OMUTAMANEKINDJAI Martha Imalwa okwa ti ombelewa yaye oye lilongekida okuungaunga nakeshe omapopyo ekengelelo ile oimbuluma ya pamba omahoololo oupelesidente nomutumba wopashiwa aNamibia omudo 2024.
Imalwa okwa ti omanga ombelewa yaye ihe na eenghono dokuungaunga nomanyenyeto oshiwana kombinga yoindjemo yomahoololo, natango ove lipaka mo moinima yoimbuluma ya holoka momilandu domahoololo.
“Ngee opu na omapopyo ekengelelo ile oinima yasha youlingilingi, nena ombelewa yetu otai lidopo mo,” Osho a ti ngaho pefimbo kwa li ta pulwa koDesert FM.
Imalwa okwa ti ombelewa yaye oya tota po nale omulandu wokuungaunga noikumungu ya pamba omahoololo oyo ya ningwa omanga inaa tameka.
Omulandu ou owa kwatela mo oinima ngaashi oumbudi, okiuya moshipala ovanambelewa vomahoololo ile eenamanana dopalutu da etwa komulandu womahoololo.
“Pefimbo lomahoololo, ongomutamanekindjai, onda yandja nale omulandu u na sha nonghee oibofa ya dja kombinga yomahoololo tai ungaungwa nayo.
“Mutu opu na oumbudi, opu na okupiyaaneka oilonga yaavo ve lineekelelwa okuwilika eenhele dokuhoololela, ile ovanhu otave lilwifa, ile keshe oshmbuluma sha tameka opo,” Imalwa osho a ti ngaho.
Ashike nee, okwa yeleka kutya eenamanan da pamba oidjemo yomahoololo kai li koshi yoilonga yaye, shaashi ei oinima yopashiwana yokuungaungwa nayo komhangu yomahoololo.
Omapopyo aImalwa okwe metifa lehandu tai i pombada kombinga yoindjemo yomahoololo, opo pu na eengudu dihapu dopapolitika, mwa kwatelwa ongudu yoIndependent Patriots for Change, tai kufa eenghatu dopaveta.
“Otu na nale omulandu ndee shaashi omahoololo okwa xula, paife onda teelela okumona oibofa, ngee opu na, oyo ya ungaungwa nayo.
Ashike eenamanana doovene, osho oshikumungu shokuungaungwa nasho pashiwana, ngaashi komhangu yomahoololo, oyo ihe li koshi yelelo lange,” Imalwa osho a ti ngaho.
OUFEMBA WOVANHU
Imalwa okwa popya kombinga yomatilifo taa i pombada ovatoolinghundana novanandjungu oshilongo ashishe nosho yo enenedu.
“Keshe oshinima sha pamba oimbuluma nashi lopotwe kopolifi. Ombelewa yomutamanekindjai kai na eenghono dokutameka ile okukonakona oimbuluma. Oilonga yetu okukwashilipaleka kutya omaufemba okwaamenwa ngee oibofa ya etwa keemhangu,” Imalwa osho a ti ngaho.
Okwa ti oibofa ya pamba omahandu nomalushindo oi li koshi yoveta yopashiwana, shapo ongeenge ya pamba omakonakono oimbuluma ile oihokolola yokomhangu.
“Omalushindo ohaa ningi a fimana moshibofa shoimbuluma ngee oumbangi wa ongelwa ile ngee omunhu a kwatelwa moshibofa – ngaashi ombangi ta ningilwa omatilifo. Monghalo i li ngaho, omutamaneki a kalela po epangelo ota dulu okukelela ndee omhangu tai ungaunga noshikumungu,” Imalwa osho a ti ngaho.
Mokukalela po okuteya oufemba womunhu, unene ngaa kovanambelewa vepangelo, Imalwa okwa ti ombelewa yaye ohai ungaunga ashike noinima i na sha noimbuluma.
“Ngee omunambelewa wepangelo okwa lulumike omunhu, otashi talika kutya omahepeko opalutu notashi yukifwa koihokolola yoimbuluma. Sha fa ashike, oibofa ya kwatela mo omadipayo, ekwatongonga ile oimbuluma yoludi limwe oi li koshi yombelewa yetu,” Osho a ti ngaho.
Ashike nee, Imalwa okwa ti kutya okuteya omaufe ovanhu kumwe ngaashi ovo tava kongo omangabeko ile okuteya, oinima yopashiwana noinai kwatela mo ombelewa yaye.
“Ngee omunhu ota kongo evatelo opo a xulife po omaliumbato ehe li paveta ile ta kondjifa owii oo aningilwa, oinima oyo oi li koshi yomhangu yoshiwana nohai ungaungwa nayo pamilandu da yooloka,” Osho a weda po ngaho.
Natango, eshi kwa li ta popi kombinga yefiku loufemba womunhu Etitatu, omunandjungu Linda Baumann okwa pandula elitulemo laNamibia lokuyambula po omaufemba ovanhu omanga ta pula eenghendabala dakola dokuungaunga nokuhafikapamwe nokuhena ouyuki.
“Namibia oku shiivikile okuxwaxwameka oudemokoli okupitila mepangelo liwa, elongopauyelele nokukalela po oinima. Omu na eameno lakula nefimaneko lomaufemba ovanhu apa,” Baumann osho a ti ngaho.
Ashike nee, okwa ti opu na omaupyakadi mosystema oo natango taa imbi okudimbulukwa efimano, efikopamwe nouyuki waaveshe.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
