Omukulukadhi a tsu omwana nekende

OMUKULUKADHI gomimvo 62 otaku hokololwa a li a dhenge omwana gomimvo 45 nekende nolwanima okwa li e li longitha oku mu tsa mothingo, sha ningilwa momukunda Iitapa moshitopolwa shaMusati, mEtine lya zi ko.

Palopota yokoshiwike yiimbuluma ya zi kopolisi, ndjoka ya pitithwa mOsoondaha, omufekelwa ngoka okwa tulwa nale miipandeko nokwa patululilwa oshipotha shonkambadhala yedhipago, nakuninga oshihakanwa ngoka a tsuwa mothingo okwa li a taambelwa moshipangelo shaKahao nokuli monkalo tayi nuwa omeya. Omakonaakono gopolisi moshiningwanima shoka otaga pula komeho.

Moshingwanima sha yooloka, otaku hokololwa kutya Haingura Manfred e na omwedhi gumwe, okwa li a hulitha sho taku hokololwa kutya okwa li a gu kombunda ya yina. Otaku hokolwa kutya oshiningwanima shoka osha li sha ningilwa momukunda Mahenzere, moKavango shokUuninginino, mOlyomakaya. Yina otaku hokololwa a li kohi yondhungo nokwa adhika tazi koondingosho.

Moshiningwanima shilwe, omulumentu gomimvo 36 otaku hokolwa kutya okwa li a tsu nokudhipaga omulumentu gomvalele yaZambia ngoka taku fekelwa kutya okwa li mekwatathano lyopaihulo nomukulukadhi gwe mOlyomakaya.

Omukwatakanithi gomakonaakono giimbuluma moshitopolwa shaZambezi, omupevikomufala Evans Simasiku, okwa li a koleke oshiningwanima shoka mOmaandaha, ta ti osha ningwa lwopombali yokoongulasha mOlyomakaya sha landula sho a li a adhelele omulumentu ngoka mombete nomukulukadhi gwe, megumbo lye.

“Omufekelwa okwa li a geya noonkondo naashoka okwa li she mu thiminike a kuthe ombele nokutsa omulumentu ngoka montulo, naashoka okwa li she mu kutha omwenyo. Oshipotha shedhipago osha patululilwa omufekelwa nokuli ngashingeyi mondjeedhililo,” osho Simasiku a popi ngaaka.

Moshitopolwa shaHangwena, momukunda Ongali, kakadhona gomimvo 13 otaku hokolwa a li a kwatwonkonga kumumwayinagona gomimvo 20 mEtitatu lya zi ko. Oshiningwanima shoka okwa li ashike sha lopotwa kopolisi mOlyomakaya. Palopota yopolisi, otaku hokololwa kutya omufekelwa okwa li a yi mondunda moka hamu lala nakuninga oshihakanwa naanona yalwe, nokwa li a a hula nakuninga oshihakanwa nokuya momilalo naye. Omufekelwa okwa li a tulwa miipandeko nomakonaakono gopolisi otaga pula komeho.

Moshitopolwa shaShikoto, mOnayena, omulumentu gomimvo 34 otaku hokolwa a li a kwatonkonga okakadhona komimvo 14 mOsoondaha kongulohi. Omufekelwa okwa tulwa nale miipandeko.

Pokati mpoka, omulumentu gomimvo 30 otaku hokololwa a li a kwatonkonga omukiintu gomimvo 20 – ngoka e na uunkundi wopamadhilaadhilo – momukunda Ndoyona moshitopolwa shaKavango shokUuzilo, sha ningwa omanga ya li taya zi komulonga. Omufekelwa moshipotha shoka ngoka okwa tulwa nale miipandeko.

MoKarasburg mOlyomakaya kongulohi, omukadhona gomimvo 17 ngoka a li mela lyondjila okuya kegumbo okwa li a kwatwonkonga kaalumentu yaali kaayeshiwike momulamba. Nakuninga oshihakanwa otaku hokolwa a li kohi yondhungo pethimbo lyoshiningwanima, onkene ina vula okudhimbulula oonakumukwatonkonga. Okwa li a falwa koshipangelo a ka ningilwe omakonaakono. Kapu ngoka a tulwa miipandeko sigo oompaka nomakonaakono gopolisi otaga pula komeho.