Nujoma a tanta aanyasha

OMUKULUNTUWILIKI gwoshikondo shomavi, omusamane Utoni Nujoma, omathimbo ngaka okwa gandja ethaneko kaaleli yakwawo yoSwapo, opo aawiliki aakulu yewawa yaanyasha mboka ya ninga ngashingeyi aahwahwameki yiikonga yokupula evi, ya gunwe nelalakano lyokukaleka po elandulathano mongundu tayi pangele.

Ndhika Nujoma okwe dhi popi pethimbo lyomutumba gwondumutima yoSwapo, ngoka gwa li gwa ningilwa megumbo lyomutumba gwopashigwana mOlyomakaya ga zi ko.

Uunambo, Nujoma okwa koleke konzonkundana ndjika kutya okwa gandja omathaneko opo iilyo yongunduhwahwameki yo-AR nosho wo yo-LPM – oshikonga shoonakwaana evi – yi katukilwe onkatu nokutakelwa omunwe.

“Onda ti omuleli gwoSwapo ita vulu okukala omuleli gwomahangano ngoka. Ongundu oyi na okukatuka onkatu, molwashoka itaa vulu okukala iilyo yongundu manga ye li iilyo yoongundu ndhoka tadhi yi thiminike,” Nujoma ta popi nomuthindo.

Omahangano gaali ngaka ga kwatelwa komeho kaanyasha oga kala taga pula ku gandjwe evi kondando tayi vulika kaakwashigwana miilando, nosho wo evi ndyoka lya yugilwe oshigwana kaakolonyeki li shunithwe kooyene yalyo.

Olutuhwahwameki lwo-AR olwo lwa kala talu pula evi lyomiilando, manga LPM a kala ta pula evi lyaathithi.

Iilyo yoongundu ndhika mbali oyi ipuma mumwe naawiliki aakuluntu yongundu, onkene oya talika ko inaa simaneka aakuluntu.

“Ngame onda hala mongundu mu kalekwe elandulathano,” Nujoma ta ti.

Yamwe yomaaleli yongundu oya li ya kumwa shoo Nujoma a ponokele AR, ndjoka tayi wilikwa kuJob Amupanda.

Opu na aanenentu yamwe moSwapo taa yambidhidha olutuhwahwameki lwo-AR, mwa kwatelwa Elijah Ngurare.

Shika hasho oshikando shotango Nujoma ta ponokele oongundu ndhika mbali, ihe shoo e shi thikitha mongundumitima gwongundu tayi pangele, otashi holola kutya okwa hala nokuhalelela Aaleli ya kuthe omatokolo ga kwata miiti noku wu toolitha mo aanyasha mboka ya li taye mu yambidhidha shoo a li ta kondjele oshipundi shuu-amushangandjayi wongundu konima yomimvo ntano ngashingeyi.

Pethimbo lyokongelesa yomo2012, Ngurare naAmupanda oyo ya li taye mu yambidha, ashike inaa shi enditha nawa.

Ngashingeyi Nujoma okwa fa a gama kombinga yomupresidente Hage Geingob, notu ulike a fa oye ta ka yambidhidha pethimbo lyokongelesa ndjoka kwa thanekwa tayi ka kala ko muNovemba nuumvo.

Shoo ta pula aaleli yo-LPM ye wu toolithwe mo, Nujoma okwa fa a tanta ngoka a li nale omupeha gwe moshikondo shomavi, omusamane Bernadus Swartbooi.

Nujoma naSwartbooi ihaa tsu ya thithe, nekwatathano lyawo olye ende tali lulu okuza petameko lyomumvo nguka.

Swartbooi okwa li a popi nontaneho yoshigwana kutya Nujoma endamudhinga nomunalwiho, te mu ula wo kutya ota vunyagula ekotampango lyoshilongo.

Ndhika Swartbooi okwe dhi popilile momutumba gwopashigwana muFebuluali.

Olutuhwahwameki lwokugalulila evi komaluvalo gaathithi (LPM), ndoka lwa kwatelwa komeho kuSwartbooi, olwa kala talu pula Nujoma a kuthwe miilonga okuza petameko lyomumvo.

Henny Seibeb gwo-LPM, okwa li a tseyithile onzonkundana uunambo kutya Nujoma ni ikuthe miilonga.

Momutumba gwongundumutima yoSwapo gwomOlyomakaya, Nujoma okwa li a holola a gama kombinga yomupresidente Geingob, sho a ti ngoka a hala okwiitha Geingob omupresidente gwoSwapo ota vulu oku mu ithana ngaaka, manga ngoka a hala oku mu ithana omupresidente ta kwathele naye a manguluka oku shi ninga.

Shika kasha li sha nyanyukilwa kuyakwawo, mboka yu uvite kutya ekotampango olya yeleka nawa oshinima shika, onkene kali na okulyatelwa pevi nelalakano lyokuuvitha nawa oohandimwe mboka ya hala omadhina.

Uunambo, Ngurare okwa li i ikaleke kokule niinyangadhalwa yo-AR, ta ti ngele Nujoma oyo ta popi itaa ihumba nawa noya pumbwa okugunwa, ye ina kwatelwa mo, molwashoka ke na sha no-AR.

“Ngame otandi yambidhidha aanyasha ya mone evi, nondi shi shi kutya Utoni naye ote shi yambidhidha,” Ngurare ta ti.

Nando ongaaka, Dimbulukeni Nauyoma, gumwe gwomaakokoli naaleli yo-AR, okwa yamukula uunambo kutya AR ita longo pondje yomilandu nomautho goSwapo.

“Paushili, elalakano lyetu olyokutula miilonga omilandu nooprograma dhoSwapo. Ngele okupotokonona omukundu gwevi oku li pondje yomilandu dhoSwapo, nena mboka itaa ku popile oyo ye na okugunwa. Omahangano oge lile po okushilipaleka kutya epangelo naamboka ye na oshinakugwanithwa shokuthikithila oshigwana omayakulo oye shi ninga,” Nauyoma ta ti.