Aakiintu yaali mboka taya fekelwa ekwatonkonga lyomulumentu ngoka e na uukundi wopamadhiladhilo lwiikando ya yooloka pokati kaMei naJuni numvo, oya tindilwa oboloha sho ya holoka mompangu yamangestrata gwaShakati, mEtine.
Anatolia Petrus (29) naRauha Pinhas (33) otaya tamanekelwa ekwatonkonga lya Tuyoleni Shikongo (22), ngoka taku hokololwa kutya oha adhika kuunkundi wopamadhiladhilo omadhimbo gamwe.
Omolwuukundi we mboka otaku hokololwa kutya oshe eta Shikongo a kale itaa vulu okupitika yemwene okuya miihulo.
Otaku hokololwa kutya aafekelwa mboka oya kala haya adha Shikongo puundingosho nolwanima oya kala hayemu hekele megumbo noku mu kwatonkonga.
Yinagona gwaShikongo, otaku hokololwa oye a lopotele opolisi oshiningwanima shoka. Omutamaneki gwepangelo Veiukai Kangira okwa popi kutya nakuninga oshihakanwa ke li nawa pamadhiladhilo, nonkene epangelo otali tindi egandjo lyoboloha omolwuunene woshipotha, nosha talika ko shi li kohi yomahepeko gomomagumbo.
Kangira okwa popi kutya epangelo onkene lya tegelela olopota kombinga yomakonakono gopamadhiladhilo yaShikongo, ondjokonona ye yuunkundi we wopamadhiladhilo, osho wo uumbangi kombinga yuundjolowele waafekelwa.
Okwa popi kutya omakonakono moshipotha shoka oge li natango petameko.
Aafekelwa oya holoka komeho gamangestrata Mozay Jansen, ngoka a gandja elombwelo opo aafekelwa ya shunwe mondjeedhililo omolwuunene woshipotha, molwashoka omakonakono onkene ge li metifa.
Iihokolola yoshipotha shoka oyu undululilwa komasiku 28 Septemba.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
