OMAPUKO OHAA NINGWA AMWE otaa dulu okulidiinikilwa. Ashike eshi sha ningilwa ovahoololi kokomisi yomahoololo Etitatu kashi shi okulididimikilwa.
Okomisi yomahoololo oi na oshilonga shimwe: Okukwashilipaleka omahoololo a manguluka, e li pauyuki nokwa yuka.
Ashike ponhele yaasho, oya etela ashike ovahoololi omayovi oupyakadi ovo kwa li va hala okuwanifa po oufemba wavo wopaudemokoli va pale odila yavo iwa yonakwiiwa.
Konghumwe yavo vene, ewiliko lokomisi yomahoololo ola itavela kutya Ovanamibia ve li omiliyona imwe oshinghwanyu nhee okwa li ve lishangfa omahoololo moule wefimbo ashike lixupi – edidiliko kutya Ovanamibia ove na ohokwe ya mana mo yokukufa ombinga momahoololo, omo nokuli eepelesenda 70 di li dovanyasha ve li koshi yeedula 35.
Okomisi yomahoololo itai liningifa nande kutya oya kumwifwa komwaalu wovanhu ovo kwa li ve ya okuhoolola oshivike sha dja ko.
Nande opu na elineekelo li li pombada, ovanambelewa vomahoololo ova piyaaneka ovahoololi, kashi shi ashike pakuvahandukifa, ashike ovaanyena ovanhu vahapu oufemba wa fimana woudemokoli – oufemba wokuhoolola ovaleli vavo.
Eembapila domahoololo okwa li inadi wana peenhele dihapu moshilongo ashishe, peenhele dimwe ovanhu okwa li va teelelifwa oule womavi mahapu omanga eembapila domahoololo inadi etwa.
Oshinima eshi inashi ningwa ashike komikunda, ashike oashi ningwa yoo nopeenhele odo ashike di li okanano kaxupixupi okudja pombelewa yakula yokomisi yomahoololo.
Omapakete eembapila dokuhoolola okwa li a handa ndee ovanahu okwa vali ve na okuteelela opo ku monike amwe ape; ovahoololi vahapu okwa li va fikama momikweyo oule weevili nande omikweyo kakwa li dile unene; ovanambelewa vomahoololo vamwe okwa li va yandja omatumwalaka taa ngwangwaneke tava tumine ovahoololi keenhe dimwe kuhe na evatelo.
Eenhele dimwe okwa li da lopota kutya ovanambelewa vokuhoololifa ova kala va teelelwa ndee kashi lidule, kwa wedwa eenhele dokuhoololela dopakafimbo.
Pauxupi, okomisi yomahoololo oya ninga omahoololo omudo 2024 e yadi unene omapuko oo taa dulu okukelelwa kwa li, osho sha eta omafeekelo nomauyelele ehe na oumbangi ahapu unene.
Oshinima eshi fiyo opapa osha tala unene kokuhandula oilonga ponhele yokutala kokufinini ovahoololi owina ile omukalo wokulundulula ehalo lovahoololi.
Ashike she likolelela kutya ovanhu vagapi kwa li va kumwa koshinima eshi, oidjemo ya xuuninwa okutya ashike ovanhu ova nyekwa oufemba wavo wokuhoolola.
Ovanhu ove na okupulwa va kalele po oinima ei.
Elelo lokomisi yomahoololo nali fiye po oilonga ile nali tewe moilonga ngee inava hala okutambula ko oupyakadi wakula o ova ningila odemokoli waNamibia.
Pakuweda po, omakonakono opamufika naa ningwe opo oshiwana shi ude ko kutya oshike naana sha puka naasho shi na okuningwa po.
Ngee inaku ningwa ndee taku wapalekwa omapuko aa otshi dulika oshinima eshi shi ka kume nai ondjokonona yomahoololo etu – ngaashi osho twa mona kwaasho hashi ifanwa ookaume ketu kopofingo moZanu-PF moZimbabwe.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
