Oikolwifa oyo omukundu munene noshiponga shinene koshiwana shaNamibia

Oifo yeenghundana unene: The Namibian, Apilili 19, 2012 kepandja 1-2, noshaApilili 30, 2012, kepandja 6, noshaJuni 14, 2012 kepandja 1-2, otai ulike nghee oshiwana shaNamibia tashi ningi ile shi li nokuli oshinwi noshimbuvi shoikolwifa, hano shi li oshipika shokunwa oikolwifa, tashi kolwa nai-nai shi fif’ ohoni. Okwa hololwa yo kutya oku na ovakainhu vahapu novalumenhu vahapu tave liyandje koluhondelo omolwoikolwifa.

Oshili ihe fi okupatakanifwa oyoyo kutya omikifi dohoni dihapu hadi tandavelifwa koluhondelo, ngaashi okandongo, oshinena, nongaashi omukifi omudipai, HIV noAIDS ohadi tulwa moilonga unene ngenge omunhu a kolwa eshi ita dulu vali okudiladila nokulipopila komaluhondelo ile kosex ya puka. Pa-UNAIDS muNamibia modula 2009 omwa li mu na ovanhu (ovakulunhu nounona kumwe) ve nombuto yoHIV ve fike 180,000. Paife osha dulika ve dulifepo opo kokule. Eshi osho omuvalu wovanhu muhapu, wa wana oku tu tilifa noku tu kukumifa shili ngenge otu na onghenda nohole noshisho shoshiwana shetu shaNamibia. Omapekapeko amwe oo a ningwa molukanda laKabila mOvenduka, otaa holola kutya, eepresenta 38 dovalumenhu neepresenta 25 dovakainhu ova landafana omilele doluhondelo noikolwifa. Okwa toolwa yo omauyelele kutya, eepresenta 56 dovaKabila ova li va kolwa eshi va ya momilele doluhondelo doule woufiku umwe. Omauyelele makwao otaa ti kutya, eepresenta 51 ova li va kolwa eshi va ya momilele doluhondelo dokamyau/hangelela. Neepresenta 50 oda li da kolwa eshi da ya momilele doluhondelo neembwada doipala (prostitute).Moshikondekifombine sheekilometa nhe (four square kilometres), omu na eebaa, eenhele dokulandifa oikolwifa di li 265. Osho otashi ti kutya konyala eumbo keshe ohali landifa oikolwifa. Sho osho ngo shi li konyala muKatutura aishe. Omuvalu munene wovakalimo vomolukanda laKabila owovanyasha ava va dopa meefikola nokave na oilonga. Paife ove li ovakwanaluhepo. Kave shii vali kutya onghalamwenyo yavo otave i longifa ngahelipi. Kuvo onghalamwenyo nonakuyiwa oya twima. Onghee ova pilukila moikolwifa nomoumbwada woipala. Ashishe osho otashi tu ulikile kutya, oshiwana shaNamibia kashi li vali nawa, otashi vele. Oshilongo osha nyatekwa nosha kakekwa noulunde nonoikolwifa. Otwa pumbwa okulidilulula nokwaalukila kOmushiti wetu Kalunga ou ta dulu oku tu panga noku tu velula. Vali onde lineekela kutya, eliko loshilongo shetu ngeno okwa li tali longifwa moshili nokutukulwa nawa mouyuki, noilonga tai tulwapo kumwe nelelowiliko la pama, ndee novanyasha aveshe otava fifidilwa nawa okudja kounona wavo nokupewa ehongo nelongodeulo noukeka, ngeno oluhepo moshilongo noinima yokulilandifapo koikolwifa moluhondelo nokukala moumbwada ngeno shiimba oya xupipala nga. Onghee okuhenoilonga noluhepo noikolwifa ndee noumbwada woluhondelo otai kala eshongo linene koshiwana nokepangelo laNamibia. Ashike onda hala okulondwela apa kutya, inatu limbilipaleka fye tu liefele moulunde wokulandifapo omalutu etu shaashi katu na oilonga. Ahowe! Osho osho eudeko la puka naii-naii! Omunhu nomushitwa waKalunga owa ifanwa u tonde ashishe shoulunde nosha nyata koshipala shOmwene Kalunga. Mepangulo laxuninwa kamu na onghenda omolwouhepele ile omolwoupuna. Eitavelo pamwe netilokalunga otai tu ifana tu tonde notu kukume owii keshe, tu li moundjuu ile tu li nawa; mondjala ile mekuta; moluhepo ile moupuna. Oikolwifa otai etele oshiwana omikifi dihapu nomaudjuu: omukifi wepunga, wexuli, oungone wohonde, epiyaano mouluvi, eenamanana momaumbo, omadipaafano nomashingo oihauto nai. Omakwato eenghonga taa ningilwa ovakainhu nehepeko lounona vanini mwa kwatelwa ouhanana noku va nyonauna paukolokoshi woulai, aishe ei ohatu udu tai hokololwa kutya, ihapu otai ningwa omolwoikolwifa. Meedolongo omu na eenghwatwa dihapu da longa oixuna i nyanyalifa, dimwe da kufa ovanhu vakwao eemwenyo. Vamwe manga inava longa oilonga yavo iiii ile yokulidipaa ile yokudipaa, ohava ka nwa tete oikolwifa nopo nee tava longo oilonga yavo youkolokoshi. Nosho have lipopile nasho ngenge tava pangulwa kutya ove shi ninga shaashi vati ova li va kolwa. U uditeko tuu! Oikolwifa oyo oshiponga!Oshiwana shaNamibia unene tuu vahapu vomovalaule, ove li ninga unene ovahanauni voshiwana noku shi tula moupika woikolwifa mokulandifa oikolwifa meenhele dihapu. Oshiwana sha pikwa koikolwifa, nosha ninga oshilai omolwoikolwifa, kashi na onakuiwa yokomesho i na elao. Otashi xulupo diva. Olyelye ta ka dula yo okulela oshiwana oshikolwe noshipikwa koikolwifa mbela? Nolyelye ta ka dula omayele eengholwe? Onghenda unene koshiwana shange oshiholike eshi pu na ongudu inene tai popile oikolwifa, omuhanauni woshiwana shetu nomutondi wonakwiwa yasho. Onghee ame kombinga yange ohandi yambidida ashike eenghendabala odo tadi ningwa momhepo iwa noyombili okuxupifa oshiwana koshiponga shoikolwifa. Commissioner Festus Shilongo (Khomas Regional Commander) okwa wana okuyambididwa ngenge ye novapolifi vaye otava longo nomufango wokuxupifa oshiwana ashishe shaNamibia koshiponga shoikolwifa. Ndele ngenge otava kelele ashike ovanhu okulandifa oikolwifa shaashi kave na eelaisensa (omaitavelelo) dokulandifa, nena ame kandi li navo noihai dulu oku va yambidida. Osheshi enyono laavo tava landifa oikolwifa vehe na eelaisensa kali dule laavo tava landifa oikolwifa ve na eitavelelo lokulandifa. Oshiponga nomukundu koshiwana ou li moikolwifa tai pewa oshiwana mokudunga nokulandifa noilanduli yayo. Hano kau li mokuhena eelaisensa. Ovalandifi voikolwifa, ve na ile kave na eelaisensa dokulandifa oikolwifa, kwame oshi fike pamwe. Enyono lavo aveshe olo olii, nolo okuhanaunapo ovanhu vOmwene Kalunga, e va shita moshifeka shaye. Ndele ngenge otaku kelelwa ashike ava vehe na eelaisensa vaha landife, nena ovakeleli ova fa omunhu ta dimi omundilo nokwekela omeva komalaka omundilo, ponhele yokuumbila omeva mediko loovene nomomakala nokukufamo omakuni manene oo taa twimana natango omwifi a dimwe filufilu opo omundilo uhe litumbepo vali. Onda hala okutya, mokushakena navamwe vomovakali momalukanda aKatutura, onda lombwelwa kutya, eendingosho (sheebeens) neebaa dokulandifa oikolwifa moshilongo shaNamibia, dimwe odaavo hava longele epangelo, tashi dulika ve di na nande inadi shangwa (registwa) momadina avo. Osho osha hala kutya, vamwe vomovalongeli vepangelo, novamwe vomovanailonga veekampani dopaumwene ovo vamwe vomwaavo tava teya po oshiwana shaNamibia noikolwifa! Hano ovapolifi ove na okukotoka vaha monike tava popile eendingosho neebaa domunanghono mokukelela elandifo loikolwifa kwaavo vehe na eelaisensa. Ngenge nani otava popile omunanghono, nena kapu na epopilo loshiwana koshiponga shoikolwifa; omunanghono noshipuna ota efiwa ngaha a nyonepo oshiwana nokulandifa kwaye oikolwifa? Kapu na ouyuuki opo! Ovapolifi navo nave litale ngo nawa, ngenge kave li mongudu yaavo hava longifa oikolwifa.Vali, ngenge ohatu tale omweeti woshiponga shoikolwifa koshiwana, nena otu na yo okukwatelamo eekampani odo da kula doikolwifa neefaktoli odo hadi dungu oikolwifa naavo nee hava teleke owalende, momaumbo naavo hava dungu otombo. Ovadungi voikolwifa neestola domakende nomaloli manene a tya omamukende mahapuhapu oikolwifa a yukifa koikandjo noitopolwa unene oyo i na ovalaule (communal areas), aishe ei oyo oshiponga nehanauno kovalaule! Oshiwana shaNamibia osha kala efimbo lile sha wililwa po koshiponga shoikolwifa, omolwohole ii yokuliholamwene (selfishness) nomolwohole yoshimaliwa ii. Omunhu keshe mounyuni owa tulwa mo meshito kOmushiti woye Kalunga opo u mu kalele, u mu longele mouyuki, moshili nomouyapuki, nokudulika kuye noku mu pa alushe efimano. Oshinakuwanifa shimwe oshosho, Omwene Kalunga ote tu pula: Omumwanyoko oku li peni? – Gen.4:9. Enyamukulo letu lokunyamukula Omwene Kalunga otali kala la tya ngahelipi mbela? Shiimba ohatu nyamukula meyukililo: Omumwameme onde mu nyonaunapo neendunge dange dii dokulihola ame mwene; onde mu pa oudiyo woikolwifa. Onghee ke li vali monghalo nomoukwatya oo ngashi wa hala a kale.