Okomitiye youdano wOlympic oya tula pedu omuungaungi noshimaliwa wayo

Jp Schmidt okwa tulwa pedu ngomunambelewa e na sha nokuungaunga noinima ya pamba oshimaliwa shehangano ledina Namibia National Paralympic Committee (NNPC) okwa li kwa tamekwa omakonakono opaumwene shi na nokulongifa oshimaliwa papuko mehangano omu.

Eshi okwa li sha shiivifwa kupelesidente woNNPC Johannes Litwayi koshoongalele shoikundaneki Etitatu mOvenduka.

Schmidt okwa li nale a lundilile Litwayi nahamushangandjai woNNPC Mike Hamukwaya kutya otava longifa eenghono davo dombelewa papuko notava longifa oshimaliwa papuko.

Etitatu Litwayi okwe likanyuna omapopyo aa ndee ta ti Schmidt okwa kakeka edina loNNPC.

“Omalundilo aye okwa kakeka efano lehangano, omanga natango e li ekakeko loukwatya wange nowahamushandjai,” Osho a ti ngaho.

“Okwa li tu na oshoongalele onghela, eshi nde mu lombwela kutya okwa tulwa pedu manga melelo loNNPC. Okwa tamekwa omakonakono natango kombinga yomapopyo okulongifa oshimaliwa nai, onghee nee itandi popi kombinga yasho paife,” Osho a weda po ngaho.

Schmidit okwa li a popya kutya Litwayi okwa li a tula omainda mondjila yaye yokumona oufemba wokushaina kombaanga yoNNPC, ashike Etitatu Litwayi okwa nukila pomutenya kombinga yoshinima eshi ndee ta ti kashi shi shoshili.

“Aame pelesidente ndee kandi na oufemba wokushaina, okutula ko ile okukoleka oimaliwa ndee omuungaungi noimaliwa okwa li ta yandje omalombwelo ndihe po, kutya openi pu na okufutwa oshimaliwa, olyelye ta futwa nolyelye ita futwa fiyo oimaliwa tai pu po odula ya dja ko. Eshi she ya kodula ei, onda tokola kutya itapa kala nande okuyandja oshimaliwa puhe na elunduluko mokushaina, onghee nee onda ifana oshoongalele kOtjiwarongo momafiku 04 Febuluali odula ei, oko kwa li twa tokola notwa udafana kutya Michael Hamukwaya ota ka kala oye ta tula ko oimaliwa omanga ame nomunabelewa woinima ya pamba oimaliwa hatu kala hatu yandje oimaliwa. Ngee umwe ine pitika, nena oshimaliwa itashi i, opo tu kwate oshimaliwa nawa, tu kelele osho kwa li sha ningwa odula ya dja ko,” Osho a ti ngaho.

“Otwa kala hatu lu okudja muFebuluali, omulumenhu kakwa li a hala okushaina fiyo omomafiku 04 aMei eshi kwa li tu na oshoongalele noNamibia Sport Commission. Opo nee a shaina nawa, onghee nee paife ombaanga yoParalympics oi li ponghatu iwa paife,” Osho a ti ngaho.

Litwayi okwa ti eemiliyona N$4,3 okudja pepangelo dekufombinga laNamibia koKobe 2024 Para Word Championships muMei kakwa li nokuli ya ya mombaanga yavo.

“Oimaliwa yokoKobe kwa li ya twalwa koAtheletics Namibia, oko itandi dulu okwiimona, onghee nee fiyo opaife kandi shi kutya oimaliwa oyo okwa li ya longifwa ngahelipi,” Osho a ti ngaho.

“Paife ota (Schmidt) ti vali otu na eengunga daRennies, ashike ame kandi na eshiivo laasho, shaashi nghi na nande efiku nda shainine eudafano laRennies. Onghee nee, eshi osho oupyakadi ou u li po paife – osho a ninga kashi li mondjila onghee nee kwa li tu na okumutula pedu, opo omakonakono a ningwe. Keshe oo ta ka monika ondjo, na mangwe po,” Osho a ti ngaho.