Omunashipundi wehangano lokukondjifa malaria koshitopolwahoololo shaZambezi Benjamin Limbo okwa ti malaria ota i pombada neenghono keshe odula, novanhu ve li 8 793 ova kwatwa paife.
Okwa weda po kutya opa kala pu na ovanhu vaheyali va xulifa okudja muJanuali.
Oshitopolwahoololo shaZambezi oshimwe shomoitopolwahoololo oyo ihadi malaria neenghono.
Etine Limbo okwa lombwela oThe Namibian kutya ovanaudu ve dulife po315 paife ova tambulwa moipangelo ve na malaria, ta weda po kutya malaria okwa ninga omukundu wakula kovakalimo novatalelipo ovo have ya moshitopolwahoololo paife.
“Oshitopolwahoololo ohashi kala nomalaria keshe odula shaashi oministili youndjolowele oya kanifa elalakano lokukufa po ndee ponhele oya tala ashike mokuwilika.
Ova itavela pahenu kutya malaria omukifi oo we ya okukalelela nafye.
“Kapu na omilandu dowina da nuninwa okweendeleleka okukufa po malaria.
Malaria ke na okudipaya omunhu nande oumwe moNamibia shaashi oha dulu okupangwa nokukelelwa,” Osho a ti ngaho.
Limbo okwa ti vali elongelokumwe langhundipala pokati kelelo lopaitopolwa nepangelo kombinga yokukonga oipumbiwa nokuyandja omayakulo oinima yamalaria otashi i eenghendabala dokulwifa malaria moshipala.
“Kapu na omakonakono omeni oministili omalaria pashitopolwahoololo, ove lipyakidila noikumungu yopaumwene.
Oshiwana inashi popiwa nasho nawa opo shi kufe ombinga meenghendabala dokukufa po malaria.
Ovanailonga inava deulwa nawa opo va yandje omayakulo opamufika a pumbiwa, unene ovanailonga ovo va pombela,” Osho a ti ngaho.
Limbo okwa ti oministili youndjolowele nai tameke okutala keenghendabala dokukufa po malaria pakuyandja oipumbiwa ihapu koshitopolwahoololo shaZambezi opo shi dulu okukufa po malaria filufilu.
“Tota po ombelewa moshitopolwahoololo shaZambezi tai longo nawa mokuyandja omauyelele koshiwana opo shi kufe ombinga meepolohalama dokukufa po malaria.
Tula po omafaneko a yela neendjodi dokukufa po malaria, okutameka neendjodi defimbo lixupi.
Eshi otashi ka vatela mokutula oinima neenghendabala opo da pumbiwa unene. Nyola ndee to tula omilandu moilonga odo da nuninwa oinima yokukufa po oshinima eshi filufilu,” Osho a ti ngaho.
Omupangi akula, oo a popya noThe Namibian neudafano kutya oukwatya waye itau hololwa Etine, okwa ti oshipangelo noupangelo vamwe vashona natango kave na omiti domalaria, omanga komandiki amwe opaundjolowele noupangelo vashona navo ve na ashike dishona.
“Paife ngaha osha piyaana. Ewiliko otali danauka neemwenyo dovanhu shaashi ohava teelele fiyo omiti otadi pu po opo va ninge edilo va tuminwe dimwe. Ashike nee, mbela neefitola domiti moshitopolwahoololo kamu na miti damalaria shaashi oshitopolwahoololo osha mona omiti domalaria onghela ashike paife kapu na sha omiti,” Odjo osho ya ti ngaho.
Omukulunhuwiliki woministili Ben Nangombe Etine ina dula okunyamukula shaashi okwa li e li moshoongaleleilonga nokwa li a pula a pewe efimbo opo a dule okuyandja olopota i li mondjila konima yefimbo.
Omukulunhuwiliki woundjolowele wopashitopolwahoololo, Woitha Kapumburu, kakwa li nande a nyamukula komapulo oo kwa li a tuminwa.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
