjelomanguluko inadi filwa oshisho ile da dimbuwa filu filu.
Ngoloneya okwa talela po ombila yovakondjelimanguluko momukunda Onghwiyu moshikandjohoololo Oshikunde mEtivali loshivike sha dja ko ndee ta holola okuhaudambili kwaye molwaashi ombila inai filwa oshisho noya kala ya dimbuwa oule wefimbo lile.
Mombila yomOnghwiyu omwa pakwa ovakwaita voPLAN ve li 15 va filile molwoodi lomomafiku 2 Apilili 1989.
Momudingonoko omu na yo eembila dikwao mbali, keshe imwe mwa pakwa omukwaita umwe.
Nghaamwa okwa popya ta ti kashi li mondjila eshi OvaNamibia tava tyapula emanguluko omanga eembila daava va fila emanguluko loshilongo inadi filwa oshisho noda dimbuwa.
Okwa popya yo ta ti ope na OvaNamibia vamwe va kwafela ovakwaita voPLAN momafimbo madjuu ashike fiyo onena inava tulwa koshivalo onga oonakulwa vakulu, omanga ovanhu vamwe ovo a ti “ovashunimonima” naava inava longa sha nande nande pefimbo lekondjelomanguluko, tava tyapula omauwa shaashi va valulwa onga oonakuwa vakulu.
Okwa ti ovanhu vamwe ova valulwa onga oonakulwa vakulu medina looxe nooina, osho a ti kasha li mondjila. “Ngaashi naanaa omunhu iha ningi ondokotola molwaashi a dalwa kondokotola, osho naanaa omunhu ita ningi omukondjelimanguluko shaashi a dalwa komukondjelimanguluko,” osho Nghaamwa a popya meenghundafana noThe Namibian.
Okwa ti ovanhu ava va lwila oshilongo kava li tava lalakanene oipundi ile omauwa opaumwene. “Vamwe katwa li nokuli tu shii ngeenge ohatu fiki kemanguluko, ashike otwa li twa kotola nokutya, kutya nee inatu fika ko, Namibia oli nokumanguluka,” osho N.ghaamwa a popya.
Nghaamwa okwa ti okwa talela po ombila mOnghwiyu shaashi okwa hala okuuda omadilaadilo nomawedelepo oshiwana.
Ovakwashiwana ava va shakeneka Ngoloneya Nghaamwa ova indila epangelo li tule emanya kombila nonhele i filwe oshisho yo i valulwe onga imwe yomeenhele dopandjokonona.
Ombila oi li eekilometa 5 lwaapo okudja mondjila inene yopokati kEenhana nOkongo. Nghaamwa okwa indila ovakwashiwana va nenepeke ondjila opo i monike noupu vo ovatalelipo va dule okufika pombila nokuyandja efimaneko lavo.
Nghaamwa okwa ekelashi elipopilo lovanambelewa voshikondo shoonakulwa vakulu nokutya eshi eembila dimwe inadi tulwa omadiddiliko oshaashi di li momapya, vo oovene vomapya inava hala eembila momapya avo. “Ngeenge osho ngaho, omolwashike nee eembila dimwe dihe li momapya ndee nado inadi tulwa omadidiliko? Ngeenge osho tamu popi ngaho otamu handukilwa koshiwana paife,” osho Nghaamwa a popya ngaho.
Ngoloneya okwa li a endela pamwe nomupeduminista James Sankwasa, ndjai Peter Nambundunga naKomufala wopolifi Simeon Shindinge. Mosheendo omwa li yo vamwe po vomovakwaita vakulu voPLAN ava va kufile ombinga molwoodi lomOnghwiyu muApilili 1989. Ovo nee: Gideon Nauyoma Hamakali ‘Kashima’, Ben Pandeni ‘Shipashongwe’, Hamuteya Kashikola naValimo Kandjala.
Pandeni naKashikola ove li oilyo yoNDF.
Kandjala – oo paife e li omufitaongalo – okwa ti pefimbo lowoodi okwa li omunyasha womido 20. “Nande nda lwa omalwoodi mahapu moAngola, eli olo la li olwoodi lange lotete meni loshilongo,” osho Kandjala a ti.
Ombila yomOnghwiyu oya kala ya dimbulwa oule womido 28 fiyo osheshi Kashima – ou a li ta komanda ovakwaita voPLAN molwoodi linya – a tokola okutalela po onhele yolwoodi. Kashima okwa kala omunambelewa omukulunhu woNDF fiyo osheshi a pendejelwa oudwaali.
Kashima okwa lombwela The Namibian ta ti okwa uda nai neenghono adishe eshi a hanga ombila inai filwa oshisho.
Okwa popya ta ti pefimbo lolwoodi okwa li ta komanda ee-Detachment mbali doPLAN, da lekelwa moAngola nelombwelo va ye komukunda Omutwewomhedi va ka shakeneke etanga loUNTAG opo va homatukululwe ngaashi sha ufwa pakatokolifo 435, ashike eshi va fika peengaba momafiku 2 Apilili ova didilika omalinyengo o-Koevoet momukunda Onaimbungu.
Kashima okwa ti manga va li tava fuda po momukunda Okanghwiyona ova uda ondjebo ya topa konima yavo nova didilika nokutya, mboli, otava shikulwa.
“Onda ifana eekomanda dange notwa tokola tu lundulukile komukunda Onghwiyu shaashi omukunda Okanghwiyona itau wapalele olwoodi. Eshi twa fika mOnghwiyu otwa ya meendabo opo tu tale ngeenge o-Koevoet ofye tai shikula ile pamwe oya finda kumwe ku lili. Nongeenge hafye tai shikula, ohatu twikile nolweendo letu twa finda kOmutwewomhedi, ashike ngeenge ofye tai shikula, wa ponyo wa efele mwene,” osho Kashima a popya ngaho. Okwa ti o-Koevoet oya shinga ya yukilila moshinangela shoPLAN nolwoodi ola tukuluka. Ola li efimbo lokomatango.Konima yovili netata lwaapo Kashima okwa yandja elombwelo ovakwaita va dje meendabo, va finda koumbuwanhu-ushilo. Omakaspeli mahapu okwa dengwa eeshela nokwa yaka omundilo pefimbo lolwoodi, omanga o-PLAN ya kanifa ovakwaita 16 va fya, umwe okwa kwatwa nomwenyo na vakwao 15 va yahamekwa, mwa kwatelwa komanda Kashima.
Kashima okwa ti omukwaita omuti-17 okwa ka dipawa efiku la landula.
Okwa ti polwoodi okwa dja po ta ende kuye mwene, ashike efiku olo okwa nangala momufitu noponee efiku la landula okwa ya meumbo lomukwashiwana wedina Ndeiweda Nditya, omo a filwa oshisho oule womafiku a-4 nokonima okwa shuna koAngola.
Okwa pandula ekwafo a pewa komushamane Nditya novaneumbo laye nokumwene womukunda wOnghwiyu, Ndemwoongela Ndove. Aveshe vavali ova valulwa kepangelo onga oonakulwa vakulu.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
