Eengudu dimwe dopolitika oda holola eudo lado lonai konima okomisi yomahoololo yaNamibaia yedina Electoral Commission of Namibia (ECN) kwa li ya shakeneka oupyakadi weembapila domahoololo inadi wana oshilongo ashishe pefimbo lokuhoolola Etitatu.
Eenhele dihapu dokuhoololela okwa li nda shakeneka oupyakadi weembapila inadi wana okudja ngaa omutenya Etitatu, osho sha fiya ovahoololi omafele va handuka neenghono. Keenhele dimwe, okomisi yomahoololo oya dopa okupatulula eenhele dokuhoololela pefimbo.
Ovanamibia ashike ve dule pomiliyona imwe oshinghwanyu nhee kwa li ve lishangifa opo va kufe ombinga momahoololo oupelesidente nomutumba wopashiwana.
Omupedu pelesidente wongudu yoNamibia Economic Freedom Fighters Kalimbo Iipumbu okwa ti otashi dulika va ka xwike po eembelewa dokomisi yomahoololo.
“Otwa handuka. Otu udite kutya eembapila domahoololo oda pwa po koitopolwa imwe koZambezi, Kavango, Otjozondjupa, Kunene noKhomas.
Otwa kala hatu popi kombinga yelilongekido lokomisi yomahoololo ndee paife ohatu ka tya omahoololo aa okwa manguluka noku li pauyuki ngahelipi ngee ovanhu vahapu inava mona eembapila dokuhoolola?” Iipumbu osho a ti ngaho.
Okwa ti, ovanhu ove lilongekida okukufa ombinga momahoololo, ashike kapu na eembapila domahoololo.
“Opu na omukalo wokudina oshilongo eshi,” Iipumbu osho a ti ngaho.
Okwa ti ngee okomisi yomahoololo kakwa li ye lilongekida okuninga omahoololo, okwa li ya pumbwa i pule i pewe omafiku awana.
“Okusheka oudemokoli wetu ku li ngahelipi oku? Lipula, vati otu na eembapila domahoololo di li lwopomiliyona imwe oshinghwanyu hamano? Osha hala kutya eembapila dimwe oda longekidilwa ongudu yopapolitika imwe yonumba?” Osho a pula ngaho.
“Hasho hatu kala ngaha kaa! Ngee osha pumbiwa, otwa pumbwa okuxwika po okomisi yomahoololo. Omu omoNamibia itatu kala ashike hatu lididimikile oulai u li ngaha.”
Hamushangandjai wongudu yoPopular Democratic Movement (PD) Manual Ngaringombe Etitatu okwa lombwela oThe Namibian kutya omulandu womahoololo owa danenwa koinima ihe li mondjila.
Hamushandjai okwa ti ova didilika oupyakadi nomulandu wokutalulula shaashi ovahoololi vamwe kakwa li ve li ko kosystema. Eengudu domilameno Etivali okwa li da kunghilila kutya oshinima eshi oshi na okukala po.
“Ovahoololi ova teelela momikweyo, ashike eshi tava ka ya pokutala omaukwatya avo ngee oku li mondjila, otava lombwelwa kutya kave ko kosystema,” Osho a ti ngaho.
Ngee osystema itai ulike kutya omunhu oo okwe lishangifa omahoololo, omunambelewa womahoololo akula ponhele opo oku na okuhandeka ofooloma opo a didilike oshinima eshi.
“Okwa li hatu kondjele Erongo, Omaheke, Otjozondjupa noHardap opo u na okukondjifa opo eefoloma odo di dje keembelewa dokomisi yomahoololo dopashitopolwahoololo,” Osho a ti ngaho.
Hamaushandjai wongudu yoIndependent Patriots for Change Christine !Aochamus okwa lombwela oThe Namibian kutya ovakumwifwa komukalo oo omahoololo a ungwaungwa nao kokomisi yomahoololo, ta popi kombinga yeembapila dokuhoololifa inadi wana nosho yo omashina okukoleka oinima aishe taa ende kashona.
“Oshike shi na okupula eevili mbali ile nhatu okutwala eembapila domahoololo koElisenheim nokoFinckenstein? Otadi kufwa peni,” Osho a pula ngaho.
!Aochamus okwa ti, otashi monika sha fa okuningila oinima owina kwokomisi yomahoololo opo i handukife nokupiyaaneka ovahoololi.
“Itashi shiva. . . Eembapila domahoololo edi kwa li da ningwa da pitilila odi li peni? Osha ningilwa owina opo ovahoololi va ude nai ndee tava fiye po omikweyo?” Osho a pula ngaho.
Ova lopotelwa kutya koKhorixas, Gobabis noKhomas kaku na eembapila da wana.
“Ohatu yambidida lela omapopyo kutya oshinima eshi osha ningilwa owina,” Osho a ti ngaho.
Okwa ti kutya eembapila domahoololo eshi kwa li tadi twalwa keenhele dokuhoololela kapwa li pu na ovakalelipo veengudu.
“Otu na omalimbililo lela kombinga yomahoololo aa.”
Hamushanga wevava lovanyasha loSwapo Ephraim Nekongo okwa ti ovakalelipo vongudu yaye ova lopota kutya eenhele dimwe dokuhoololela moshitopolwahoololo shaMaheke okwa li da mana po eembapila dokuhoolola.
‘OMAFANEKO A NGHUNDIPALA’
Omupekapeki wehangano lokuninga omakonakono omilandu depangelo Fedrerico Links okwa holola omaliudo aye kombinga yomaupyakadi oo kwa li ovanhu va taalela pefimbo lomahoololo.
“Otapu monika pa fa pwa li omafaneko a nghundipala nosho yo okuyandja oilongifomwa keenhele oko taku dulu okukala ovahoololi vahapu kwa nghundipala,” Links osho a ti ngaho omanga e li momukweyo a teelela aka hoolole koSwakopmund.
Okwa ti opu na ehandu nokuteka omukumo mokati kovahoololi molwomikweyo dile nosho yo omakateko akwao.
“Ovanhu ovo ve li komesho yange nokonima otava ti otashi monika sha fa okufininika ovahoololi notwa mona ovanhu tava fiye po omukweyo ndee tava i komaumbo shaashi omukweyo otau ende kashona.
Ngee osho shi li ngaho, nena otashi dulu okwiifanwa okumonifa ovahoololi oixuna,” Osho a ti ngaho.
Links okwa londoda kutya omakateko oo otaa dulu okudanena omulandu womahoololo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
