Aakalimo yomoshitopolwa shaZambezi mboka ya mbombolokele popepi nomulonga gwaChobe, metonatelwahala lyedhina Kabulabula, okwiilikolela onyama yoshali yoonyati ndhoka kwa kundanekwa dhasi ondumba omasiku ga zi ko, oya popi kutya kaye na konasha ngele odhi na omukithi gwombulwa.
Oonyati 117 otaku hokololwa dha si omeya momulonga gwaChobe momasiku 27 Kotoba sho taku hokololwa kutya okwa li dha tidhwa koonkoshi okuza kombinga yaBotswana.
Sho oshigwana shu uvu onkundana ndjoka, aakalimo oyendji oya mbombolokele komulonga, nokuli yamwe oya hingi ookilometa dha konda po90 okuza ngaashi koKatima Mulilo nokomikunda dhopopepi okushilipaleka kutya oyi imonena omweelelo.
Etokolo olya ningwa opo oonyati 67 dhi gandjwe po kaakalimo yometonatelwahala, omanga oonyati 50 odha gandjwa po kaakwashigwana. Ashike nando ongaaka iinamwenyo mbyoka inayi ningilwa omakonakono ku kolekwe ngele kayi na omikithi omanga inaaku ningwa etokolo yi liwe.
Aakwashigwana yamwe mboka ya yi moonkundanathana nonzonkundaneki ndjika uunambo, oya popi kutya itaya ipula nande ngele iiyamakuti mbyoka oyi na omikithi uunene tuu ngoka gwombulwa, molwashoka onyama ndjoka oyoshali.
“Onyama ndjoka yonyati otu yi hole noonkondo, ishewe ohayi kala ya pumba. Ashike nando ongaaka, otuyi hole shi vulithe yongombe. Okumona onyama ndjoka otweshi tala ko ongomayambeko twa tuminwa kuKalunga gomwedhi gwaNovemba. Katu na naanaa konashana ngele odhi na omukithi gwombulwa, ashike nando ngaaka ihayi ningi sha ngele oya tekelwa nawa lela. Oonyama dhi na omukithi ngoka otwe dhi lya lwiikando oyindji ashike inadhi tu ninga sha,” osho Miyano Liswaniso a popi ngaaka.
Omukalimo Nicolas Chaka okwa popi kutya okwa putuka haya li onyama yonyati pethimbo lyiituthi yopamuthigululwakalo, onkene oku yi mona oshali pethimbo ndika oshinima sha pumba nolundji ohaya kala ye shi hala.
“Ondihole omulyo gwayo okuyelekanitha nonyama yiiyamakuti yilwe, nuunene ombwanawa uuna ya ningwa oondhingu. Ishewe, uuna tandi yi li ohayi dhimbulukitha ndje ookuku molwashoka okwa li haye yi li. Ondi na uumbanda ngele oyi na omukithi gwombulwa, ashike einekelo otwe li gandja momake gaKalunga opo kaayi kale yi na. Itatu vulu okwe etha onyama ndjika yi hepe, unene tuu okutala kutya oonyati ndhoka odha si komeya, ndele hakomukithi,” osho a popi ngaaka. Aakalimo yamwe ngaashi Chrispin Simasiku okwa popi kutya onyama ndjoka ye iteyi li, ndele hamolwuumbanda womukithi gwombulwa, ashike omolwaashoka oonyati ndhoka odha si komeya.
“Ngame eitaalo lyandje oondyoka kutya iinamwenyo oyi na okutselwa opo yi vule okuliwa komuntu, onkene kandi na nande ohokwe yokulya oonyati ndhoka dha si komeya. Ashike nando ongaaka ondi uvite lela nawa okutala mboka kaaye na kutya odha si pamukalo guni, taya tyapula okulya onyama yawo. Yamwe mboka ya mono oonyati dhi igwana po itaya pumbwa we nokuli nokukala noshimpwiyu shokulanda onyama muule womwedhi,” osho a popi ngaaka. Moonkundanathana noThe Namibian, omupopiliko gUuministili wUunamapya, Omeya nEtendululo lyEvi, Jona Musheko, okwa popi kutya uuministili ihawu popile nande omuntu a lye onyama ndjoka inaayi dhipagwa kohi yetonatelo lyuutomeno.
Okwa popi kutya omukithi gwombulwa ohagu vulu okukala mevi uule woomvula dha konda pe100 uuna gwa monika pehala lyontumba.
“Ihatu popile nande omuntu a lye onyama ndjoka inaayi mona etonatelo okuza kaanambelewa yuundjolowele wiinamwenyo. Mboka taya li onyama ndjoka yoonyati otaye shi ningi kuyoyene,” osho a popi ngaaka.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!