Omuhoololwa pelesidente Netumbo Nandi-Ndaitwah okwa ti ondjila yaye yokuninga pelesidente okwa li idjuu ashike natango okw li ya fimana.
Eshi kwa li ta popi koshoongalele shomafaneko shongudumutima yoSwapo Etitano, okwa ti omahoololo oupelesidente nomutumba wopashiwana omudo 2024 okwa li e yadi ovakondjifi neenghono.
“Okudja petameko loikonga okwa li tu shi shi nawa kutya omahoololo otaa ka kala e yadi ovakufimbinga,” Osho a ti ngaho.
Nandi-Ndaitwah okwa findana eepelesenda 57 domawi, omanga Swapo e shi pondola okumona oipundi ihapu yopaliamente, neepelesenda 51.
“Otwa kufa etokolo nongudumutima opo tu ninge oikonga yakola yopamufika, sho osho osho shetu eta apa tu li.
Swapo oku li ongudu yelifikamena i na ovayambididi vahapu moikandjohoololo i li 121 yoshilongo shetu, ndee ngee twa ningi omakonakono omoule, otwa mona kutya otwa ninga nawa meenhele dimwe omo kwa li intu ninga nawa monakudiwa,” Osho a ti ngaho.
Nandi-Ndaitwah okwa ti omukandaudaneko wongudu, u yadi oukumwe, okumona omauwa eliko, enghonopeko lovanyasha nosho yo eyambulepo liwa, owa dana onghandangala mokushipondola kwongudu.
“Omahoololo oo twa mana okwa yandja oufemba wokulela komuhoololwa pelesidente noSwapo.
“Ashike nee, inatu dimbwa kutya oshinakuwanifa osho Ovanamibia va yandja komuhoololwa pelesidente nokoSwapo osho yokuwanifa po omaudaneko nomalitulemo oo twa ninga momaudaneko etu omahoololo omudo 2025 fiyo 2030,” Nandi-Ndaitwah osho a ti ngaho.
Okwa pandula ovanyasha vaNamibia koshoongalele.
“Ovanyasha vaNamibia ova dana onghandangala yakula mokupa ongudu yoSwapo eenghono dokulela oshilongo eedula nanho tadi shikula.
Onda hala okukwashilipaleka ovanyasha vetu elineekelo leni mongudu yoSwapo itali hepa.
Epangelo longudu yoSwapo olo hadi ka kwatela komesho itali ka teya po nande elineekelo leni nosho yo ohokwe yeni,” Osho a ti ngaho.
Nandi-Ndaitwah okwa popya kombinga yefimano lokuwanifa po omaudaneko oo kwa li a ningwa momukanda udaneko wongudu nosho yo okutungila kwaasho sha ningwa koopelesidente vakulu vaNamibia.
“Natu kale tu li komesho tu kwashilipalek kutya osho twa udanekela ovanhu voshilongo eshi otwe shit ula moilonga. Eenghono dongudu yoSwapo odi li meyandjo lomayakulo.
“Eyandjo lomayakulo, ovafimanekwa, nashi kale oshapi yetu, ndee natu longeni yoo noundiinini tu tungile kekanghameno lakola nokondjokonona yomukokoli pelesidente, Sam Shafiishuna Nujoma, pelesidente wetu omutivali nanakufya pelesidente wetu, omwenyo waye nau tulumukwe nombili yaalushe, nosho yoo omupelesidente wetu omutine,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
