ESHI kwa li e li hanga e li momapandaanda konima ohombo yaye ya teka, nena Charles Sawyers (55) oha vatele okuyandja oikulya kOvanamibia ve dulife po540 keshe komwedi.
Sawyers okwa ti okwa li a tanaukila mokulongifa omalodu konima eshi ohombo yaye ya teka, osho she mu etela opo a kale ta nangala koshi yonhopa nomomilamba. Ashike nee, monena oha kwatele komesho ehangano ledina Khomasdal Homeless Development Organistaion (KHDO), olo hali yandje oikulya kwaavo tava mono oixuna koingangamwifi nokave na omalukalwa.
Swayers omafiku aa okwa lombwela oThe Namibian kutya oshinima eshi okwe shi tameka shaashi okwa mona efimano lokukala u na eshi to li omanga kwa li e li momapandaanda aVenduka.
“Onda tameka oshinima eshi shaashi ondi shi shi kutya okukala uhe na olukalwa oku li ngahelipi. Ondi shi shi kutya oshi li ngahelipi okwaanywa nokukala uhe na eumbo,” Osho a ti ngaho.
Konima eshi e lihanga ehe na olukalwa, okwa ti okwa li ha tyapula luhapu oukulya vapyu nawa okudja kovafilinghenda ovo hava landifa oikulya.
Ashike nee, eshi oshinima eshi sha pata, okwa li a tuwa omukumo opo aye kelelodoolopa laVenduka opo a vatele vakwao ovo tave lihangemomikundu di dule eenghono davo, osho a weda po ngaho.
Ehangano olo ihali ningi oiyemo, li li moKhomasdal Community Hall, okwa li la tamekwa momudo 2016 nohali yandje yoo eetundi dombiibeli nosho yo oli li vali ongendiki levyulonghalo.
Sawyers, oo ina nwa nande omalodu oule womido 16, okwa ti endiki natango ohali vatele ovo va pikwa komalodu nokoingangamwifi.
Okwa itavela kutya ovanhu ovo vehe na omalukwalwa luhapu ohava tanaukile mokulongifa oingangamwifi opo va dule okulididimikila onghalo yokukala vehe na onhele oyo tava dulu okwiifana kutya eumbo.
“Ehangano loKHDO otali lalakanene okuyambula po omaxupilo ovanhu ovo ve li momapandaanda,” Osho a ti ngaho.
Swayers okwa ti KHDO oha longele pamwe novaxungimwenyo opo va vatele okuxwepopeka eenghalamwenyo dovanhu ovo tava mono oixuna.
Ehangano loKHDO ihali pangula kutya ovanhu ove lihanga momapandaanda ngahelipi, ashike otali kendabala okuxwepopaleka omaupyakadi avo nomusha wanafangwa ashike owa dja komutima, osho a ti ngaho.
Endiki ohali longo Omaandaxa, Etitatu nEtitano, nohali xupu moinima oyo hali pewa omaano okudja kovafilinghenda.
Sawyers okwa ti opu na omahangano ahapu taa yandje omayambidido kovanhu ovo vehe na omalukalwa.
Ashike nande ongaho okwa pula oshiwana opo shi ninge osho tashi dulu okuninga opo shi ha fife ovanhu ovo tava mono oixuna pefimbo lomatango manene. “Okuyandja efimbo loye ile ounongo woye mokuyambula po vakweni otashi dulu okuvatela omunhu wonumba.
Kashi shi ashike oimaliwa,” Osho a ti ngaho.
Michael Gamaseb (30) okwa kala nokuuya kendiki oku oule weedula nhano konima a kala a pikwa.
“Kakwa li ndi shi shi kutya opu na onhele oko omunhu ta dulu okuya a ka xungwe omwenyo,” Osho a ti ngaho.
Gamaseb okwa ti ehangano ihali mu palwifa ashike pamukalo woikulya, ashike ohali mu pe natango oikutu neetundi dombiibeli.
Omufitaongalo Freddy Brown wongeleka yoCRC okwa ti okwa mona ovanhu va xwepopaleka eenghalamwenyo davo ndee tava twikile nokukala ve na eenghalamwenyo diwa inava pikwa vali nande okusha.
“Opu na omhito opo ovanhu va lundulule okuvatela eenghalamwenyo davo shaashi ove shi shi kutya opu na ovanhu ovo ve na navo,” Osho a ti ngaho.
Oshinima eshi shokufilafana oshisho ohashi vatele yoo ovanhu ve livatele voovene.
Brown okwa ti endiki ihali fininikile ovanhu eitavelo lavo, ashike ohali kendabala okuulika onghenda, elididimiko nohole, oinima oyo ombiibeli hai longo.
Veronica van Wyk (47), oo naye kwa li ha di momapandaanda nopaife ohe liyambe pendiki eli, okwa ti ombili noukaume waSawyers konima a a ya mepandaanda nomona weedula mbali olo etomeno he liyambe pendiki opo.
“Kandi shi kutya ehangano eli loKHDO ohandi li futu shike eshi la vatela nge,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
