Omupresitente ita penduka owala nokuthikila ta kaleke ootendela – Hengari

Omupopiliko gwomupresitente Alfredo Hengari okwa popi kutya omupresitente Hage Geingob ita penduka owala nokuninga etokolo a kaleke ootendela ndhoka dha gandjwa nale, ngaashi yamwe taya indile omupresitente a ye mo olunyala.

“Oshilongo hasho hashi lelwa ngaaka. Oshilongo otashi kala ngiini ngele osha lelwa pamukalo gu li ngawo?”

Okwa popi kutya moshilongo omu na omilandu niikondo mbyoka yu uthwa noya nuninwa okukwandjangela niikumungu yaamboka inaaya nyanyukilwa egandjo lyootendela.

Hengari ndhoka okwe dhi popi sho ta yamukula eindilo okuza komahanganokalelipo gaatungi oConstruction Industries Federation (CIF) osho wo lyedhina Metal and Allied Namibian Workers Union (Manwu) ngoka ga zi mokalungu kutya oga hala Geingob a ye mo olunyala nokukaleka ooprojeka adhihe moshilongo ndhoka dha gandjwa kaakwiilongo, omanga moshilongo mu na omahangano taga vulu okulonga iilonga mbyoka.

Omahanganokalelipo ngoka ogi indile Geingob a kaleke ooprojeka ndhoka dho dhi pitithululwe go omahangano gomoshilongo ga mone wo ompito dhokukwatelwa mo.

Omahanganokalelipo ngoka oCIF osho wo Manwu oga popi kutya ooprojeka ndhoka dha gandjwa kepangelo odha patela kondje omahangano gAanambia gokutunga, naashoka olundji otashi holoka omolwiipumbiwa ngaashi yoshimaliwa shoka hashi pulwa osho wo iipumbiwa yilwe iidhigu, mbyoka omahangano ogendji moshilongo haga kala itaa ga vulu oku yi gwanithapo.

Oshikondo shomatungo osha kala tashi nana nondatu muule woomvula dha piti omolwepangelo ndyoka lya kala itaali gandja we iilonga.

Omahanganokalelipo gopaali ogi indile omupresitente a kaleke ooteendela ndhoka dha gandjwa nale komahangano gopondje yoshilongo osho wo okugandja ompito opo onkalo yomulandu gwopashimaliwa yi talululwe, ko ku gandjululwe ompito ndjoka tayi ka pitika omahangano gomoshilongo ga kutwe nokupewa iilonga.

Ogi indile wo opo omilandu dha pitakana dhi yulululwe opo omahangano gomoshilongo ga mone ompito yokwa adha iipumbiwa yokumona mo sha mootendala ndhoka dha gandjwa nale.

Hengari okwa popi kutya oshilongo shaNamiba otashi lelwa koveta noshi na iikondo mbyoka aantu taya vulu okuya ya ka gandje omanyenyeto gawo uuna inaaya nyanyukilwa egandjo lyootendela dhontumba.

“Otaya vulu okuya kewilikongundu lyokugandja ootendela nenge ya ye koompangu ashike inaya kala ya tega omupresitente a kaleke ootendela omanga pu na nale iikondo [ya nuningwa omakemo ngoka],” osho a popi ngaaka.

Ooprojeka ndhoka CIF osho wo Manwu ta pula dhi kalekwe ongaashi ndhoka dha gandjwa okuza kehangano lyoopate lya yama kepangelo lyedhina Roads Authority, oprojeka yokulongolola opate yookilometa 30 pokati kaKaribib naUsakos; otendela yaNamWater yokutungitha oondama dhokudhina omeya mOshakati osho wo moRundu, osho wo ndjoka yomoshitopolwa shaHangwena yokudhinda omeya nokugandja omeya.

Ootendela dhilwe ndhoka taku indilwa dhi kalekwe omwa kwatelwa yoombonge oonene dhaNamfisa, yaNamWater ndjoka yi li koRosh Pinah, osho wo ootendela dhokutunga oongulusikola nuundjugo ndhoka dha pewa ehangano lyedhina August 26/nUuministili wEtanga lyEgameno nIipambele yOonakulwa aakulu okuza kUuministili welongo.

Omukuluntuwiliki gwoCIF, Bärbel Kirchner okwa popi kutya omahangano gokutunga moNamibia osho wo aaniilonga moshikondo shoka otaya nana nondatu noya pumbwa iilonga noonkondo notashi monika epangelo lya fa kaali na konasha opo ku kwathelwe.

Amushangandjayi gwo-Manwu, Justina Jones okwa popi tati: “Epangelo lyetu osho wo iikondo ayihe yepangelo oyo hayi gandja iilonga momwaalu ogundji moshikondo shomatungo; nonkene epangelo olyo li na okushilipaleka kutya omahangano gomoshilongo, unene tuu ngoka taga vulu okulonga shoka tashi longwa komahangano gopondje yoshilongo, oga pewa iilonga, okupitila miipumbiwa ya pupalekwa nokupewa ooprojeka oonene.”