Ongudu yoZanu-PF oya fa tai lidopo moinima yoilongo yopoushiinda

. . . Ian Khama okwa ti ngee oshili oSADC nai tulile mo Zimbabwe eendjidikila

Pelesidente mukulu waBotswana Ian Khama okwa pula opo Zimbabwe a tulilwe mo eendjidikila ngee ongudu tai pangele okwa kolekwa kutya otai lidopo momahoololo oilongo yopoushiinda.

Eendjidikila edi tadi pulwa di tulilwe mo ongudu yoZimbabwe African National Union – Patriotic Front (Zanu-PF) nadi kwatele mo okukufwa mo mehangano lomayambule po oilongo yokoumbuwanhu yaAfrica li shiivike nawa nedina Southern African Development Community (SADC), sho a ti ngaho.

Khama ou umwe womwaavo ve kwetele oshinima eshi shi li ominge nomukalo wongudu vati wokulidopa moinima yoilongo yopoushiinda.

“Ngee osha kolekwa, napa kale pu na elondodo la nyika oshiponga leendjidikila nosho yo okutewa mo,” Khama osho a lombwela oThe Namibian ngaho Etitatu.

Momukokomoko wodula, ongudu yoZanu-PF oya kala nokulundilwa kutya otai lidopo momahoololo aBotswana, Namibia naMozambique.

Oshinima eshi osha hololwa kokuhena ombili kwoshiwana kombinga yeenamanana domahoololo omwedi wa dja ko.

Opwa kala yoo vali pu na omapopyo kutya ongudu yoZanu-PF okwa li i na mo olunyala momahoololo aBotswana nosho yo aSouth Africa.

Pelesidente mukulu okwa denga omufindo komumbwe youmbangi wa yela woZanu-PF tai lodopo moinima yoilongo yopoushiinda omanga inaku katukwa eenghatu.

Khama okwa tofa mo oinima ihapu oyo tai ulike exwaxwameko loZanu-PF momulandu womahoololo aBotswana.

Okwa ti eshi osha kwatela mo okomisi yomahoololo yedina Independent Electoral Commission (IEC) ya kufa etalelepo la yuka kokomisi yomahoololo yaZimbabwe.

“Omalweendo a keshe fiku omahangano etu omayakulo a fimana a yuka koZimbabwe eshi sha yuka pomahoololo, onghendabala yaMokgweetsi Masisi yokweefa ovakwashiwana vaZimbabwe va kale tave uya moBotswana vehe na omikanda, nosho yo etumwalaka lopashiwana olo la ningwa kupelesidente (Emmerson Mnangagwa) koshoongalele shoZanu-PF ta udaneke eyambidido laye longudu yoBotswana Democratic Party (BDP). . ,” Khama osho a ti ngaho.

Okwa ti vali vati ovakwashiwana vamwe vaZimbabwe okwa li va longifwa okuhoolola ongudu yoBDP.

“Onda teelela oilongo yoSADC opo i liufe nawa keemhangano dayo domahoololo nosho yo kekotamhango nosho yo komilandu doSADC dokuninga omahoololo a manguluka noku li pauyuki, oo, ngaashi tu shi shi, taa teywa koilyo imwe yomapangelo,” Khama osho a ti ngaho.

Nande oZanu-PF oye likala omapopyo aa, oshinima eshi natango osha landula ashike ongudu oyo ya kala nokuteya oufemba wovanhu.

Ovaleli vahapu vopapolitika nosho yo omahangano omaufemba ovanhu moSADC aishe ova kala nokupopya kombinga yongudu yaMnangagwa kutya otai vatele eengudu dikwao demanguluko opo di kale tadi pangele.

Zanu-PF, oyo i na ekwatafano lakola nongudu tai pangele yaNamibia, Swapo, oya kala nokuhayandja ombili eshi tai vatele eengudu dikwao dopapolitika moSADC.

Oshiholelwa, hamushangandjai woZanu-PF Obert Mpofu otaku tiwa okwa ya koNamibia oshivike shinya sha dile ko – eshi ku na ashike oshivike shimwe omanga omahoololo oupelesidente nomutumba wopashiwana aNamibia inaa ningwa.

Ongudu yoSouth Africa’ Democratic Alliance (DA) oya ti oZanu-PF nai kelelwe i kale kokule nomahoololo omudo 2024.

“Eshivo loANC la yuka koZanu-PF, tali va pula ve uye va kufe ombinga meepolohalama doikonga yomahoololo avo otashi ulike okulidopa mo kwopapolitika momahoololo etu.

“Zanu-PF okwa danena omahoololo aZimbabwe oikando ihapu. Itave shi ningi mo omu moSouth Africa,” Ongudu osho ya ti ngaho.
Komufala womakwatafano opaiwana wongudu yoEconomic Freedom Fighters (EFF) Godrich Gardee okwa ti omahangano emanguluko ngaashi oAfrican National Congress (ANC) oye lihonga koZanu-PF.

“Dimbulukwa, Zanu-PF noANC ovongudu imwe aike. Onghee nee, Zanu-PF ina pumbwa a kale ngeno e li moSouth Africa palutu.

“Ohava lombwele ashike ookaume kavo omu nghee ve na okuvaka omahoololo ndee ovanhu ovo ve li ovanambelewa voIEC luhapu ove na ekwatafano noANC,” Osho a ti ngaho.

NAMIBIA
Moule weedula Swapo okwa kala nokunghonopeka ekwatafano laye nongudu yoZanu-PF, nande opu na omalimbililo kutya ongudu oyo inai fimaneke oufemba wovanhu.

Eemiliyona di li lwopoN$247 okwa li da vakwa mombaanga yaNamibia yoSME kovanhu vamwe ve na ekwatafano nelelo loZanu-PF, ngaashi omunambaanga wopaumwene wapelesidente mukulu Robert Mugabe nosho yo omushingidila waye.

MuDesemba odula ya dja ko, omushamane womupedu pelesidente Netumbo Nandi-Ndaitwah, Denga, okwa li a ya koZimbabwe, eshi kwa li va ya kohango yomupedu pelesidente waZimbabwe Constantino Chiwenga.

Denga okwa li oshinghumbi shakula shaChiwenga.

Chiwenga, komufalandjai wetanga leamneo mukulu oku shiivike nawa eshi a kufa pelesidente Mugabe koshipundi.

MuJuli odula ei, hamushangadjai woSwapo Sophia Shaningwa okwa li a ya koZimbabwe ndee ta shakene naMnangagwa, oo e shiivike nawa nedina ‘The Crocodile’.

MuSeptemba oThe Namibian okwa li ya lopota kutya omonamati waMnangwagwa okwa yandja omaano oshimaliwa koSwapo.

Omaano aa okwa li omeemiliyona di li N$2.5 da yandjwa kovakwashiwana vaZimbabwe vanhe.

Omwedi wa dja ko, etokolo lokomisi yomahoololo yaNamibia lokuyandja otendela yokuninga eembapila domahoololo komunangeshefa e li popepi naMnangwagwa ola eta ngaa omalipulo ahapu moshiwana.

MOZAMBIQUE
Oshifokundaneki shaZimbabwe shedina The Mirror okwa li sha lopota kutya ovakwashiwana vaZimbabwe vamwe okwa li va hoolola ongudu tai pangele yaMozambiue Frelimo momahoololo omwedi wa dja ko.

Konima ouyelele oo eshi wa nyanyangidwa, hamushangadjai woministili yomauyelele yaZimbabwe Nick Mangwana okwa li vati a yandja elondo koThe Mirror, ta ti kutya oshikundaneki eshi otashi ka taalela diva oilanduli yokulopota kwasho.

Omupopiliko woZanu-PF Chris Mutsvangwa Etine okwa ti omapopyo oo kee li mondjila.

Omundjadjukununi woikwapolitika Henning Melber okwa ti eyambidido loZanu-PF loSwapo nali talwe nawa.