Omukuluntu gwoshiputudhilo shaUnam koshitayi shaHifikepunye Pohamba mOngwediva, omusamane Jacob Sheehama okwa tongonona nakusa Ekning Nuusiku Shaanika ongomuniilonga ngoka a li e na ongushu moshitupudhilo shawo.
Nakusa Shaanika (56) okwi imangelekele moshiputudhilo shoka ongula yEtiyali. Sheehama okwa hokolola kutya Shaanika okwa li omulongi gwomoshipundthilo e na eitulemo lyiilonga ye, nokwa li ha longo iilongwa yi na sha nelongo lyuunongononi wopankalathano osho wo oshigwana.
“Otu uvite nayi noonkondo okutseyitha onkundana yeso lya Meme Shaanika. Otatu gandja omahekeleko kaakwanezimo, kookuume, kaaniilonga pamwe osho wo kwaamboka ye mu shi, pethimbo ndika edhigu,” osho a popi ngaaka.
Omupopiliko gwopolisi yaShana, inspekta Petrus Iimbili okwa lombwele onzonkundaneki ndjika kutya Shaanika okwa li a ningi onkambadhala yokwiikutha omwenyo lwoshikando shotango omumvo gwa zi ko.
MEtiyali, omudhimba gwaShaanika ogwi itsuwika lwopotundi 07h30.
Pauyelele womupopiliko gwiitayi yaUnam monooli, Linus Hamunyela, nakusa okwa li a kanitha egumbo lye iiwike itatu ya piti sho lya yangatithwa po komulilo, nokuza mpoka okwa tameke hazi moshitayi shaUnam moHifikepunye Pohamba moka ha longele.
Hamunyela okwa popi kutya nakusa okwa li omumweni ishewe kali nande e na omandhindhiliko gethindakano lyopamadhiladhilo konima a kanitha egumbo lye, sigo oosho i ikutha omwenyo.
“Iiwike iyali ya piti, egumbo lye olya pi po thilu nokwa tembukile komuniilonga pamwe [momalukalwa gomoshiputudhilo] ngoka a kala naye sigo opethimbo a hulitha nena[mEtiyali]. Pauyelele wa zi komuniilonga pamwe ngoka hazi naye, Shaanika okwa zi megumbo ethimbo lyongula u uka kiilonga ngaashi naanaa heshi ningi shito, ishewe megumbo ina kala mo tu ulike omaihumbato gasha taga limbilike.
Pauyelele wondjokonona yiilonga ye okuza komalungula kepandja lyo-LinkedIn, okwa kala omulongi moshiputudhilo shaUnam koshitayi shaHifikepunye Pohamba okuza mo1999, eshi waimine pethimbo kwa li hashi ithanwa Ongwediva College of Education.
Oonkambadhala dhokukwatathana naakwanezimo yaShaanika inadhi eta iizemo ya sha molwashoka oya yamukula kutya itaya ti ko sha, noya lombwele onzonkundaneki ndjika yi pule uuyelele okuza komukuluntu gwoshitayi shaUnam, monooli.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
