… Swapo okwa ti okwa hafela oidjemo
Ongudu yoAffirmative Repositioning (AR) noLandless People’s Movement (LPM) oda tokola opo diha waimine eengudu dikwao domilameno odo da hala okufutifa okomisi yomahoololo yaNamibia yedina ElectrolCommission of Namibia (ECN) molwomahoololo opashiwana oo a nyika oipa yombwa.
Eengudu dihapu domilameno Oshoondaxa okwa li da waimina ongudu yoIndependent Patriots for Change (IPC) moshikumungu shayo shokukondjifa nghee omahoololo oupelesidente nomutumba wopashiwana omudo 2024 a ningwa.
Oshinima eshi oshe ye akonima ongudu yoIPC ya shangela omukanda kokomisi yomahoololo i lombwele okomisi kutya ongudud poi na ehalo lokutwala endilo lomeendelelo komhangu ya shiya ko opo i kondjife omukalo oo wa ningwa nao omahoololo.
Eyomumwe leengudu domilameno olakwatela mo ongudu yoIPC, Popular Democratic Movement, Namibia Economic Freedom Fighters, Republican Party noSwanu of Nambia
Omuleli woAR Job Amupanda koshoongalele shoikundaneki mOvenduka Omaandaxa okwa ti oAR oya tokola okutala vali koinima imwe kombinga yeenghatu da landula ko.
Okwa ti oAR itaia ka wainima nande eengududdikwao omanga inai ninga omakonakono ayela..
“Fyee ehangano le litula m osha fimana opo u kundafane ndee tokonakona ndee to kufa onghatu omanga ino ya ndee to ka shakeneka ovanhu vokondje. Paife ohatu i nee ngaheleipi keengudu dimwe dopolitika inatu ninga omakonakono ayela kombinga yomahoololo?
“Oshinima shotete sha fimana kufye okuundako ndee hatu tale kutya ohau ningi ngahelipi. Inashi fimana naana kufye tu waimine eengudu dikwao dopolitika,” Amupanda osho a ti ngaho.
Ashike nande ongahao, Amupanda okwa popya kutya omahoololo kakwa li a manguluka nokakwa li e li pauyelele. Okwa ti kutya eshi okomisi yomahoololo ya itavela “omapuko opaunhu” momahoololo Etitau ndee tai pitike omaiku a wedwa po okuhoolola, osha holola kutya omahoololo kakwa li a manguluka oo kakwa lie li pauyuki.
Ongudu yoLPM Omaandaxa oya koleka kutya itai ka kufa omilandu dayo vene dokukondjifa okomisi yomahoololo.
“Paife ngaha, oLPM oya kala meenghundafana neengudu domilameno notwa tokola tu kufe ondjila ya yooloka kashoa,” Omupopiliko Lifalaza Simataa osho a ti ngaho.
Omuleli wongudud yoLPM Bernadus Swartbooi Olomakaya okwa ti ovahala manga oindjemo yomahoololo i dje mo omanga inava kufa “onghatu iwa yopaveta”.
Simataa Omaandaxa okwa ti ongudud yoLPM otai ningi manga omapulaapulo novakalelipo vopaveta vavo opo va tunge po oshibofa.
“Ohatu kendabala okumona ouyelele, shaashi ngee okufininika ovahoololi, otwa pumbwa okumona omwaalu.
Osho otashi dulu okweeta oshibofa.”
Simataa okwa ti oLPM otai ninga omapulaapulo ahapu opo i mone kutya otai tula mo sohibofa shi li ngaheleipi.
“Ohatu tale koinima ihapu oyo hatu dulu okukendabala ndee hatu mono kutya omukalo u lipipo hatu dulu okuya no komesho opo tu kwashilipaleke kutya oshinima eshi osha wapalekwa.
Otwa mangulukila eemhiti dihapu dopaveta,” Osho a ti ngaho.
Hamushandjai woIPC Christine Aochamus okwa ti ongudu oya teelela oidjemo ya xuuninwa idje mo omanga inai twala okomisi yomahoololo komhangu kombinga yaaho tashi tongwa kutya omahoololo opashiwana kaa li pauyuki.
“Ito dulu ashike okutwala ovanhu komhangu diva ngaho, ou na okukondjifa oindjemo. Otwa teelela eshiivifo lopambelewa loindjemo aishe,” Aochamus osho a ti ngaho omanga kwa li ta popi koDesert FM Omaandaxa.
Omundjadjukununi woikwapolitika Rui Tyitende okwa itavela kutya ekwatafano lihe li nawa pokati koAR,LPM noIPC ola dja keteke po lehengumukilo mumwe lokelelodoolopa laVenduka.
AR okwa li a yambidida IPC momahoololo omudo 2019 ndee eengudu edi mbali, pamwe noLPM, tadi fikama pamwe mehengumukilo mumwe lelelodoolopa naVenduka omanga inali teka po.
“Omunhu ota dulu kutya molwoshinima osho sha ningilwe po melelodoolopa, eengudud kadi wete ngee otadi dulu ngaa okuya kumwe paife,” Osho a ti ngaho Omaandaxa.
Okwa pula kombinga yetopoko nouwa waau tau ke ya tete.
“Oyou weengudud dopolitika ile owovahoololi ava va hala okumona elunduluko? Oshike mu na okutopokela?”
Tyitende okwa ti ngee eengudu adishe nhatu odi wete da udifwa nai komukalo womahoololo opashiwana, kashi li nawa papolitika opo keshe ongudu i kufe onghatu ya yooloka.
“Aveshe ova handukifwa komukalo oo ve wete uhe li pauyuki, omolwashike ve na okutopoka?
“Keshe umwe ota ka kala nahahende waye? Otashi kala shiwa kuvo ngee ova longo oshimaliwa ndee tave shi tula kumwe. Okutopoka itaku vatele sha,” Osho a denga omufindo ngaho.
SWAPO OKWA HAFELA OMAHOOLOLO
Hamushangandjai wevava lovanyasha loSwapo Ephraim Nekongo okwa ti evava lovanyasha loSwapo ola hafela omukalo womahoololo fiyo opapa.
“Nnade opu na omapopyo okuvaka omahoololo, otushi shi kutya opo twa li peenhele adishe dokuhoololela ndee hatu tale nghee tashi ende,” Osho a ti ngaho.
Nekongo okwa yeleka kutya Swapo naye okwa li a udifwa nai shifeke pamwe kombinga yeembapila inadi wana peenhele dimwe dokuhoololela pefombo lomahoololo Etitau la dja ko.
“Ovanhu vamwe ova ka sholola molwokuteelela eembapila domahoololo efimbo lile, vamwe ova teelela fiyo eembapila otadi ya,” Osho a ti ngaho.
Okwa ti omukalo wokomisi yomahoololo owa enda kashona nowa handukifa Swapo ngaashi ashike wa handukifa eengudu dikwao.
“Ashike nee, okomisi yomahoololo oya kandula po oshinima eshi nokuwedela omafiku omahoololo ndee tai pitike ovanhu vahapu va hoolole,” Osho a ti ngaho.
Nekongo okwa ti, eengudu domilameno edida handuka notadi ti omahoololo okwa vakwa nava twale oshokumungueshi komhangu, shama ashike ve na oumbangi.
“Ino popyaapopya, ongele oumbangi woye ndee to i komhangu,” Osho a ti ngaho.
Okwa londoda eengudu domilameno dod tadi lundile Swapo kutya okwa vaka omahoololo opo di xulife po okuninga oshinima shi li ngaho.
“Tu ulikila kutya otwa vaka omahoololo ngahelipi. Onda hala okulondoda oIPC kutya ngee ova twikile nokukakeka edina loSwapo nokutya otwa vaka omahoololo, otashi dulika tu fininikwe tu kufe onghatu yopaveta konima,” Osho a wwda po ngaho.
Omuhongi woveta yekotamhango John Nakuta Omaandaxa okwa li a longifa okatukulwa 115 kokatendo komahoololo.
“Oka ti keshe epuko la holoka momahoololo omhangu itai ti ashike omahoololo naa kupulweshi.
“Omhangu nai kaleya yelelwa nawa kutya omapuko nokuhe li ufa keemhango odo di li mokatendo komahoololo okwa li a wana okunyanauna omahoololo,” Osho a ti ngaho.
“Ovo va hala okkondjifa oidjemo yomahoololo ove na okwoongela oumbangi wawana opop va udoife ko kutya osho sha ningwa Etitau okwa li sha mana mo unene nosha kuma neenghono oindjemo yomahoololo.
“Opo nee omahoololo taa kalekwa,” Osho a ti ngaho.
Shimwe vali, oshinima oshitivali shopaveta otashi ungaunga napelesidente Nangolo Mbumba eshi a wedela omafiku omahoololo.
“Ovo va hla okukondjifa oshinima eshi otashi dulika ve li pondodo iwa yokushipondola kombinga yokukondjifa ewedelo eli,” Nakuta osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
