Opolisi otayi indile ekwatho moshigwana shi kwathele molukongo lwookalyamupombo yatano mboka ya yugu aaniilonga yokabetinga taka adhika popepi nongalashe yomahooli yaKatana, mOmaandaha.
Aafekelwa mboka otaku hokololwa ya yi mokabetinga, nokuningila aaniilonga omatilitho nombele noya yugu ko oshimaliwa koomuma shooN$36 800.
Oshiningwanima shoka okwa lopotwa sha ningwa lwopotundi 09h28, pauyelele wa gandjwa komupopiliko gwopolisi yaShana, Thomas Aiyambo.
“Aafekelwa otaku hokololwa ya longitha otuukala yoHonda Fit kaayina onomola noya fadhukapo yu uka nopate yaShikuku-Oshakati-Omungwelume,” osho a popi ngaaka.
Onkene opolisi otayi indlke moshigwana ngoka e na uuyelele tawu vulu okukwathela mokutulitha aafekelwa mboka miipandeko ya kwatathane nopolisi yi li popepi.
Oshigwana osha londodhwa opo kaashi ninge onkambadhala yokuhedha popepi naalumentu mboka.
Ngoka e na uuyelele ota indilwa a dhenge koonomola tadhi landula 081 140 3815, 081 363 0666, 0812749944 nenge ko-081 341 0001.
Aanangeshefa otaya indilwa wo opo ya kala ya dhiginina omulandu gwokumbaanga iimaliwa yawo nokuyanda okukaleka iimaliwa oyindji momatungo gawo gomangeshefelo.
