NAMIBIA okwa mana omahoololo aye oupelesidente nomutumba woapshiwana ashike nande ongaho oidjemo oya eta omaupyakadi nomanyeme kuvamwe, ongudu yovanapaliamnete vape nosho yo oinima imwe tai kumwifa.
Eengudu dimwe odao inadi ninga nawa nandenande ongaashi ongudu yoPopular Democratic Movement (PDM) tai kwatelwa komesho kuMcHenry Venaani, oyo ya kanifa oipundi i li 11 nosho yo ouwa wokukala ongudu yomilameno yopambelewa.
Natango, ongudu yoRally for Democracy and Progress (RDP) nadikwao dimwe itadi ka alukila ko nande kopaliamente. Venaani otaa aluka noilyo ashike i li inhe, omanga ongudu tai pangele ya kanifa oipundi i li 12.
Oshinima eshi otashi pula opo eeminista di li omuwoi diha alukile kopaliamente.
Mwa kwatelwa ominista yoikwanghono Tom Alweendo, minista wehongo lopombada Itah Kandji-Murangi, minista womakwatafano opaiwana nomalongelokumwe Peya Mushelenga, minista wetanga leameno noipambele yoonakulwa vakulu Frans Kapofi, minista woipambele yomombelewa yapelesidente Christine //Hoabes, omukulunhuwiliki wokomisi yokuninga omafaneko epangelo Obeth Kandjoze, minista yoipambele yoilonga Utoni Nujoma, minista womayambulepo eedoolopa noitopolwa yokomikunda Erastu Utoni nosho yo minista wehongo, omaunghulungu nomifyuululwakalo Anna Nghipondoka.
Omundjadjukununi woikwapolitika Henning Melber okwa ti oshinima eshi otashi ulike kutya ovahoololi ova hala elunduluko, nande Swapo natango okwa mona omawi ahapu koitopolwa yokonooli yoshilongo.
“Oidjemo yomahoololo, nande otai nyenyetwa, oya holola kutya ovahoololi ova shendja omukalondjiikilile.
Ounona vape moshinima omu ova ninga elunduluko nande hanaana moitopolwa omo oSwapo shi na eenghono, omanga ongudu yomilameno yopambelewa ikulu nayo ya pingenwa po kongudu ipe,” Osho a ti ngaho.
Oshinima eshi oshe ya eshi eengudu dikulu domilameno, ngaashi oPDM, ya kanifa oipundi neenghono okudja poipundi i li 16 yeya poipundi i li 5 mopaliamnete neengudu dishona ngaashi Economic Freedom Fighters (NEFF), National Unity Democratic Oraganisation (Nudo), All People’s Party (APP), noRepublican Party (RP) of Namibia da mona mo ashike oshipundi shimwe keshe imwe paife.
Ongudu yo Christian Democratic Voice Party oya dopa okumona oshipundi mopaliamente.
“Ongudu yoPDM oya hanga efimbo layo laxuuninwa, omanga Swapo a pumbwa okutala nawa shaashi okwa li e li popepi nokuningilwa eshi sha ningilwa oANC. Opolitika oya yuka pondodo ya yooloka.
Eshi shi hokwifa, ongudu yoAR oya ninga nawa, Job Amupanda ina dopa.
“Ashike Itula okwa longa nawa e dule IPC. Eshi osha hala kutya ovahoololi ova hala elunduluko liwa pakufindana ndee kashi shi ashike pakulambalala eengudu neekandidate doupelesidnte.
Eshi osha ningwa yo nokuNetumbo Nandi-Ndaitwah oo amona eyambidido e dule ongudu,” Melber osho a ti ngaho.
Oidjemo oya kondjifwa lela, noIPC tai kewatele eengudu komesho tadi lalakanene okukondjifa oidjemo momhangu.
“Ashishe paife oshe likolelela kutya omhangu otai ti ngahelipi. Opu na omatomeno ahapu okuteelela ndee hatu tale,” Melber osho a ti ngaho.
OVAFINDANI VAKULA
Ongudu yoIPC noAR odo ovafindani vakula momahoololo odula ei, da mona oipundi i li 20 naihamano.
Efindanao e li okwa teelelika li ka ete eemata dipe, tadi ke lipakifa mo ongudu tai pangele.
Ongudu yoLandless People’s Movement (LPM), oye shi pondola okumona oshipundi shimwe sh wedwa po, osho sha eta i kale i na oipundi i li 5.
Ongudu yoNational Democratica Party (NDP), tai kwatelwa komesho kumartin Lukato nongudu yoBody of Christ Party, tai kwatelwa komesho kuFestus Thomas, nado otadi i kopaliamente keshe imwe noshipundi shimwe.
‘ITASHI TU KUMWE’
Nande ongaho, ongudu yoNEFF Etitatu itashi shiva ongudu i mone ashike oshipundi shimwe mopaliamente.
Ongudu oyo paife i na oipundi ivali mopaliamente, oya kanifa oshipundi shimwe, oidjemo yomahoololo oupelesidente nomutumba wopashiwa osho ya ulika ngaho. “Itashi shiva tu mone ashike oshipundi shimwe,” Pelesidente woNEFF Epafras Mukwilongo osho a ti ngaho Etitatu.
Okwa ti ongudu otai yambidida oIPC mokukatuka onghatu yopaveta i li ominge noidjemo yomahoololo.
“Itatu shi tambula ko. Otu li pamwe neengudu dikwao mokukondjifa oshinima eshi,” Mukwilongo osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
