ONGUDU yoIndependent Patriots for Change (IPC) otai kondjifa okomisi yomahoololo yaNamibia e shi vati ya danena eembapila domahoololo.
Hamushanga woIPC Christine !Auchamus okwa ti momukanda oo a shangela koECN Etivali kutya okwa li va lombwelwa kutya ovanambelewa voECN vomahoololo vamwe otava pula ovanhu ovo kwa li va kalela po ongudu yoIPC peenhele opo kwa li tapa hoololelwa opo ve ke lilopote keenhele dokupungula dokomisi yomahoololo ile kopolifi.
“Otwa mona eelopota okudja kovanhu voIPC ovo kwa li va kalela po ongudu peenhele opo kwa li tapa hoololelwa koitopolwahoololo ya yooloka moshilongo kutya otava ifanwa kovanambelewa vomahoololo voECN opo va ye keenhele dokupungula daECN ile koitaashi yopolifi shi na sha nokupatululula oipakete yeembapila domahoololo,” !Auchamus osho a ti ngaho.
Meindilo olo la yandjwa komhangu yomahoololo yaNamibia Omaandaxa, ongudu yoIPC otai kongo epitikilo opo i pewe nokukonakona oinima oyo ya longifwa pomahoololo i na sha nomahoololo omutumba wopashiwana momafiku 27 Novemba fiyo omafiku 30 Novemba.
Ongudu otaia ti kutya opu na oinima imwe ya puka mokuwedela omafiku omahoololo nomokuvalula omawi.
Omupopiliko wokomisi yomahoololo yaNamibia De Wet Siluka okwa koleka kutya okwa mona omukanda oo.
“Otwa mona omukanda ashike oashinima osho twe lipayakidila nasho nohatu ka aluka nenyamukulo,” Siluka osho a ti ngaho.
Omupopiliko wongudu yoIPC Imms Nashinge Etitatu okwa ti efimbo olo tali kufwa koECN konima ongudu ya pula okutalulula oinima yomahoololo otali nyikwaanyikwa.
“Konima ashike IPC neengudud dimwe dopolitika da pula omhangu i yandje ile di talulule eembapila domahoololo ongondodo yotete yongahtu yetu yopaveta, mominute ashike mbali ovanambelewa vopeenhele dokuhoololela otava ifanwa nale ve uye,” Osho a ti ngaho.
Nashinge okwa pula kutya oshinima eshi osha yela ngahelipi nokwa pula kutya ongudu otai shiva nagahelipi kutya omapakete eembapila domahoololo inaa danenwa.
“Omolwashike ECN tai fana ovakalelipo va lilopote keemungulilo davo ile koitaashi yopolifi shi na sha nokupatulula oipakete yeembapila domahoololo? Omukalo wokudanena oipakete shaashi pu na oshibofa shi li ominge noECN ou?” Osho a pula ngaho.
Ongudu yoIPC oya ti oi na omadina neenomola deengodi dovanambelewa ovo va kwatelwa moshinima omu.
“Ondi li yoo apa natango nda manguluka okumulombwela kutya otu na omadina neenomola deengodi dovanambelewa ovo va kala tava denge eengodi edi novakoleka oukwashili we lifa,” !Auchamus osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
