Ewilikongudu longudu yoNational Unity Democratic Organisation (Nudo) ola taalela omafeekelo okulongifa nai oshimaliwa shi fike peemiliyona N$16 osho kwa li ongudu ya mona okudja kopaliamente.
Omapopyo aa okwa li a ningwa mexuliloshivike komuwiliki oo ta ningi eekambaina Rirua Komeheke, te di ningile hamushangandjai mukulu wehangano lokatanga kokeemadi Barry Rukoro, oo a hala okuya momafiyafano oupelesidente wongudu.
Komeheke okwa ti opwa kala pu na ounghudi wokulongifa oshimaliwa nawa oule weedula nhano.
“Kapu na oumbangi ile osho tashi ulike kutya oshimaliwa okwa li sha longifwa shike. Ongudu kai na oshimaliwa sha shaala po shi dule okulongifwa moikumungu yongudu ngaashi okulongekida oshoongalele,” Osho a ti ngaho. Okwa ti nande oNudo oi na eelopota doshimaliwa , okwa ti kakwa li da kolekwa keumbo etivali lopashiwana.
Hamushangandjai woNudo Joseph Kauandenge okwa ekelashi omapopyo aa, ta ti omambo ongudu ohaa ningilwa omavalulo keshe odula komahango e shiivike nawa.
“Moule weedula nhano otwa kala nokuyandja eelopota detu doshimaliwa kokomisi yomahoololo yedina Electoral Commmission of Namibia ndee osho otwa kala nokushininga keshe odula. Kapu na oshimaliwa sha kana, oyo oipupulu itokatoo. Ngee otwa kala hatu longifa nai oimaliwa yoshiwana, oshike nee itatu kufwa mo meengudu dopolitika koECN ngaashi ye shi ningila eengudu dikwao?”
Kauandenge okwa ti omapopyo aa keena oukwashili nomatomeno.
“Katu na osho hatu tila, omambo etu nomishangwa detu oda yeuluka.”
OSHOONGALELE OSHA UNDULILWA KOMESHO
Mexuliloshivike, pelesidente woNudo Esther Muinjangue okwa li a undulila oshoongalele shongudu komesho sha landula oshoongalele shomeendelelo shokomisi yovakulunhuwiliki yopashiwana.
“Edopo lelelo longudu lokuninga oshoongalele ola ulika puhe na omalimbililo kutya Nudo okwa pumbwa elunduluko melelo,” Rukoro osho a ti ngaho, oo ta lundile Muinjangue kutya ota danene ekotamhango loNudo.
“Osha fimana okudidilika kutya pakotamhango nongee kapu na oshoongalele shoshiwana, onguduwiliki yopashiwana oi li olutu lakula lokuninga omatokolo ongudu ndee omatokolo alo itaa dulu okushunifwa monima kutya nee okokomisi yovakulunhuwiliki yopashiwana ile komatokolo apelesidente,” Osho a ti ngaho.
OVA KWATWA KO KOSWAPO
Rukoro okwa ti vali oilyo imwe yongudu oya kwatwa ko koSwapo.
“Ohatu shi popi sha yela kutya ehalo lavo okwa li okukala inaku ningwa oshoongalele shopashiwa, ongudu oyo osha yela kutya oya kwatwa ko koilyo imwe yoSwapo yomoshiwana shetu.”
Hamushangandjai woSwapo Sophia Shaningwa okwa ti ongudu ihai kwata ko ovanhu, ohai longele ovanhu.
“Swapo ota longo noudiinini ndee ngee ovanhu otava waimine Swapo, ove wete ouyelele,” Osho a ti ngaho.
NAVA DOPE KUVOOVENE
Omupedu hamushangandjai woSwapo Uahekua Herunga okwa ti oNudo kai na eshi tai pe Ovanamibia.
“Onda dopa okuuda ko ekwatafano pokati koNudo noSwapo, okudja naini? Veefeni va dope kuvoovene ndee tamu efa Swapo,” Herunga osho a ti ngaho.
Omukonakoni woikwapolitika Kae Matundu-Tjiparuro okwa denga omufindo pomumbwe yokuyandja oumbangi wa wana kombinga yomapopyo okuwilikwa.
“Onghee nee ohandi pula epulo, ngee oNudo ya kwatwa ko ile oohandimwe va kwatwa ko, nashike naana tashi holola oumbangi moshinima osho?
“Eeno, omunhu ito dulu okupatana kutya otashi dulika pu na ovanhu vamwe moNudo va kwatwa ko, oshiholelwa, kuSwapo.” Matundu-Tjiparuro okwa ti omapopyo kombinga yokukwatwa ko papolitika naa kale e na oumbangi wakola ponhele yomafeekelo.
Okwa ti vali omunhu okwa pumbwa okukala a kotoka kombinga yokutya omahoololo opaumwene opapolitika okuna sha nongudu aishe.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
