Omukulunhufikola a dengela odi peisho

… ACC ota ningi omakonaakono

Okangudu kokukondjifa oulingilingi moshilongo kedina Anti-Corruption Commission (ACC) otaka konaakona oshibofa omo omukulunhufikola woHermann Gmeiner Primary School, mOvenduka vati a yandja otendela yokutunga eengulu dofikola kehangano olo naye eli umwe womoovene valo. Otendela okwa li yokutunga eengulu dofikola di li hamano, onduda yokutuvikila, oundjuwo noya pula ofikola oshimaliwa shi fike pomiliyona N$ 1.1.
omukulunhufikola Maureen Gottlieb otaku tiwa okwa yandja otendela ina landula omilandu di nasha neyandjo leetendela.
Omupopiliko woACC Josephine Nghituwamata, okwa koleka omapopya aa momapulaapulo avo noThe Namibian.

“Omakonaakono moshibofa eshi natango ee li metifa. Ashike, nande ongaho, ondi na okukala omutumba novakonaakoni ovo ve na oshinakuwanifa shomakonaakona aa ndi tale nge opu na oshinima tashi dulu okupopiwa,” Osho a ti ngaho. Gottlieb okwaanya okutya kosha ndee ta tumu oThe Namibian komukulunhuwiliki wehongo Paulus Nghikembua, ta ti oye ashike a pewa eefelo opo a popye kombinga yoshikumungu osho.

“Dengela omukulunhuwiliki wange, ota dulu okutya kosha komakonaakono,” Osho a ti ngaho.

Nghikembua okwa ti Gottlieb ina tulwa pedu natango shaashi omakonaakono ee li metifa natango.

“Otu na eshiivo kombinga yomapopyo oo, ashike ee li koshi yomakonaakono. Omukulunhufikola ita dulu okutulwa pedu shaashi oshibofa otashi konaakonwa natango fiyo ota monika ondjo, ashike nee, eengulu oda pwa nale okutungwa,” Osho a ti ngaho.

Omukulunhuwiliki wouministili wehongo, ounghulungu nomifyuululwakalo, Sanet Steenkamp, okwa koleka kutya ouministili owe lipaka mo moshikumungu omu.

“Otwe lipaka mo nokwaninga omakonaakono shi nasha noshiningwanima eshi. Ashike nee, dengela omukulunhuwiliki wokoshitopolwa oko opo e ku pe ouyelele wa wana,” Osho a ti ngaho.

Omupopiliko welelo lofikola, Hilya Kambonde, eshi a popya ponhele yovadali okwa ti ovahala omukulunhufikola a tewaatewe.

“Otwa hala omukulunhufikola a ye, fye otwa hala ofikola i ye komesho ngaashi shito shaashi omukulunhufikola okwa piyaaneka ofikola neenghono.

“Oinima oye ya xwepo medina lewiliko lovadali olo tali kufa ombinga paife, ashike nee, inashi futila po osho sha teyaulwa. “Ouministili nao ou shishi onghatu yetu shi nasha noshinima eshi, otwa hala okukufa oinima yetu komukulunhufikola, oo a hala okulya po oimaliwa yofikola, osho fye itatu pitike nandenande.

Eshi oACC tai ungaunga noshibofa otashi ulike kutya omapopyo etu kae shi ashike ongaho,” Osho a ti ngaho.

Ehokololo olo la yandjwa kuKambonde ola ulika kutya lwopuSeptemba 2021, okwa li a pula omukulunhufikola kepandja loWhatsApp ngee ofikola otai tungu eengulu inai lombwela etonatelo nongelo. Kambonde okwa ti ehangano eli la tunga ola mona oshimaliwa shi dulife pwaasho tashi popiwa, shaashi okwa li la futwa li tule mo noipelende, noipelende yokunateka eembapila oyo hai kala konima yongulu noipelende yokunateka omatumwalaka meengulu odo kwa li da tungwa, oshimaliwa shi fike poN$9000 okwa li sha futwa osho she ya fiyo opo N$6 115.

Kambonde, mehokololo laye, okwa popya mo vali oikulumuna oyo omukulunhufikola a ninga, okudja ngaa eshi a yandja N$20 000 ongomukuli wopaumwene kwaaumwe womovanailonga omanga ina lombwela onguduwiliki, okwa kala nokutwala oimaliwa yokuyambula po ofikola kombaanga omafiku a pitilila nokuteya omilandu di nasha noimaliwa yofikola.

Natango vati pokati kApilili 2021 naSeptemba 2022, ohauto i li kedina lomukulunhufikola okwa li ya nwa omahooli oikando itatu koshitaashi shomahooli shaBach mOvenduka koimaliwa yofikola, osho omukulunhufikola a koleka.