Onda kambadhala mpoka tandi vulu ongomuvali – Nujoma

Minista gwaaniilonga, iipambele yiikwafabulika, netotepo lyiilonga Utoni Nujoma okwa zi mokalungu kombinga yomwana ngoka a mana oondjenda omasiku ga zi ko sho taku fekelwa kutya okwi imangeleke, nokwa popi kutya okwa longa mpoka ta vulu ongomuvali okukwathela omwana ngoka.

Pauyelele wa zi komupopiliko gwopolisi moshilongo, omupevikomufala Kauna Shikwambi, omudhimba gwaNiita Nuujoma (37) ogwi itsuwika momulamba gu li momudhingoloko gwaCimbebasia mOvenduka, mEtitano.

Opolisi okwa li ya tseyithilwa mEtiyali lya zi ko kutya Niita okwa kana, sho a zi megumbo lyaandjawo moRocky Crest, ashike lwanima okwi itsuwika a hulithila momulamba.

Shikwambi okwa popi kutya omudhimba gwaNiita ogwa adhika momulamba gu li konima yosikola yedhina Amazing Private School, koosekuluti yaali yoposikola ndjoka sho kwa li taya kongo iikuni momulamba.

Moonkundathana nonzonkunaneki ndjika, aakwanezimo yamwe yaNiita, ngoka e na aanona yaali, oya popi kutya [Niita] okwa li ta dhengwa kethindakano lyopamadhiladhilo, ishewe ina mona ekwatho lya gwana, nonande oya gwedha po kutya oye wete kwa li e li monkalo yi li nawa pwaana omalimbililo ga sha sigo pethimnbo i ikutha omwenyo.

Ashike nando ongaaka oya popi kutya molwashoka omutima gwamukweni okalongo ki ili, inaya nongela shoka sha li momadhiladhilo ge.

“Otashi uvitha nayi. Ongaakwanezimo, okwa li tushi pamwe ngashingeyi okuli nawa molwashoka okwa li a zi mokalungu kombinga yethindakano lyopamadhiladhilo, nokwa li tatu kambadhala oku mu kwathela,” osho a popi ngaaka.

Okwa popi kutya Niita ina kala ta mono eyambidhidho ndyoka a pumbwa, naashoka osho unene she eta ethindakano lye lyopamadhiladhilo.

“Nonande okwa li a pumbwa ekwatho lela, ineli mona. Okwa li a mono ekwatho miinima yilwe monkalamwenyo ye, ashike okukala ke ena iilonga noshimaliwa, osha kala eshongo enene kuye opo i isile oshimpwiyu opamwe naanona ye yaamati yaali,” osho a yelitha ngaaka.

Okwa popi kutya Niita okwa kala owala ta hupu moshimaliwa shopenzela sha yina, molwashoka okwa penzelwa.

EKWATHO OKUZA KUHE

Konima shu uvu ehokololo ndyoka, Nujoma okwa lombwele onzonkundaneki ndjika uunambo kutya okwa longa mpoka ta vulu opo a shilipaleke kutya omwanakadhona okuli monkalo ombwanawa, nokwa popi kutya mboka taya popi kutya inemu kwarthela kaye na uushili.

“Onda kambadhala mpoka tandi vulu oku mu yambidhidha pakuudha. Onda kala tandi mu futile osikola, osho wo okufutila oyana osikola nosigo oompaka ohandi shi ningi,” osho a popi ngaaka.

Nujoma okwa gwedha po kutya onkalo yaNiita kayi shi ompe, nokwa kala e na uupyakadhi woshintona okuza kuunona.

“Muule woomvula odhindji, okwa kala he ehama. Onde mu ningla oshimaliwa okuza kombaanga yandje. Onde mu yambidhidha mosikola, ashike osikola ineyi mana omolwonkalo ye,” osho a popi ngaaka.