Oikulya younona vofikola itai ya pefimbo

Ounona ve dulife po15 400 mOvenduka ova kala nondjala konima eshi oikulya yokeefikola ya kala nokukatekwa okudja muJanuali.

Ovahongifikola ova ti onghalo ei oya kala idjuu shaashi ounona vamwe ova kala nokulidenga po meengulu dofikola molwondjala.

Oministili yehongo, omaunghulungu nomifyuululwakalo oya ti oikulya otai ka twalwa keefikola omwedi ou.

Omupedu kulunhuwiliki wehongo moshitopolwahoololo shaKhomas Lewin Paulus okwa lombwela oThe Namibian Etitatu loshivike sha dja ko kutya ekateko eli ola etwa kwaao ha lande oikulya ei.

“Oministili oi shi shi kombinga yekateko loikulya younona, ashike nee, otwa ninga omalongekido opo omunhu oo e na oshinakuwanifa eshi a tameke okutwala oikulya okudja mOmaandaxa okuya komesho. Okwa li pu na omatomeno onumba kombelewa yakula naao a kwata otendela ei nonghee nee kakwa li tava dulu okuninga oshinima eshi pefimbo molwomatomeno onumba,” Osho a ti ngaho.

Eedjo odo da popya noThe Namibian oda ti, ngee pu na ekateko loikulya oikulya ohai kala ya nyanauka ile i li pokunyanauka, osho hashi eta opo iha dule okulongifwa.

Ashike nee, Paulus okwa ti omanga oshinima eshi kwa li sha ningwa nale monakudiwa, paife osha wapalekwa.

“Monakudiwa, eeno, okwa li pu na omapopyo oikulya ya nyanauka, ashike kashi shi paife. Oinima paife oi li peenhele opo kukwashilipalekwe kutya oinima ya tya ngaho inai holoka vali,” Osho a ti ngaho.

Opolohala yoikulya yokeefikola ohai vatele eefikola dopedu di dulife po400 000 fiyo onena.

Okupitila mopolohalama ei, ohaku yandjwa oikulya ongula kounona ovo veendodo dopetameko oshilongo ashishe.

Ovahongifikola vamwe ova nyenyeta kombinga younona tava ombokelwa pefimbo leetundi.

“Onghalo kaiwa nandenande,” Omuhongifikola koMoses //Garoeb Primary School osho a ti ngaho.

Okwa weda po: “Ngee ounona ve udite ondjala, itave litula mo nohava ombokelwa, novamwe ova kala nokulidenga po nokuli pefimbo leetundi shaashi kapu na oikulya.”

Omuhongifikola okwa ti, ounona vahapu ohava di komaumbo oko kuhe na oikulya.

“…nove lineekela ashike mopolohalama yoikulya. Paife ekateko otali va monifa oixuna aveshe kondjala,” Osho a ti ngaho.

Eefikola dimwe odo da kumwa nai koshinima eshi ongaashi Olof Palme Primary School, Moses //­Garoeb Primary School, Monte Christo Primary School, People’s Primary School, Havana Primary School, Namutuni Primary School, Otjomuise Primary School, Hillside Primary School, Namibia Primary School, Augeikhas Primary School noFidel Castro Ruz Primary School.

HAFYE KWA LI

Ehangano ledina Shimwe Trading Enterprises nehangano Alason Trading oku na oshinakuwanifa shokulanda oikulya ei yeefikola.

Mwene wehangano loShimwe Trading Shimwe Bernard, oo e na oshinakuwanifa shokulanda oinima aishe oyo ya pumbwa okuya moikulya omu ngee tai telekwa, okwa lombwela oThe Namibian kutya ina hafela nande ekateko loministili mokulanda oinima konima eshi a yandja oipumbiwa pefimbo.

“Okwa li nda yandja oipumbiwa yange pefimbo. Oministili inai landa oinima pefimbo. Kakwa li nande ya katekwa. Oyo oipupulu,” Osho a ti ngaho.

Mwene wehangano loAlason Trading John Bandlow, oo e na oshinakuwanifa shokushanga nokupakela, naye okwa yandja ombedi koministili.

“Ekateko ola dja koministili. Kakwa li nande epuko letu. Ovo vene va mbeshitela ashike muMei, ndee opaife ashike ya londekwa. Inava mana natango, natango oinima aishe oi li kondunda yomatuvikilo yetu,” Osho a ti ngaho.
OTWA SHUNA MONIMA

Omushangwa oo wa dja koministili yehongo, kwa li wa ningwa momudo 2012, okwa li wa ulika nghee opolohalama yoikulya i na omauwa nokuvatela omanga kwa li natango ya kuma koupyakadi wokutula moilonga opoholama.

Olopota okwa li ya ya fiyo opondodo opo tai ndjadjukununa omilandu odo oministili novakufimbinga vakwao tava dulu opo kva xwepopaleka etulomoilonga lopolohalama.

“Oministili oi na oshinakuwanifa sha fimana opo i mone kutya opolohalama yoikulya yokeefikola otai ende nawa,” Olopota osho ya ti ngaho.

“Ohatu ifana ookaume ketu moilonga novakufimbinga opo va longelekumwe noministili yehongo opo va kandule po oinima ei tai imbi opolohalama opo i ye komesho nawa,” Osho ya ti ngaho.

Okupitila mopolohalama oministi otai lalakanene okukufa po ouhefikepamwe nokwaandjakaneka eemhito dehongo kounona ovo tava mono oixuna, unene ngaa, eefiye nounona vakwao ovo ve li monghalo iheshi iwa.

Oshivike sha dja ko, oThe Namibian okwa li ya lopota kutya olopota yonghalo yondjala oya tengeneka kutya Ovanamibia ve fike lwopo 85 000 okwa teelelika va ka kale mondodo onhine yondjala.

Ondodo onhine yomeendodo nhano oya hala okutya ovanhu ova taalela onghalo ya naipala yomumbwe yoikulya, oudu womanyutu nomikifi oda teelelika di ka hapupale. Osha hala vali kutya ondodo yomafyo ondjala oya teelelika i ye pombada.