Okomisi yomahoololo yaNamibia yedina Electoral Commission of Namibia (ECN) oi li moshipyu eshi ya longekida olweendo lomafiku omuwoi lokoSouth Africa opo ovanapolitika va ka konakone nghee eembapila domahoololo tadi longwa.
Okomisi otai pewa oushima keengudu dopolitika molwetokolo layo eshi ya tofa mo ashike ehangano ledina Ren-Form CC, ehangano laSouth Africa olo tali popilwa oulingilingi weembapila domahoololo aZimbabwe.
Otendela oi na ongushu yoshimaliwa shi fike peemiliyona N$6.2.
Ongudu yoRepublican Party (RP), oPopular Democratic Movement (PDM) nosho yo ongudu yoChristian Democratic Voice Party (CDVP) oda anya olweendo eli nokwa li da faneka okuninga ehololo madilaadilo li li ominge noshinima eshi koECN onghela.
Oda hala okomisi ya kaleka otendela ei ndee tai tameke okulandula omilandu dokukonga oipumbiwa, odo tava ti otadi ka kala di li poluheela nawa.
Ongudu yovatumwa voECN yeengudu dopolitika di li 18 odo tadi ka kufa ombinga momahoololo oupelesidente nomutumba wopashiwana okwa li ya ya koSouth Africa Oshoondaxa.
Omundjadjukununi woikwapolitika Rui Tyitende okwa ti eengudu odo da tuma ovanhu koSouth Africa otadi vatele oshinima eshi shi ye komesho.
“Eengudu odo kwa li petameko tadi kondjifa euliko loRen-Form CC, ehalo lado nekufombinga lokukonakona nghee eembapila tadi ningwa otali ulike kutya oda ngwangwana shaashi otadi ti ‘eeno’ ‘ahawe’ keuliko lehangano loRen-Form,” Osho a ti ngaho.
Tyitende okwa ti eengudu okwa li di na okwaanya omulandu opo di yandje etumwalaka kutya keshe oshinima osho tashi dulu okudanena omulandu womahoololo itashi ka popilwa. Okwa ti oshinima eshi shi li moECN paife ngaha otashi danene efano lokomisi.
“Otashi dulu okuteya po omukumo woshiwana nelineekelo ngee okomisi otai dulu ngaa okukwatela komesho omahoololo a manguluka, e li pauyelele noku li pauyuki,” Osho a ti ngaho.
Omundjadjukununi okwa ti oshikumungu eshi otashi dulika tashi holola kutya okomisi itai dulu ile otai ningile owina, osho she shi ninga shi kale tashi piyaaneke unene.
Omundjadjukununi woikwapolitika Henning Melber okwa ti osha nyika oshiponga okutuma ovakalelipo veengudu di li 18 koSouth Africa oule womafiku omuwi opo va ka tale kutya eembapila domahoololo otadi longwa ngahelipi.
“Otashi piyaaneke oECN i xulife po eudafano layo kombinga yedopo lokuyandja otendela kehangano li na ondjokonona i li nawa,” Osho a ti ngaho. Oimaliwa yovafuti voishoshela yepangelo oyo tai futu olweendo eli, osho a ti ngaha.
“Ovakufimbinga ava ohava mono oimaliwa yomalweendo? Ngee oshinima osho osha pumbiwa, okwa li tashi dulu okulongwa mo nawa momukalo u na ombilixa inamu kwatelwa eengudu 18 da yooloka,” Osho a ti ngaho. Melber okwa ti opu na omumbwe yakula yokuwapaleka nokutala nawa ewiliko lomahoololo. “Eshi oshi li okufifa oudemokoli wOvanamibia ohoni,” Osho a ti ngaho.
OUMBADA WOKUDANENA OMAHOOLOLO
Omuleli wongudu yoPDM McHenry Venaani okwa uda kutya Ren-Form ota longele kumwe noECN opo va danene omahoololo. “Ehangano eli ola nyika oulingilingi, kashi fi ashike moshilongo shimwe ashike oilongo ivali, South Africa naZimbabwe.
Onghee nee etomeno ola shike opo ECN a tye kakwa li e na efimbo lawana okulandula omilandu adishe dokuyandja otendela?” Osho a pula ngaho. Venaani okwa ti ECN ota teya po ouyuki womahoololo.
“Itatu li tula momilandu inatu di itavela. Ohatu i kewilikongudu leetendela nepulo eli,” Osho a ti ngaho.
“Otashi dulika tu ye komhangu, otashi dulika tu kanife oinima aishe ei, ashike ohatu twikile nokutya itatu popile oECN, notu wete oiholekwa yavo,” Osho a ti ngaho.
Pelesidente wogudu yoRP Henk Mudge okwa ti ewilikongudu alishe loECN nali fiye po oilonga.
“Otwa pumbwa okutula po ovanhu ovo tava dulu okulongekida omahoololo e li nawa, a manguluka noku li pauyuki,” Osho a ti ngaho.
Okwa ti ongudu itai tambula ko eembapila domahoololo di ningwe koRen-Form. “Eshi onghundana ye ya kutya ehangano eli la mona otendela, ehangano eli li li moSouth Africa, kutya okwa li natango va kwatelwa moulingilingi oo wa ningwa moZimbabwe, noshinima eshi kutya oilyo imwe yoSwapo okwa li ye va talela po, osha ulika ashike kutya opu na oshinima shapuka,” Osho a ti ngaho.
Mudge okwa ti ongudu inai kufa nande onghatu yopaveta. “Ohatu ka yambidida keshe ongudu nonda dilaadila kutya oPDM oye lipyakadila nale naasho, ohatu yambidida keshe onghatu yopaveta,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
