Omukiintu gwomimvo 34 okuli metonatelo lyopolisi moshipangelo shaShakati konima sho taku hokololwa a dhipaga ohanona ye ndjoka a pulumutha konima ashike yomasiku gahamano nolwanima omudhimba okwe gu tula mokila yokutalaleka iinima yomegumbo.
Oshiningwanima shoka osha nongelwa mEtiyali notaku hokololwa sha ningilwa molukanda Onawa talu adhika mOshakati.
Omupopiliko gwopolisi yaShana, inspekta Thomas Aiyambo okwa popi kutya omukiintu ngoka okwa pulumuthile megumbo, nolwanima okwa dhipaga omwanamati ngoka nomudhimba okwe gu holeke.
Okwa hokolola kutya omukiintu ngoka okwa mono okanona momasiku 13 Septemba kongulohi lwopotundi 20h00.
Otaku hokololwa kutya konima sho a dhipaga ohanona ye, omudhimba ngoka okwe gu yogo nolwanima okwe gu tula moplastika nokwe gu holeke mokila yokutalaleka, maandjawo.
Omudhimba ngoka ogwa adhika moplastika konima sho omushiinda kwa li a yakeleko opolisi kombinga yokanona hoka kali ha ka lili ashike okwa kwatwa komalimbililo sho a tameke i iha uvu we ewi lyokanona ta ka lili.
Aiyambo okwa popi kutya otaya fekele yina yokanona hoka e ka dhipaga konima owala yomasiku omashona sho ka pulumuthwa.
Otaku hokololwa omufekelwa kwa li a monika a humbata ooplastika, naashoka okwa li wo she eta omalimbililo komushiinda.
Omukiintu ngoka taku hokololwa kutya okwa li hazi oye awike, okwa lombwele opolisi kutya okwa dhipaga omwana nomudhimba okwe gu holeke mokila, sho Aiyambo a hokolola ngaaka.
Omufekelwa ngoka ngashingeyi okwa taalela iipotha ya kwatela mo okuholeka oluvalo, osho wo edhipago, omanga kwa tegelelwa oshizemo dhomakonakono gombinzi.
Omakonakono gopolisi otaga pula komeho.