Okwa li alushe ve yadi ehafo meumbo – Meme wavo ta lili

Anestantia Naruses okwa dimbulukwa ounona vaye vavali, Ibra weedula hamano naEmi Naruses, pamwe navamwaina vavo vamwe, okwa li hava kala va hafa nokuweelela meumbo keshe efimbo.

Paife eumbo alishe ola mwena, ka mu na omaweelelo, kamu na ovanhu tava imbi omaimbilo okofikola.

OSHIDJUU OKUDILAADILA

Peevili dongula yOlomakaya, omunamido 18 vati okwa dipaya ovakwapata vaye veli vahamano koUsakos kolukanda ledina Hakhaseb.

Omukulunhu wopolifi koshitopolwahoololo shErongo Ileni Shapumba, nomupopiliko wopolifi yaNamibia koshitopolwa oko, okwa ti omunhu ou vati okwa ponokela ofalimili yaye noilwifo pokati kotundi 04h00 no06h30, manga i na tomeka eumbo lofamili omundilo.

Oonakuningwa oihakanwa ovo, Elisabeth Naruses (90), Fenny Naruses (18), Ibra (6), Raunish Boer (6) nounona vavali veedula nhatu Rachel Boer naEmi.

Anastentia okwa dimbulukwa ongodi oyo ye mu kumwifa neenghono, tai mu lombwele kutya ina kanifa ashike ounona vaye vavali, ashike nainakulu, mumwainakadona nounona vavamwaina voukadona vavali.

Ounona vaye ihava kala vali tava tondauka meumbo, tava daunauka voo tave litaataya.

“Ibra okwa li e hole okupopyaapopya, ashike Emi kakwa li naana ha popi nakeshe umwe.

Ounona aveshe ihava udu ko peedula opo. Ngee nde ya meumbo, ohava tondokele nge ndee tava popifa nge nokupapatela nge. Ashike paife, eumbo ola mwena alishe,” Osho a ti ngaho.

Okwa ti kutya kapu na nande omunhu mofamili e shi kutya oshike naana sha ningwa po lela ongula yOlomakaya.
“Katwa li mo meumbo.

Ovapolifi ashike novakonakoni ve shi kutya oshike lela sha ningwa po. Katu na ouyelele, kakwa li twa pitikwa tu tye sha,” Osho a ti ngaho.

ONDJOKONONA YA KANIFWA

Omupopiliko wofamili Geraldine Naruses, omumwainakadona waAnestantia, okwa ti kutya oululume ouhapu natango mofamili.

Ota lili eemwenyo dounona voukadona ovo kwa li ve na okutwilikila kondjokonona yofamili yavo.

Omunamido 18 Fenny okwa li e na ondjodi yokulonga koshiputudilo shoikwamina noungoba shaNamibia shedina Namibian Institute of Mining anda Technology (Nimt) opo a yambidide inakulu, oo e mu tekulu konima meme waye a xula ko.

“Fenny okwa li alushe ha ti ota ka lundulula onghalo yofamili yetu. Okwa li e na ondunge yokuya koNimt, ndee te ke lihonga opo a dule oku tu fila oshisho atushe,” Osho a ti ngaho.

Okwa dimbulukwa a peduka koSwakopmund ehe shi ngee keumbo okwa holoka oupyakadi ongula yOlomakaya.

“Ongodi yange okwa li ya dima. Eshi nde i tema, okwa li ku na etumwalaka la dja kokaana kange kokakadona taka pula ndi ka dengele.

Onda denga ndee ta lombwele nge eshi sha ningwa po, ashike kakwa li handi dulu oku shi itavela. Kakwa li nda hala oku shi itavela,” Osho a ti ngaho.

Garaldine natango ota kendabala okuuda ko kutya omundilo otau dulu okuhanauna shihapu ngahelipi ngaho nokwa ti vali ita lili ashike ndee opuwo, okwa handuka yoo neenghono.

“Ova lombwela nge kutya omundilo wolusheno.

Onda pula, ‘ngahelipi? Kakwa li tava longifa oulehite. Omolwashike? Osha ningwa ngahelipi?’ Opu na omapulo ahapu,” Osho a ti ngaho, newi laye la nyika oluhodi.

“Eshi nda fika keumbo, mokombifa kakwa li mu na nande omunhu umwe.

Shito ngeno omu na omunhu keshe efimbo, ta teleke, ta popi, e li ashike omo. Paife, kamu na omunhu.

Onda kanifa ofamili yange aishe … onda kanifa meekulu wange navamwamemekadona ova kanifa ounona vavo moufiku umwe auke,” Osho a ti ngaho.

OOKADIMA MUNDILO

Omunandjungu wouyuki koUsakos Renciah Gaes okwa ti oshimbuluma eshi osha fiya omudingonoko aushe wa haluka.

Mexuliloshivike, okwa li yo vali a holola omanyenyeto kombinga yookadima mundilo vodoolopa itava longo, ta ti otashi dulika nasho sha eta ekanifo leemwenyo.

“Ngeno okwa li okaadima mundilo tava longo, mutu ngeno ofamili oya xupifwa. Oonakuningwa oihakanwa kakwa li va dipawa manga omundilo inau temwa, pamwe ngeno omwa xupa ngaa umwe ile vavali ngeno okwa li evatelo le ya pefimbo,” Osho a ti ngaho.

Gaes okwa ti eeloli domundilo domodoolopa oda kala itadi longo oule weedula nhano paife nokamu na ovanhu va deulilwa okudima omundilo modoolopa, ta ti kutya ovakalimo vomoUsakos ohava futile omayakulo ehe po oshimaliwa shi fike lwopoN$515 komwedi.

“Eli olimwe lomomanyenyeto kwa li la yandjwa nale odula ya dja ko,” Osho a ti ngaho.