Okanona ka hulithile mendiki lyetonatelo lyaanona

Omukiintu gwomoGrootfontein onkene ta nyengwa okutaamba ko eso lyomwanamati ngoka a mana oondjenda inaashi yela, pethimbo a li mehala lyetonatelo lyaanona.

Namupa Nambandi onkene ta lili omwana gwoomwedhi ne ngoka a manene oondjenda mendiki lyetonatelo lyaanona, muApilili.

Pauyelele wonzapo yeso, Norris Admire Ipinge okwa hulitha kuupyakadhi womepunda momasiku 4 Apilili.

Omupopiliko gwopolisi yaTjozondjupa, Maureen Mbeha, okwa koleke oshiningwanima shoka.

“Kamtyona ngoka otaku hokololwa a falwa kehala lyetonatelo lyaanona. lwopotundi 06h40 ngaashi hashi ningwa shito. Lwopotundi 08h30, omutonateli [ngoka wo oye omulongi] gwaanona okwa fala okanona hoka ka ka kothe mondunda, nolwopotundi 10h30 omulongi okwa ka tala okanona hoka molwashoka olya li ethimbo lyokulya, notaku hokololwa kutya okwa adha okanona itaa ka inyenge we,” osho Mbeha a popi ngaaka.

Okwa popi kutya epeko lyoshipotha shoka olya patululwa mopolisi yaGrootfontein nomakonakono otaga pula komeho.
Nambandi okwa hokolola kutya omwana okwa li a valwa ke ena nande uupyakadhi wa sha, nokwa kala e li muundjolowele sigo opethimbo a mana oondjenda.

Sho a nyengwa okumona omuntu ngoka ta kala nokutonatela omwana, Nambandi okwa popi kutya okwa tokola okufala omwana kendiki hoka haku falwa aanona ya tonatelwe momukokomoko gwesiku.

Omasiku ga zi ko Nambandi okwa tula ehokololo lye komalungula okuyelitha nkene omwana a mana oondjenda.

“Esiku ndyoka olya li Etitatu lwopotundi 14h41 sho nda yakula ongodhi okuza komukuluntusikola gwehala lyokutonatela aanona, ta pula ngele okanona oka li ngaa nawa sho nde ka pitike po pethimbo lyongula lwopotundi 06h40. Onde mu yamukula kutya okwa li e li nawa lela,” osho a popi ngaaka.

Okuza mpoka anuwa okwa lombwelwa kutya omwana ita fudha we.

Opamwe naaniilonga pamwe yaali, Nambandi oya yi kendiki ndyoka lyokutonatela aanona noya adha shili Norris a mana oondjenda.

Okwa lombwelwa anuwa kutya okanona okwa li owala ka langekwa ka kothe ashike inaka penduka we nomwenyo.

“Ongayina yokanona, onda kutha po mumwandje nokwa li ando ndi na etegameno kutya pamwe oti inyenge ngaa nonande onkene kwa li ndi wete kutya oshipa shokanona osha pemba notashi ulike kutya okwa hulitha,” osho a popi ngaaka.
Sho twa thiki poshipangelo onda lombwelwa kutya okanona oka mana oondjenda.

Nambandi okwa popi kutya ndohotola okwa li e mu lombwele kutya ke na shoka ta vulu okuninga po.

“Onda gandja oshizemo shomakonakono getando lyomudhimba komukonakoni gwomupolisi ngoka kwa li ta longo noshipotha molwashoka okwa li ndi wete oshizemo shoka kaashi na uushili. Ashike nano ongaaka, opolisi oya lombwele ndje kutya kaye na shoka taya vulu okuninga po, noshizemo shoka osho sha hugunina,” osho a popi ngaaka.

Nambandi okwa popi kutya aakelelipo yendiki ndyoka lyokutonatela aanona okwa li ya holoka pefumviko noya gandja oshimaliwa shooN$2 000.

Nambandi okwa popi kutya shoka tashi uvitha nayi ooshoka kutya omukuluntusikola oye a li ta hokolola shoka she ende po opo okanona ka adhike ka hulitha peha shi hokololwe komutonateli ngoka oye ha kala naanona.

“Onkene tandi lili omumwandje nokandishi kutya oshike she etitha eso lye, nendiki lyokutonatela aanona onkene tali pula niilonga yesiku kehe pwa fa inaapu ningwa sha,” osho a popi ngaaka.

Omukuluntusikola, ngoka a tindi okugandja edhina lye, okwa popi kutya Norris olundji oha kotha lwopotundi 08h30.

“Potundi 10h00 onda lombwele omulongi ngoka oye omutonateli gwaanona, a pendule okanona molwashoka okwa li ethimbo lyokulya, ashike okwa galukile ndje tati okanona ita ka penduka,” osho omulongisikola a popi ngaaka. Okwa popi kutya Nambandi oye ha longekidha omahini gaNorris ngoka ogo a nu ongula yesiku ndyoka manga inaa kotha.

“Omakende ge gaali natango okwa li gu udha sho twa dhengele yina e ye kendiki lyokutonatela aanona [omolweso],” osho omukuluntusikola a popi ngaaka.