Okabinete otaka kondjifa okwaalula omukulunhuwiliki mukulu waMeatco

Okabinete vati otaka kondjifa okwaalula omukulunhuwiliki muku waMeatco Mwilima Mushokobanji, oo ta lundilwa kutya okwa dopa okwaamena ehangano lonyama lepangelo liha mbangolote.

Mushokobanjig okwaaluka kwaye otashi dulika ku ulike etokolo lakula laNetumbo Nandi-Ndaitwah lOkabinete lokuhatala koupyakadi wepangelo tali hepekele ashike oimaliwa mehangano eli.

Ehango lonyama laNamibia oli li lotete tali kondjifwa papolitika mepangelo lipe, pu na nokuli oungudu va yooloka vaavo tava popile epangelo li twikile nokukulila mo ehangano eli naavo ve li ominge nokutwikila kwepangelo kwokukulila mo ehangano eli – ngaashi minista mukulu weliko nomahangano epangelo Iipumbu Shiimi.

Minista mukulu vati okwa li a mona eyambidido lopaveta kutya euliko lomukulunhuwiliki waMeatco oshinakuwanifa shewilikongudu ndee kashi fi shOkabinete.

Nandi-Ndaitwah vati ota popile Mushokobanji aaluke, ta xwaxwamekwa kuSophia Shaningwa woSwapo nakaume kaye, omunangeshefa Joseph Andreas, oo a kala ta fininike omukulunhuwiliki mukulu waMeatco a shune moilonga.

Andreas okushiivike nawa molwohokwe yaye moshikondo shokulandifa onyama.

Oikumungu yaMeatco oya kitakana.

The Namibian okwa uda kutya oshikando shimwe odula ya dja ko, Shaningwa vati okwa li alundila Shiimi kutya ina landula elombwelo lOkabinete, ta londoda kutya oshikumungu shaMushokobanji otashi dulu okweetela Swapo a kanife omawi koshitopolwahoololo shaZambezi.

Eedjo oda ti kutya Nandi-Ndaitwah okwa kufa Shiimi mOkabinete shaashi aanya okuyandja okondalaka imwe kuMushokobanji eshi oshikako shaye kwa li sha xula muJanuali odula ei, shimwe shomomatomeno akwao.

Ondunge yokuyandja oshikako shimwe sheedula nanho kuMushokobanji oya kala nokupatanekwa okudja odula ya dja ko.

MuAuguste, okabinete okwa li ka yandja elombwelo kuminista weliko opo a yandje okondalaka imwe ipe kuMushokobanji, ashike Shiimi nonguduwiliki ovaanya okutula etokolo eli moilonga.

Onguduwiliki yaMeatco, oyo hai lopota kuShiimi, nayo vati oya topauka. Oilyo imwe otai popile etokolo laShiimi, omanga imwe tai popile Andreas.

Eedjo di li popepi noshikumungu oda ti omunashipundi waMeatco Sakaria Nghikembua noilyo yewilikongudu ihapu oya lombwela Shiimi kutya nai pewe omhito opo i konge ovanhu vamwe ovo tava dulu okukala va wapalela oilonga oyo, ponhele yokufininikwa yaalule Mushokobanji.

Eedjo edi natango oda ti Nghikembua okwa ninga omatilifo okuxulifa po oilonga opo aamene ondjokonona yaye ongomukulunhuwiliki wehangano iha nyanauke pakumonika ko a fa a pitika ewiliko lapuka laMeatco li twikile, ile a monike ko a fa te lidopo moinima.

Nghikembua okwa lombwela oThe Namibian Etitatu kutya ewilikongudu itali dulu okutya sha kokwaaluka kwaMushokobanji, shaashi ola teelela “eenghundafana naminista a pewa oshinakuwanifa shoshikumungu eshi kOkabinete, diva ngaashi tashi dulika”.

Etitatu Mushokobanji okwa ti oku li moshoongalele noita dulu okutya sha.

Mushokobanji okwa kala e li meenghundana domaupyakadi oshimaliwa aMeatco, mwa kwatelwa neemiliyona di li N$206 da kana neemiliyona di li N$200 dokukulila mo ehangano da dja kepangelo.

Meatco okwa kala itai komesho shaashi okwa kala nokudopa okufuta ovanafaalama pefimbo, osho sha eta ekanifo loilonga nomaupyakadi oshimaliwa.

Nande nee opu na oinima ei, ongudu yeeminista novanambelewa vakula vepangelo otava monika va fa ve na ohokwe ya mana mo yoku mu alulila mehangano.

The Namibian okwa lombwelwa kutya minista mukulu woipambele yomeumbo Albert Kawana naye okwa kwatela komesho oshikonga sheuliko laMushokobanji shovanhu ashike vamwe, nahamushanga wOkabinete George Simataa vati ota kondjifa kutya oshikumungu eshi natango oshi li momake Okabinete.

Kawana kakwa li nande a kufa po ongodi yaye Etitatu omanga Simataa a ti ekotamhango inali mu pa nande eenghono a tye ko sha komatokolo Okabinete.

“Kandi shi nande omupopiliko wepangelo.

Popya naminista womauyelele,” Simataa osho a ti ngaho.

The Brief odula ya dja ko okwa li a lopota kutya Meatco okwa dopa okufuta ovanafaalama vopangeshefa ve li 245 oshimaliwa shi fike peemiliyona N$320 sheengobe odo kwa li da etwa moutomeno vaye molwoupyakadi woshimaliwa wakula.

Eshi okwa li sha dja momakonakono ehangano oo kwa li a ningwa kehangano ledina Ombu Capital.

Okwa li kwa lopotwa kutya pefimbo opo Meatco kwa li ashike ta tomo oinamwenyo i li 2 250 keshe omwedi, omwaalu ushona neenghono komwaalu u fike po5000 no6000 oo ehangano la pumbwa.