O-NDF ya nyana eidhopo lyaVenaani moshikumungu shaanafaalama

UUMINISTILI wEtanga lyEgameno owa ti omuleli gwo-Popular Democratic Movement (PDM) McHenry Venaani oye a hwahwameke aanafaalama mboka ya li taa litha iimuna yawo mofaalama yEtiro.

Ndhika odha li dha popiwa mOmaandaha komukuluntu ta kwathele gwEtanga lyEgameno ngoka wo e li omupeha mEtango lyOmewangandjo, Martin Pinehas, pethimbo lyoshigongi shiikundaneki kombinga yoshikumungu shelitho lyiimuna yaanafaalama shaa li paveta mofaalama yEtiro moshitopolwa shErongo.

Omolwoshikukuta aanafaalama oya li ya hingi oongombe dhawo taya kongo uulithilo ya landula omunkukulo gwondjila yeshina lyokolutenda pokati kaMaruru noKranzberg oomwedhi dha piti. Okwa hokololwa kutya aanafaalama oyendji oya li ya hingi oongombe dhawo sigo olwopofaaalama yEtiro mpoka ya li ya yungu oontanda nokulitha oongombe dhawo mooha dholugumbo.

Ofaalama yEtiro oyi li popepi nondoolopa yaKaribib moka mwa kala iilyo yEtanga lyEgameno lyomewanganondjo mo omo hamu ningilwa natango omaidheulo.

Otaku hokololwa kutya aanafaalama oya li ya lombwelwa kakwiita ya hedhithe oongombe dhawo noontanda dhawo uule woometa omi-50 kokule nolugumbo lwofaalama-kombinga onkwawo yondjila yeshina lyokolutenda.

Pinehas okwa li a yelitha mOmaandaha kutya aanafaalama oya li ya tameke okugwayela mofaalama yEtiro okuza muMaalitsa gwonuumvo.

“Omolwonkalo yoshikukuta, okwa li twa sile aanafaalama ohenda mboka ya li ya gwayitha oongombe dhawo opo dhi nape mo mofaalama, Ashike sho oongombe dha tameke tadhi indjipala okwa li twa ningi etokolo opo ondhalate tu yi pangele nokuyuukililitha opo tu keelele omwaalu gwiimuna mbyoka ya adhika tayi indjipala mofaalama,” Pinehas a ti ngaaka.

Okwa gwedha po ta ti manga ya li yi ipyakidhila nokumanga nokuukililitha ondhalate, aanafaalama oyendji mboka ya adhika ya thiki e taa yungu oontanda pooha dholugumbo lwofaalama oya li ya tameke okuhingila mo oongombe dhawo uusiku. Okwa ti iimuna oya li nokuli ya konda pe-1000 mbyoka ya za miigunda ya konda po-30.

Pinehas okwa ti oya li ya tameke okuhinga mo oongombe noku ya lombwela [aanafaalama] ya hulithe po okugwayitha oongombe dhi ye molugumbo lwofaalama, ashike oya kala ashike ya yunga oontanda dhawo mooha dholugumbo.

Aanafaalama oya kala taa tete ondhalate uusiku e taa hingile mo oongombe dhawo, onkene ongula yesiku kehe aakwiita oye na okupenduka taya hingi mo oongombe molugumbo lwofaalama e taa manga ondhalate ndjoka ya tetwa.

“Okwa li twa vulwa okatoma haka, ashike etalelepo lyaVenaani kofaalama olya li lya hwahwameke onkalo oshoka esiku olyo tuu ndyoka a li ko ondhalate yolugumbo oya li ya tetwa natango kaanafaalama uusiku” .

Omaihumbato nomatilitho ngoka Venaani a li ta ningile aakwiita mboka ya li ashike taya longo iilonga yawo shi ikwatelela kaatonateli yawo inaga pumbiwa nande go itaga vulu okwiidhidhimikilwa nande okomuntu ngoka e hole ombili,” osho a ti ngaaka.

Pinehas okwa ti ofaalama ndjoka oya nuninwa ashike iinyangadhalwa yEtanga lyegameno ndele hamaulithilo giimuna.:

“Itatu idhidhimikile iikwapolitika yi ye iilonga yetu moshipala. Ngaashi omahogololo ge li popepi, otatu nkukilile opo aanapolitika yaa longithe edhina lyetu nenge kaa ye tu kwatakanithe niikwapolitika omolwomahogololo,” osho a ti ngaaka.

Pinehas okwa li natango e ekelehi omapopyo kutya opu na aanafaalama yamwe mboka ya li ya dhengagulwa kaakwiita.

“Inatu lopotelwa nande omuntu a dhengwa nenge a monithwa oshiponga. Otwa li twa ningi ekwatathano niipangelo osho wo uupangelo uushona konima yomapopyo gaanafaalama ya dhengwa kaakwiita ihe otwaadha ko owala. Ano oya pangwa peni?,” osho a pula ngaaka.

Venaani okwa li e ekelehi omapopyo gokutya okwa li a ka hwahwameka aanafaalama ya longe uukolokoshi, ta ti okwa yile ko ashike a ka tale onkalo yoshikukuta nosho wo oku ya kwathela ya mone eyamukulo ewanawa komakemo gawo.

Sho a thiki pofaalama okwa adha ondhalate yolugumbo lwofaaalama lwa tetwa, shoka sha li sha pitike oongombe dhi ka nape mofaalama.

Venaani okwa ti ye ina nyenyeta nande onomuntu pethimbo a li a ningi oshigongi niilyo yEtanga lyEgameno, aapolisi osho wo aakwashigwana, oshoka okwa li owala tandi kongo eyamukulo kombinga yaanafaalma mboka ya dhengwa koshikukuta.

“Kapwa li nande omunafaalama ngoka a li a longitha elaka lya honga, ando nangame inandi shi popila,” Venaani ta ti ngaaka.

Venaani kwa ti uuvidio osho wo omathano ngoka tagu ulike uumbangi kutya aanafaalama oya li ya dhengwa opo ge li noya li nokuli ye ya tulile mo oshipotha poshitaasi shopolisi pOmaruru.

“Otandi pula opo Uuministili wEtanga lyEgameno wu tulile ndje mo oshipotha ngele otawu ti kutya ongame nda hwahwameke aanafaalama mboka,” omuleli gwo-PDM ta ti ngaaka.

Venaani okwa li a ningi oshigongi shiikundaneki oshiwike sha zi ko moka a li a tseyitha kutya aanafaalama momudhingoloko gwaMaruru oye na oongombe dha konda po-1 400 ndhoka tadhi napa owala mooha dhofaalama oshoka momudhingoloko kamu na we uulithilo. Okwa li a ti enota lyiimuna nalyo limwe wo lyomomaudhigu ngoka ga taalela aanafaalama mboka.

Venaani okwa li a pula opo epangelo li egulule oofaalama dhEtanga lyEgameno opo oongombe dhi wape oku ka napa mo omwiidhi ngoka gu li mo.