Omukiintu e li monkumwesho a dhimbulula kutya okwa‘hulitha’ omimvo 2 dha piti

Omukalimo gwomOshakati okwa li monkumwe onene sho a dhimbulula kutya okwa ningilwa onzapo yeso.

*Dodonia Shivute (46) okwa hokolola kutya okwa li a ningi eindilo kehangano lyomakwashilipaleko momasiku 19 Septemba, ashike eindilo lye olya tindwa nokwa lombwelwa kutya omulandu gwomehangano ndyoka otagu ulike kutya okwa hulitha nale, noshimaliwa sheso lye osha gandjwa nale nokuli.

Onzapo ndjoka yeso, ya monika konzonkundaneki ndjika, otayi ulike kutya Shivute okwa hulitha momasiku 26 Juni 2022.

Sho a kwatathanwa naye opo a tye ko sha, omunambelewa gwiipambele yoshigwana muuministili wiikwameni, Margaret Kalo okwa koleke kutya oyi ipyakidhila nomakonakono gomuule kombinga yoshiningwanima shoka nonkene ita ti ko sha manga.

“Inatu hala okukupa uuyelele inaawu dhindwa, onkene shoka tatu ningi okutega owala omakonakono ngoka gomuule taga ningwa ga manithwe opo nee tatu vulu okutya ko sha,” osho Kalo a popi ngaaka.

Ehangano ndyoka lyomakwashilipaleko (li shiwike koThe Namibian) olya popi kutya nalyo olyi ipyakidhila nokuninga omakonakono kombinga yoshiningwanima shoka. Shivute okwa hokolola kutya onkene e li monkumwe kombinga yoshiningwanima shoka.

“Ehanganokwashilipaleki ndyoka olya tumine ndje okopi ndjoka yonzapo yeso ndjoka yi na uuyelele awuhe wu li mondjila notawu tsu kumwe nokatse kandje, notayi popi kutya ngame onda hulitha.

“Shoka otashi ulike kutya opuna omuntu kwa li a tula ndje mekwashilipaleko opo a mone ko oshimaliwa ngee nda hulitha ashike inandi shi tseyithilwa. Kandi shi nee kutya okatse kandje koshilongo okwe ka adha peni, nolwanima okwa ka kutha ko oshimaliwa medhina kutya onda hulitha nokwa li a mono onzapo yandje yeso opo a vule oku ka kutha ko oshimaliwa kehanganokwashilipaleki,” osho Shivute a popi ngaaka.

Okwa popi kutya okwa li a kwatathana nomuniilonga gwehanganokwashilipaleki ndyoka opo a tule mo eindilo lyekwashilipaleko lyeilongo lyomwana, osho wo okutula mo ekwashilipaleko lyonkalamwenyo ye.

“Omuniilonga ngoka okwa tula uuyelele wandje mokompiyuta, nokwa lombwele ndje kutya ota galukile ndje konima yomasiku, naashoka okwe shi ningi. Ashike, nonkumwe onene, eindilo lyandje olya tindwa molwashoka opu na onzapo yeso ndjoka tayi ulike kutya onda hulitha, nonzapo ndjoka yeso anuwa okwa li ya gandjwa kehangano ndyoka okuza kumumwaamemegona, ashike ngame kandi mu shi nande,” Shivute osho a yelitha ngaaka.

“Omuniilonga ngoka gwehanganokwashilipaleki okwa pula ndje kutya omolwashike nda hala okukutha ekwashilipaleko nuukwatya womuntu a hulitha nale. Shoka okwa li sha halutha ndje noonkondo.”

Shivute okwa hokolola kutya ehanganokwashilipaleki ndyoka olye mu lombwele kutya kehangano lyawo okwa li kwa kuthwa oshimaliwa komuntu ngoka a popi kutya oye mumwayinagona gwe, nokwa li e mu tula mekwashilipaleko uuna a hulitha.

“Kokompiyuta anuwa otaku ulike kutya onda mana nale oondjenda mo2022 mOvenduka, ashike konima yomvula ndjoka onda shangitha aanona yatatu oonzapo dhomavalo kuuministili wiikwameni ashike inapu holoka nande uupyakadhi tawu holola etompakano lya sha mokompiyuta,” osho Shivute a popi ngaaka.

Shivute okwa popi kutya okwa li a kwatathana nehanganokwashilipaleki ndyoka kombinga yoshinima shoka ashike okwa lombwelwa kutya oshimpungu shomakonakono gomuule otashi ka ninga omakonakono.

Okwa popi kutya okwa lopota oshiningwanima shoka kopolisi, nokuuministili wiikwameni okwa ya ko opo a ka yelithilwe kutya oshe ende ngiini opo omuntu a gandje onzapo yeso yomuntu ngoka e li momwenyo.

“Onda li nda hala okutseya kutya oshike hashi pulwa uuna omuntu ta ningi eindilo lyonzapo yeso lyomupambele. Onda lombwelwa kutya shoka hashi pulwa okopi owala yokatse yoshilongo. Otashi kumitha okutseya kutya okopi yokamutse oyo awike hayi pulwa.”

Ashike lwanima okwa nongele kutya olopota yopaunamiti yi na edhina lye okuza koshipangelo shaKatutura okwa li wo ya gandjwa.

“Onda yi kombelewa yiikwameni kOshakati nonda pula kombinga yolopota yopaunamiti nonda pula ndi yi pewe, ashike oya tindi oku shi ninga noya lombwele ndje kutya kaye yi na. Ashike sho kwa li ndayi ko lwotango okwa li ya lombwele ndje kutya okuna olopota yopaunamiti ndjoka ya za koshipangelo shaKatutura. Onda lombwelwa kutya onzapo ndjoka ngashingeyi oya kuthwa mo.

Oya popi kutya itaya vulu oku yi pandje molwashoka oshikumungu shoka oshi li kohi yomakonakono,” osho a popi ngaaka.

– Edhina lya longithwa mehokololo ndika halyo lyoshili lya nakuninga oshihakanwa. Shoka osha ningwa opo ku gamenenwepo nakuninga oshihakanwa.