Kosmas Nghisheenhapo NdinomholoOshitya okumwamwala oshi li sha ninga okatevo monena unene notashi longifwa kovanyasha. Okudja ashike komapandja opaungoba ngaashi o-Watsup, o-Twitter osho yo o-Facebook opiyepiye ashike yoshityadina okumwamwala.
Okudja mowambo nomoushimba keshe omunyasha oshitya eshi ngeenge owe shi mu pula ote ku lombwele kutya kuye okaimbilo kefiku keshe.
Nonande vahapu twa nongela oshitya eshi, vamwe onghene ngo ve li mekutu tave lipula kutya hano oshitya okumwamwala osha hala okutya ngahelipi nosha dja peni? Vamwe nokuli itave shi popile vati otashi pukifa. Ondi udite kutya ope na omaliudo a yooloka ngeenge tashi ya koshitya eshi sho osho sha fininika nge ndi ete eyelifo linini kombinga yoshitya eshi nonande halo unene kamanakandongo.
Ovanyasha vahapu otava ti oshitya okumwamwala opo she ya tashi ti emanguluko hano omunhu ha mwamwala ina fila eedi. Paudeko lange oshitya okumwamwala otashi ti okutondauka noshilongo kuhe na elalakano. Noitya imwe otashi ti ashike okuenda oipwaendo. Oshitya eshi okumwamwala hapo she ya ndele oshikulutya sha kala ko hashi longifwa kootatekulu nomeekulu.
Mounyuni wonale osha kala hashi popiwa tashi ulwa ovanhu ovo ve hole okweendaenda nounyuni tava mane ko oshilongo ve lininga oonekwelelo kambwa kashilongo kakombo lilifa kadi lialula. Kakele kwaava tava ende oipwaendo, ovakulunhu ohave shi longifa yo monghalo yefiku keshe.
Omukulunhu ota dulu a tye “Nda li kutya na tale melimba ndele ota mwamwauka ashike.” Omukulunhhu ota dulu yo okupula ounona voumati nge ne va di mominghenye davo omo kutya “Ta mu mwamwala tuu?” Kakele kovakulunhu ovafita voimuna navo ova kala yo noku shi longifa ngeenge oimuna itai nape nawa ta i lyatauka ngaho nekove ile nelundu ngaho otai mwamwala ponhele yokukala ya kanghama ta i li omwiidi.
Ovamati nafye otwa kala ngaho hatu mwamwala twa finda mominghenye omo katu na elalakano lasha. Mokumwamwala mominghenye ile mofitu ohatu dulu ngaho okuetelela mo oshivelelwa ngaashi oudila fye hatu li ngaho oukokotomwa vetu osho yo oushikepengeyo momatapa omo. Hano okumwamwala okuwa ko okwii she likolelela kwaashi to di mo nasho.
Monena ovanhu nge va tala ko oshitya eshi vahapu ove wete shii oshili osheshi ashike kutya memwamwalo omu na oinima ihapu ashike emwamwalo haalushe li na owii. Pexulilo ohandi denge ashike omufindo apa kutya oshitya eshi oko sha kala inashi etwa po kovanyasha nande nande vo inava puka oku shi longifa.
Oshitivali shaxuuninwa ondi udite kutya ovanhu nava mwamwale shama ashike emwamwalo itali ku kokele ongadjo nomafundju ovanhu otava dulu okuya nande okeenhele da yooloka nande okomafuta va hala ashike okukala ve udite omhepo ipe ngaha okumwamwala. Emwamwalo itatu li yi moshipala shima ashike u shi kutya momufitu omu na ongwe tai lyana.
Pexuliloelela ondi udite kutya oshitya okumwamwala inashi puka nande nande oshi li mefimbo sho osho u wete tashi longifwa unene. Ngeenge omunhu ta ti itu ka mwamwale ni ota ti ashike itu ka endeni oipweendo. Sho navali kashi shi shipe osheshi ashike sha kala inashi nongelwa kuvahapu paife oshi li mefimbo molwonghalo oyo tai ende nokulunduluka.
Hano ngeenge hatu pwilikine oshitya osho, natu tale ni ngaho omesho oundalapata pefatululo osho yo odiililo yasho. Okwaalangata kweyoka okwe li twala kokwena.
* Kosmas Nghishilenhapo Ndinomholo oku li omulihongihongi kOshiputudilohongo shopombada shaNamibia, UNAM mOvenduka. Okwe lipyakidila noihongwa yomalaka Oshiafrika osho yo Oshieuropa. Ota monika koemaila christiancosmos94105@gmail.com
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
