‘Omahokololo ashike ongaho oSwapo’

. . . IPC a nyamukula komapopyo kutya okwa pewa oshimaliwa kepangelo naBritain

Ongudu yoIndependent Patriots for Change (IPC) oya kupulashi omapopyo kutya otai vatelwa kepangelo laBritain tai ti oo ‘omahokololo ashike ongaho oSwapo’.

Hamushangandjai wopashiwana woIPC Christine !Aochamus Oshoondaxa okwa ti Swapo ota toto omahokololo a kakeke edina lavo.

“Ongudu yoIPC oya ninga ongudu tai kondjifa i tifilifa. Swapo okwa dopa okuudifa ko ovahoololi nomilandu nomikalo diwa,” Osho a ti ngaho.

“Epangelo olo tali di ko koshipundi nali ulikile ovahoololi kutya omolwashike la hala okukala koshipundi ndee inali kala ashike tali hepeke efimbo letu noinima ihe shi yoshili; natango otai holola ashike kutya itava dulu,” !Aochamus osho a weda po ngaho.

Okwa weda po kutya oministili yomakwatafano nelongelokumwe lopaiwana noministili yomauyelele nomakwatafano opaungoba inadi tya sha kombinga yomapopyo e li ngaha.

!Aochamus okwa ti ongudu okwa li ya totwa kwe likolelelwa komilandu dopaveta, omulandu oo ya kala nokuyambula po okudja ngaa pendalao layo.

“Eenghono doIPC otadi di kOvanamibia voovene: ovahongifikola va loloka eengulu dofikola diha di, ovanyasha tava kongo oilonga oyo ihe po, ovadali tava tale ounona vavo ve na omauhongelwe va wililwa po komadilaadilo vehe na oilonga.

Ova ovo ovanhu ava ve tu kwete lela, kashi fi eenghono dimwe dokondje yoshilongo,” Osho a fatulula ngaho.

!Aochamus okwa ti ongudu yaye oye litula mo mokukonga oilonga yovanyasha , nokulwifa oulingilingi, mokati koinima imwe.

“Omolwashike omahokololo aa oipupulu tee ya ashike paife, oshivike okuya kokuhoolola? Oshipu – ove shi shi kutya Ovanamibia otava shiva kutya oudemokoli woshili oshike,” Osho a ti ngaho. Hamushanga wevava lovanyasha loSwapo Ephraim Nekongo Oshoondaxa okwaanya omaalundilo ongaho okudja koIPC kombinga yokwaandjakaneka oinima ihe na oushili.

“Fye (Swapo) otwe lifimaneka eshi tu li ongudu yopolitika i na oshisho nohai longo pauyelele, twe litula mo mokuyambula po ondjodi yetu nohatu kambainine okandidate ketu koupelesidente, omufimanekwa Netumbo Nandi-Ndaitwah nawa,” Osho a ti ngaho.

Nekongo okwa ti oshi liwetikile nawa paife kutya ongudu yoIPC oyo tai andjakaneke omahokololo ehe na oushili paife, taa kendabala okupukifa oshiwana nokuya kokule nomukalo wavo vokukambaina.

“Okutalulula ashike oinima yomulelei woIPC komalungula, oya ulika nawa kutya olyelye e kwetele okuyandja omauyelele ehe shi oshili komesho,” Osho a ti ngaho.

Nekongo okwa ti elitulemo loSwapo oli li kOvanamibia, “nohatu pula oshiwana opo shi litule moinima ei i na oshilonga.”

“Oshinima shetu sha fimana okukwatela po oukumwe nokuyambula po etumwalaka letu lokuya komesho nokuyambuka po.

Ohatu pula Ovanamibia aveshe opo va wanife po oufemba woudemokoli wavo ndee tava ka hoolola momafiku 27 Novemba.

Omahoololo aa okwa fimana, kashi fi ashike kongudu yetu, ashike nokonakwiiwa yoshiwana shetu shaashi otwa teelela okuhoololo omupelesidente wetu wotete womukainhu,” Osho a ti ngaho.

Nekongo okwa pula oilyo yongudu opo ihai itave omukalo womuheka woIPC ile ouyelele uhe li mondjila.

“Atushe, ohatu dulu okutunga po Namibia a kwatela mo ovanhu aveshe. Natu findeni ovo tava kendabala okudina eenghono detu dokuya komesho dopamuhanga.

Ngee otwe ya pamwe atusheni, ohatu dulu okupala ondjila yonghalamwenyo i li xwepo yOvanamibia aveshe,” Osho a ti ngaho. Natango, omundjadjukununi womilandu dokondje yoshilongo Marius Kudumo Oshoondaxa okwa ti Ovafrica novaleli vavo nava kale tava longekida onakwiiwa yavo puhe na okulombwelwa ile okulidopamo taku di komunhu wonumba.

“Inashi kala tashi kumwifa eshi twa yuka pomahoololo ngee hatu udu omahokololo a yooloka, mwa kwatelwa naao inaa udika nale omapopyo eheshi awa kombinga yeekandidate odo di li mefiyafanepo neengudu dopolitika yoo,” Osho a ti ngaho.

Kudumo okwa ti omahokololo aa okwa nuninwa okuxwaxwameka oindjemo yomahoololo, shaashi okuhoolola oshinima shopamaliudo nosho yo pamadilaadilo. Natango okwa pula oshiwana opo shi kale shi na ouyele kombinga yomakwatafano oo e li pokati koilongo.

“Oilongo oya tota omilandu nomikalo dopambelewa odo hai longifa ngee tai kundafana. Kashi shi nandenande okupitila momalungula,” Osho a ti ngaho.

“Osha fimana okulombwela ovakwashiwana kutya, okatendo komahoololo otaka ti, okupewa nokutambula oimaliwa kweengudu dopolitika, omahangano ile ovanhu kashi shi naana oshimbuluma shama ashike oimaliwa oyo needjo dayo oda lombwelwa okomisi yomahoololo,” Osho a weda po ngaho.