Okandidate Koupelesidente Koswapo Netumbo Nandi-Ndaitwah okwa hala ovahoololi vaNamibia va itavele kutya ovanangeshefa, omahangano okondje yoshilongo nosho yo omahangano oSwapo okwa yandja ashike oshimaliwa koikonga yomahoololo ongudu oshali shamuhongi.
Nandi-Ndaitwah (71) okwa longa nale noku na okukala e shi shi kutya shali okwa fya nonghee nee kapu nande omusha woshali mongeshefa oyo ya kala ko nale unene ngaa yokuninga oimaliwa, i shiivike nawa kutya oiyemo.
Netumbo Nandi-Ndaitwah ita popile nande eyandjo loushima kutya ovanamadina vamwe nomahangano oo a tondokele onghuwo yaye yokuyandja omaano koshivilo shokwoongela oimaliwa shoSwapo osho sha li mOvenduka Etitano loshivike shinya okwa li ve shi ninga opo va kale nokumona omauwa kombuda yopolitika.
“Itatu ka landifa po oshilongo eshi, kashi fi oSwapo, itashi ningwa koshi yelelo eli li li koshi yetungo eli. Itashi ka ningwa,” Netumbo osho a nyamukula ngaho oshivike sha dja ko.
Osho oshinima tashi di kovanhu ovo tuu ovo va ninga oshitufi shokwoongela oshimaliwa va shiva ovakengeli opo va longele kumwe va “wilike omilandu depangelo”.
Netumbo okwa nyenyeta kutya oukwatya “woudemokoli tau landifwa”, konima eshi Swapo a mona oshimaliwa shi fike peemiliyona N$16 monguloshi ashike imwe okudja kovanangeshefa nomahangano okondje yoshilongo, kakwa li “u li mondjila”.
“Landula oilongo ikwao yopaudemokoli opo u dule okumona nghee eekandidate tadi ongele oimaliwa pauyelele. Omahangano akula otaa landifa po oudemokoli wavo pakuyandja oshimaliwa?” Osho a pula ngaho.
Netumbo okwa li a pumbwa okupopya oshili ndee ta itavele kutya ovakwashiwana moilongo ihapu yopaudemokoli ova kala alushe nokunyikaanyika eyandjo loshimaliwa paumwene nopeengeshefa kovanapolitika.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
