Okapangelo ka patulukakonima yeedula 12

Ovakwashiwana moshitopolwahoololo shaKavango Uninginino itava ka kala vali nokweenda oinano ile opo va dule okukamona omayakulo opaunamiti.

Oministili youndjolowele nomayakulo opanghalafano Etitatu okwa li ya patulula okapangelo kaGcaruhwa, oko ka li ka tamekwa okulongwa momudo 2012.

Oproyeka ei okwa li ya iwa moshipala molwomunhu oo kwa li tei longo eshi a dopa okuwanifa po oilonga noikumungu ya wedwa po, oministili osho ya ti ngaho.

Ominista youndjolowele nomayakulo opanghalafano Kalumbi Shangula oya ti okapangelo aka otaka kala taka vatele ovakwashiwana ovo va kala nokumona oixuna yokumona omayakulo opaunamiti.

Okwa ti vali oshinima eshi oshi li onghatu yakula mokuhanga onghatu oyo tai lalakanenwa youndjolowele mounyuni.

“Okudja nena, omamono oixuna oo okwa ninga oshinima shepitafimbo. Omayakulo opaundjolowele ovakwashiwana vomomudingonoko omu nosho yo omidingonoko di li popepi okwa etwa popepi nanye paife,” Osho a ti ngaho.

Shangula okwati omanga kwa li oilonga yokapangelo aka ya kalekwa, emanifo loproyeka ei otali ulike elitulemo lepangelo lokweeta omayakulo popei novanhu nokukwashilipaleka kutya keshe Omunamibia oku na omhito yokumona omayakulo opaundjolowele e li pamufika, kutya nee ohava di peni nopehe na emono loixuna kombinga yoshimaliwa.

Shangula okwa ti, okutunga okapangelo okwa li kwa katekwa konima epangelo la yandja oshimaliwa shi dulife peemilyona N$7 komutungi oo a dopa okuma oilonga.

Otendela ei okwa li ya yandjwa momafiku 06 Septemba 2012, osho a ti ngaho.

“Oilonga okwa li ya tameka momafiku 19 Oktomba 2012 nokwa li ya teelelika i manifwe momafiku 17 Oktoba 2013. Ashike nee, omunhu ou a pewa oilonga okwa dopa okumana oilonga ei notendela okwa li eikufwa momafiku 29 Febuluali 2016,” Osho a ti ngaho.

Shangula okwa ti okudja opo okwa kala nee taku talululwa omikanda doilonga oyo yashaala ko opo oministili i dule okuandjulula otendela.

Okwa ti omikanda okwa li da manifwa nokwa li da ongelwa opo kudulwe kupulwe otendela i shiivifwe kehangano ledina Tender Board of Namibia.

Ashike nee, oproyeka kakwa li tai dulu okutameka diva molwoinima imwe oyo kwa li ya pumbwa okutalwa nawa.

“Oilonga okwa li ya pewa omulongi umwe momafiku 23 November 2022. Pefimbo da taalela po onhele ei olutivali, okwa li nda yandja ekwashilipaleko lange kutya okapangelo aka oke na okupwa pefimbo.

“Okwa li ka manifwa muKotoba 2023,” Shangula osho a ti ngaho.

Okwa ti kutya pefimbo lokutunga, ovapangi okwa li tava longele momaumbo ovapangi popepi nomukunda.

Okapangelo kaGcaruhwa okayeulula omivelo dako opo ka yandje omayakulo muApilili 2023 omanga okapangelo koovene inaka pwa.

Minista okwa ti omayakulo ahapu opauhaku, mwa kwatelwa omayakulo oomeme konima va mona ounona, nosho yo omayakulo oomeme okukelela oludalo nomayakulo a wedwa po ohaa yandjwa pokapangelo apa.

Oministili youndjolowele oya taalela omaupyakadi oo haa monika unene koitopolwa yokomikunda, osho a ti ngaho.