Ongudu yoIPC otai ti Mbumba ita dulu okuwedela omafiku omahoololo

ONGUDU yoIndependent Patriots for Change (IPC) otai ti kutya eweledelo lapelesidente Nangolo Mbumba lomafiku omahoololo aNamibia oupelesidente nomutumba wopashiwana oivike ivali ya pita kala li paveta.

Mbumba natango kakwa li e na okutokola kutya opeenhele dilipi dokuhoololela omahoololo aa taa ningilwa, hamushangandjai wongudu yoIPC Christine !Auchamus osho a ti ngaho momukandaano wa yandjwa komhangu yomahoololo Omaandaxa.

Omukanda ou li ombinga yomikanda odo da yandjwa komhangu meindilo longudu yoIPC opo i pewe oufemba wokutala oilongifo imwe yomahoololo oyo ongudu ya hala okukonakona opo i tokole ngee otai twikile nonghatu yopaveta i li ominge nomukalo oo omahoololo kwa li a ningwa.

Ongudu otai pula omhangu yomahoololo, oyo i li ombinga yomhangu yopombada opo i pitike va patulule nokukonakona oinima oyo ya longifwa momahoololo omutumba wopashiwana oivike ivali ya pita, ile i pitike okomisi yomahoololo yaNamibia i yandje omhito kongudu opo i tale oinima oyo ya longifwa momahoololo.

Ongudu yoIPC oya hala okumona ouyelele kombinga yomwaalu wovahoololi ovo va hoolola momutumba wopashiwana keshe ponhele yomahoololo, nomwaalu aushe weembapila odo da ekelwashi keshe ponhele opo kwa li tapu hoololelwa, omwaalu womawi oo a nyanauka nosho yo omwaalu womawi oo a valulwa keshe ponhele opo kwa li tapa hoololelwa.

Momukandaano, !Auchamus okwa ti: “Okwa li lela pu na omapuko a holoka momahoololo. Ongudu yoIPC natango otai kongo ouyelele opo i dule okumona kutya omaupyakadi oo a holoka momahoololo okwa kuma omahoololo shi fike peni.

Oo oufemba wayo. Otashi pitike yoo vali IPC opo a mone ngee ota twikile noihokolola i na sha noushili womahoololo.”

!Auchamus okwa ti oshinima osho sha ningwa kuMbumba shokuwedela omafiku omahoololo, omanga kwa li ashike e na okuningwa momafiku 27 Novemba, kakwa li shi li paveta.

Mbumba okwa wedela omahoololo okudja potundi 21h00 momafiku 27 Novemba fiyo omomafiku 30 Novemba moshinima osho kwa li sha nyanyangidwa momafiku 28 Novemba, osho sha wedela okuhoolola momafiku 29 fiyo 30 Novemba.
Pelsidente natango okwa li a shiivifa kutya okuhoolola okwa wedelwa ashike peenhele dimwe moshitopolwahoololo shaKunene, Oshana nOshikoto noponhele imwe mOvenduka.

Okatendo komahoololo otaka ti, eenhele dokuhoololela ohadi kongwa kokomisi yomahoololo, ndee omukulunhu womahoololo wokomisi yomahoololo ta nyanyangida ouyelele kombinga yeenhele dokuhoololela konima da monika, !Auchamus osho a ti ngaho.

Eenhele dokuhoololela opo omahoololo kwa li a wedelwa kakwa li da totwa ile da nyanyangidwa kokomisi yomahoololo ngaashi okatendo komahoololo taka ti, !Auchamus osho a ti ngaho.

Natango okwa nyenyeta momukandaano waye kutya Mbumba kakwa li a ninga omafiku oo kwa li a wedelwa komahoololo oyoondaxa yopashiwana naashi osha imba ovahoololi vamwe oufemba wokuhoolola.

“Okuninga Oshoondaxa shopashiwana nelalakano lomahoololo nashi kale oshinima sha ningilwa ovanhu opo va wanife po oufemba wavo wopakotamhango wokuhoolola,” !Auchamus osho a ti ngaho.

Natango momukandaano waye okwa ti vali: “Osha sha moNamibia kutya opu na omanyenyeto kombinga yomukalo oo wa ningwa nawo omahoololo a xuuninwa oupelesidente nomutumba wopashiwana.

Omwaalu uhe shiivike wovanhu inau dula okuhoolola momafiku 27 Novemba, ndee eshi kwa li a undulilwa komesho kakwa li kwa yandjwa Oshoondaxa shepangelo.”

Okatendo oka ti eenhele dokuhoololela di ninge omafiku ehe li koshi yo15 ile inaa koya omafiku 20 konima da shiivifwa pambelewa.

!Auchamus okwa ti kutya etokolo laMbumba lokulundulula omafiku opetameko momafiku 28 Novemba, okuwedela okuhoolola okudja potundi 21h00 fiyo okomafiku 30 Novemba, kakwa li paveta.

Eenhele dokuhoololela oda idila potundi 21h00 momafiku 27 Novemba, ndee omahoololo itaa dulu okukawedelwa mefiku la landula.
Eindilo longudu yoIPC okwa teelelika li ka pwilikinwe momhangu yomahoololo mEtitano.

Okomisi yomahoololo okwa li ya shiivifa oshivike sha dja ko kutya ongudu yoIPC oya findana oipundi i li 20 momutumba wopashiwana oivike ivali ya pita, osho tashi ningi ongudu ei i kale ongudu yomilameno yopambelewa momutumba.

Swapo okwa findana oipundi i li 51 yomoipundi 96 momutumba wopashiwana – oipundi oyo ya shuna pedu noipundi i li 12 okuyelakanifa noipundi oyo ongudu tai pangele kwa li ya findana momahoololo omudo 2019.