Omupresidende a pandula omauliko giipindi ga Ngwediva oshiwike shika

OMUPRESIDENDE Hifikepunye Pohamba, ngoka a egulula Omauliko gIipindi gokOmumvo ga Ngwediva Omaandaha ga zi ko, okwa pandula noonkondo komalongekidho ge li nawa noshowo kaakuthimbinga ye ya oyendji nawa.

Omupresidende ta ti oku mbombolokela komauliko ngaka kwaanangeshefa, unene tuu mboka aashona naapokati, oshi li euliko kutya ngaka otaga ti sha, oshindji kaanangeshefa mbaka.Omupresidende Pohamba ta ti, okuza tuu sho Namibia a manguluka, epangelo olya ninga po oshindji shi na sha noku kwathela aanangeshefa, unene tuu mboka opo taya tameke, ano aashona naapokati. Omupresidende ta ti, epangelo olya tunga omandiki gomangeshefelo okupitila mUuministeli wIipindi nIikwafabulika, shoka sha gandja ompito onene kaanangeshefa mbaka ya vule okuninga oongeshefa dhawo dhomaludhi ga yooloka. Omandiki goongeshefa ndhika, Omupresidende ta ti, oge li 42 lwaampoka, omanga kwiipyakidhilwa nokutungwa gamwe wo moondoolopa ngashi, Ongenga, Eenhana, Omuthiya, Karasburg, Kalkveld, Oshakati nomOkahandja. Mombaye namo otamu tungwa endiki enene lya pamba uunangeshefa, omanga koRundu kOkavango nako taku tungwa wo endiki lyoongeshefa dhomaludhi gi ili nogi ili noshowo yilwe yomayakulitho goshigwana.Opo wo ku kwathelwe nawa aanangeshefa moshilongo, epangelo okupitila mUuministeli wIipindi nIikwafaabulika, olya eta po omukalo gwokukwathela aanangeshefa niitungitho mwa kwatelwa naambyoka yiikwamashina oshali, opo mbaka ya vule okwiihumitha komeho meendelelo ngashi tashi vulika. Omupresidende Pohamba ta ti sigo oompaka aanangeshefa ayehe ye li 580 oya mona omakwathelo goludhi nduka muule womvula ya zi ko naandjika yonuumvo, noyendji oya pandula. Taya ti otaye shi enditha nawa nomakwatho gawo ngaka ya pewa kepangelo.Omupresidende Pohamba ta ti wo kutya molwashoka oomvula adhihe dha zi ko, osha kala oshidhigu kaanangeshefa mboka unene aashona okumona oshimaliwa koombaanga molwashoka kaye na omakwashilipaleko ga kola, nenge kaye gana nando, epangelo olya tokola okutota po Ombaanga yAanangeshefa mbaka, hoka taya vulu nee okuya nokulya omikuli ya tamekithe nenge ya humithe komeho oongeshefa dhawo nawa.Epangelo, Omupresidende ta ti, olya hwepopaleka nokuyululula ko kOmautho gOotendera ngoka ga kala po nale, taga thiminikile yamwe kongudhi. Ta ti, pethimbo ndika omunangeshefa ota vulu okulongitha euvathano lye lyiilonga ongekwashilipaleko lye ndele ta mono oshimaliwa okupitila moombaanga dhoshilongo, ngashi ndjoka ya Namibia, ndjoka yEhumithokomeho naandhoka dhiipindi.Oonkambadhala adhihe ndhika, odha ningwa ku nkondopalekwe omunangeshefa, unene ngoka omushona nomupokati gwa Namibia noshi li tashi ende nawa pethimbo ndika.Shi na sha negandjo lyiikulya koshigwana, Pohamba ota ti epangelo olya tunga po omandiki gokutulwa, nokulanditha iihape moshilongo. Ta indile koshigwana shi tameke okukuna nokutsika iihape opo shi ke yi landithe po komandinki ngoka nokwiimonena oshimaliwa. Epangelo olya eta po woo omulandu gwokutunga omashisha moshilongo moka tamu tulwa nokupungulwa iilya mbyoka tayi vulu okugandjwa koshigwana pomathimbo giiponga mbyoka hayi holoka inashi tegelelwa, ngashi omafundja niikukuta.