Nujoma otati po xwepo

… Ovanamibia ova pandulwa eshi va kala nokumuhalela eveluko

Ombelewa yapelesidente oya pandula Ovanamibia eshi va kala nokuyambidida nokuudila omukokoli pelesidente Sam Nujoma oukwao wananghali.

Nujoma ote ya nawa moshipangelo shomoshilongo konima yomilandu donumba dounamiti.

Ondokotola yopaumwene yaNujoma Dr Tshali Iithete pamwe nomuyakuli waye omukulunhu Paul Shipale, momukanda oo kwa li va shangela oikundaneki Oshoondaxa ova shiivifa kutya Nujoma ota ti po xwepo.

Eshi osha landula eelopota moikundaneki kutya Nujoma (95) okwa li a tambulwa meembete moshipangelo shaLady Pohamba Private Hospital mOvenduka Etine loshivike sha dja ko.

“Oshili, omukokoli pelesidente oku li moshipangelo ngaashi omilandu daye doundjolowele ta di pula molwoweehame, tau etwa keedula daye odo da paula,” Shipale naIithete osho va shanga ngaho momukanda.

Ova ti Nujoma oku li metonatelo leendokotola di na owino nelitulemo, ovapangi ve na owino nosho yo ovanawino ovo tave mutonatele.

“Ote ya nawa notwa hafela okukala po xwepo kwa ye oko taku i komesho nawa.”

Omonamati waNujoma, Utoni Nujoma, okwa koleka kutya omukokoli pelesidente okwa li a kwatelwa meembete moshipangelo Etine loshivike sha dja ko.

“Kakwa li e udite nawa ashike paife oku li nawa,” Osho a ti ngaho Etitano.

Utoni ina yandja vali ouyelele wa wedwa po.

The Namibian okwa li a lopota kutya Nujoma kakwa li a ya koshitufi dimbuluko shomumwainakadona, Frieda Daniel, omwedi wa dja ko, eedjo dimwe okwa li da tya ina ya molwoukolele uhe li nawa.

Nujoma okwa li ashike a monika moshiwana lwaxuuninwa muFebuluali poshivilo dimbuluko nopepako lapesidente Geingob.

Iithete muMei okwa ti Nujoma okwa li e li moukolele uwa konima eshi kwa li a lekelwa moshipangelo konima yoshivike.