Omahoololo owina okomisi yomahoololom yaNamibia yedina Electoral Commission of Namibia (ECN) Etitatu okwa nyonwa keembapila inandi wana peenhele dimwe domahoololelo, omikweyo dile nosho yo omakateko peenhele dimwe.
Omunashipundi wokomisi yomahoololo Elsie Nghikembua Etitatu okwa ti omwaalu wovanambelewa vopolifi novakwaita ovo kwa li va ka hoolola okwa li udulife pwaao kwa li wa teelelwa.
Oshinima eshi osha eta opo eembapila domahoololo di kale inadi wana peenhele dimwe dokuhoololela, osho a ti ngaho.
Nghikembua okwa ti okomisi yomahoololo okwa li ye lilongekidila ovahoololi ve li 8 000, ashike eshi ashike otundi 15h00 ya ka denga, ve li 7 100 okwa li nale va hoolola.
“Otwa mona omwaalu wonumba okudja koshikondo sheameno, ashike ongula ei, okwa li pu na ovanhu vahapu shi dulife pomwaalu ou twa li twa teelela. Ngee ova ninga omalunduluko opo va pitike keshe umwe e uye a hoolole, inave shi popya,” Osho a ti ngaho.
Nghikembua okwa ti nande nee oshinima osho sha li ngaha, oinima aishe oya enda lela nawa. Oministli yetanga leameno noipambele yoonakulwa vakulu kakwa li nande ya pitika meekamba dayo mu ningilwe omahoololo.
“Oministili inai hala ngaho . . . etomeno katu li shi. Okwa li ashike ve udite kutya oto dulu okukala popepi nokamba yetanga leameno, ashike kashi fi nee mokamba mwoovene.
“Pamulandu, inashi yuka, shaashi oda shiivifwa nale, nonghee nee, edi odo ashike eenhele twa pitikwa tu longife ongeenhele domahoololo,” Nghikembua osho a ti ngaho.
Omundjadjukununi woikwapolitika Ndumba Kamwanyah Etitatu okwa ti omafaneko omahoololo owina okomisi yomahoololo otaa dulu okukala kwa li e li xwepo.
“Omikweyo dile neembapila inadi wana otadi ulike kutya inaku lilongekidwa nawa, unene ngaa eshi ovahoololi vahapu alushe va teelelwa va holoke komahoololo owina,” Osho a ti ngaho.
“Omafaneko e li xwepo, ngaashi okuyandja eenhele dihapu dokuhoololela nokukala ve na eembapila dawana ngeno oda ninga omahoololo a ende nawa,” Osho a weda po ngaho.
Omupopiliko wongudu yoLandless People’s Movement (LPM) Lifalaza Simataa Etitatu okwa ti okomisi yomahoololo otashi dulika kwa li ya dina okuuya kwovanhu komahoololo.
Omupopiliko okwa ti vali okwa li e na omalimbililo kombinga yokomisi tai dopa okutulika oidjemo yaavo va hoololela kondje yoshilongo.
“Shimwe vali, oidjemo oyo twa mona komalungula okudja koshiwana nokoifo kundaneke oyo yotete okuyandja eenghundana, omanga okomisi yomahoololo tai dopa okutula ouyelele komapadja ayo aeshe okomalungula,” Simataa osho a ti ngaho.
Hamushangadjai wongudu yoIndependent Patriots for Change (IPC) Christine !Aochamus Etitatu okwa ti ovakalelipo vongudu ovo va tumwa oshilongo ashishe nosho yo keembelewa dimwe doshilongo kondje yoshilongo inava lopota nande omaupyakadi akula.
Omupopiliko wongudu yoAffirmative Repositioning (AR) George Kambala okwa ti ongudu otai konakona nawa keshe shimwe, ta tula keshe osho shapuka komapepe okomisi yomahoololo.
“Omanga hatu twikile nokunana ekalelepo loinima okudja kokomisi yomahoololo, ohatu pula natango Ovanamibia aveshe va kale va ngungumana nove lididimika pefimbo eli lidjuu. Otu udite ko kutya otashi udifa nai, ashike ohatu mu pula opo muha pitike nande omaupyakadi aa e mu teye omukumo,” Osho a ti ngaho.
Kambala okwa ti okwiididimika naku kale oshinima shotete kokukodjifa efimbo eli lidjuu.
“Inatu kanifeni osho hatu lalakanene – onakwiiwa iwa younona vetu, oshiwana shetu noshilongo shetu,” Osho a ti ngaho.
Hamushandjai wongudu yoPopular Democratic Movement (PDM) Manuel Ngaringobe Etitatu okwa ti omikweyo dile otadi ulike kutya ovanhu ove na ohokwe yokuhoolola.
“Omulandu otau ende kashona. Kokamba yovakwaita kOsona, omahoololo okwa li manga a mwena po shaashi eembapila domahoololo okwa li da pwa po. Inandi mona nande omanyenyeto amwe. Oupyakadi wange wakula eekandidate domutumba wopashiwana kadi li mo natango momashiivifo opambelewa,” Osho a ti ngaho.
Nande okuhoolola okwa tameka pefimbo kOmbaye Etitatu, ovakalelipo vongudu okwa li va udifwa nai komahangano amwe eeshi eshi a kateka oinima shaashi okwa dopa okuyandja omisholondodo dovanailonga vavo ngaashi sha pulwa.
Ovanambelewa vokomisi yomahoololo okwa li tava longo noudjuu okumona ngee ovanhu vamwe okwa li ngaa shili ovalongi vomomeva nosho yo omahangano oo hava longele. “Okwa li tashi ende kashona petameko, shaashi ovanambelewa ovo tava wilike okwa li ve na okutala omikanda tete odo da dja komahangano okukwata eeshi. Omahangano amwe okwa tuma omadina ehe na eenomola doumutwe,” Omukalelipo woIPC Naeman Shikongo osho a ti ngaho.
Omukonakoni wongudu yoNamibia Economic Freedom Fighters (NEFF) Jacob Seizer okwa ti oinima aishe otai ende nawa, ashike okwa li e lineekela ovakwativeeshi vamwe va dimbulukwe opo hava longele.
Omukalelipo wongudu yoPDM Angelina Lantar okwa ti: “Oshinima okwa li tashi ende kashona unene. Ovanhu okwa li vahapu nokwa li va pumbwa okuvatelwa diva.”
Omukalelipo voSwapo Magreth Sem okwa ti omikweyo okwa li dile potete shaashi omahangano amwe kakwa li a yandja omauyelele omadina ovanailonga. “Ovapolifi novakwaita ove ya ve li momindjalo davo doilonga.
Ohandi ti vali moshikando tashi landula nava kale ve na oitaashi itatu mongulu imwe. Ovanhu vashona okwa li va tumwa komaumbo shaashi omadina avo kakwa li e li mo momisholondodo domahangano avo,” Osho a ti ngaho.
Omunambelwa oo a li ta wilike Ernstine Shindimba Etitatu okwa ti kapwa li nande pu na omaupyakadi asha.
“Onhele oi yadi. Otu shi shi kutya kashi shi naana shipu, ashike ohatu kendabala tu ninge osho hatu dulu,” Osho a ti ngaho
Omunambelewa Penehafo Haikela, okwa ti ovahoololi okwa li lela va hafela omulandu aushe nokwa li va hafa eshi tava hoolola.
“Ongula ei, engungo okwa li lihapu, notwa kala tu li apa efimbo li dule povili inatu tameka nokuhoolola, shaashi okwa li ashike pu na onhele imwe aike yokuhoololela,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
