Omulumentu a mana oondjenda konima sho a nu omalovu mohango

Omulumentu gwomimvo 30 okwa kolekwa a mana oondjenda moshipangelo shepangelo shaShakati konima sho taku hokololwa kutya okwa li a nu omalovu mohango yontumba ndjoka ya ningilwa moshitopolwa shaMusati.

Opolisi oya lopota kutya nakusa ngoka kwa hololwa kutya oye Kleophas Tuulitate Shivolo, okwa tameke okweehamenena konima sho a nu omalovu mohangano ndjoka ya li momudhingoloko gwaNangolo moshitopolwa shaMusati, mOlyomakaya.

Lwanima sho a falwa mbala koshipangelo, aanambelewa yuuhaku oye mu pupu noku mu konakona noya noya koleke kutya okwa hulitha.

Opolisi oya popi kutya pauyelele mboka ya pewa, Shivolo okwa li nuupyakadhi womutima molwashoka okwa li nokuli a tandwa nokwa li a lombwelwa kundohotola kaanwe we omaluvu.

Oshe etithi sheso lye inashi tseyika natango, nokwa tegelelwa oshizemo shomakonakono getando lyomudhimba.

Aapambele oya tseyithilwa nale onkundana yoluhodhi nomakonakono gopolisi otaga pula komeho.

Pokati mpoka, omudhimba gwa tetwa iilyolutu yimwe ogwi itsuwika momukunda Mponje moshitopolwa shaZambezi, mOlyomakaya ya zi ko.

Otaku hokololwa kutya omudhimba ngoka ogwa adhika kaagu na iilyolutu ngaashi omaako niitopolwa yopaumwene, nokwa hololwa kutya olwa Mate Kapali (38).

Aapambele oya tseyithilwa nale onkundana yoluhodhi nomakonakono gopolisi otaga pula komeho.

Omukwatakanithi gomakonakono giimbuluma moshitopolwa shaZambezi, omupevikomufala Kenneth Simbwae okwa koleke onkundana ndjoka koThe Namibian, uunambo.

Aakwanezimo yaKapali otaku hokololwa kwa li ya tseyithile opolisi yaKatima Mulilo momasiku 13 Mei kutya Kapali okwa kana sha landula sho okwa li a ka pashiyona nookuume ashike kegumbo ina galukila ko we.

Shimbwae okwa popi kutya olukongo lwaakwanezimo inalu pondola oku mu mona.

Ashike, mOlyomakaya lwopotundi 11h40, omulumentu ngoka kwa li ta yulu oohi komukunkulo gwomulongo okwi itsu momudhimba ngoka nokwa tseyithile opolisi.

“Kakele kiilyolutu ngaashi omaako niitopolwa yopaumwene mbyoka ya kuthwa ko, nakusa okwa adhika ke ena oshipa moshipala. Okwa li owala a dhimbululwa kumumwayina ngoka a mono oshilyo she shoka kwa li sha shangwa otatu. Kapu na ngoka a tulwa miipandeko kombinga yoshiningwanima shoka sigo oompaka, nomakonakono gopolisi otaga pula komeho,” osho a popi ngaaka.

Simbwae okwi indile moshigwana kwaangoka e na uuyelele tawu vulu okumangitha po omufekelwa moshiningwanima shoka a kwatathane nopolisi.

Moshiningwanima sha yooloka, omusamane gwomimvo inaadhi tumbulwa okwa tulwa miipandeko mehuliloshiwike lya piti sho taku hokololwa a kwatonkonga omwanamati gwomimvo 10.

Ekwatonkonga ndyoka otaku hokololwa lya ningwa ongulohi yOlyomakaya mondolopa yedhina Stampriet moshitopolwa shaHardap.
Pauyelele wopolisi, yinagona gwa kamatyona ngoka otaku hokololwa a adhelele he yokanona hoka ta kwatonkonga omwana.

“Nakuninga oshihakanwa okwa falwa koshipangelo a ka ningilwe omakonakono nokuli monkalo ombwanawa. Omufekelwa okwa tulwa nale miipandeko nomakonakono gopolisi otaga tsikile,” osho opolisi ya popi ngaaka okupitila molopota.

Moshiningwanima shilwe shekwatonkonga, uumatyona uyali, gumwe oku na omimvo 12 nomukwawo 13 otaku hokololwa ya hangene nokukwatonkonga kakadhona gwomimvo hamano sha ningilwa molukanda Otulupa talu adhika moshikandjohogololo shaLukonda, moshitopolwa shaShikoto.

Oshiningwanima shoka otaku hokololwa sha ningwa mEtitano, noshipotha okwa li sha lopotwa kopolisi kuyina ya nakuninga oshihakanwa.

Komanda gwopolisi yaShikoto, komufala Teopolina Kalompo-Nashikaku, okwa popi kutya aafekelwa nakuninga oshihakanwa otaku hokololwa kwa li taya dhana pehalandjandja ndyoka li pomagumbo gomolukanda.

“Otaku hokololwa kutya aafekelwa oya hekele kakadhona mu limwe lyomomagumbo, nokufundja kutya otaya yi nakakadhona ngoka ku kuume kawo gumwe e li megumbo, ashike sho ya yi mo oye mu kwatonkonga,” osho a popi ngaaka.

Omuniilonga ngoka ha takamitha nakuninga oshihakanwa otaku hokololwa a adhelele kakadhona ta kwatwonkonga kuumatyona mboka, nokwa tseyithile yina ya kakadhona.

Aafekelwa ayehe otaku hokololwa aashiinda ya kakadhona, ishewe inaya tulwa miipandeko.

Omakonakono gopolisi otaga pula komeho.