Ovanailonga vatatu vopaunamiti Ovanamibia ova kufila ko presidente Netumbo Nandi-Ndaitwah kombinga yondjokonona yakilikita yaminista mupe oo opo a ulikwa woundjolowele nomayakulo opanghalafano Esperance Luvindao.
Eshi osha kwatela mo omapopyo omaliumbato ai oo a eta enyenyeto lopambelewa.
Enyenyeto kombinga yomaliumbato aminista vati okwa li la etwa keendokotola domOvenduka ovo va shangela presidente oshivike sha dja ko.
Eedjo di li popepi noshikumungu oda ti omukanda otau pula opo omaliumbato aminista a konakonwe owa ningwa petameko leuliko laye.
Nandi-Ndaitwah okwa ulika Luvindao (31) a ninge minista woundjolowele nomayakulo opanghalafano Olomakaya loshivike shinya sha dile ko.
Eedjo oda ti omuhona waLuvinda mukulu okwa yandja enyanyeto lopambelewa kombinga yondjokonona yomaliumbato opailonga taa nyikwaanyikwa oyo inai ningwa nandenande.
Eyopombada laLuvindao lomeendelelo mepangelo lokukwatela komesho oministtili youndjolowele oyo ya pewa oshimaliwa shi fike peebiliyona N$12.3 okwa li la eta eemhata moshiwana okudja Olomakaya linya la dile ko.
Okwa lopotwa vati kutya okwa li e na ondunge yoku ke lihonga koHarvard.
Vamwe ovafeekela kutya otashi dulika aha dule vali okutwilila ondjodi yaye yokuya kofikola.
The Namibian okwa lopota Omaandaxa kutya Nandi-Ndaitwah okwa li vati ta talulula euliko laLuvindao.
“Oha longo noumbangi. Okwa pula ongudu yaye opo i ongele oumbangi,” Odjo osho ya ti ngaho, tai weda po vali kutya presidente otashi dulika ashike a ningulule euliko ‘konima oumbangi wa koleka oshinima eshi”.
Luvindao okwa kala moshipyu osho ovanhu vamwe tava ti okuliulika nokuliyambula po yeemwene komalungula.
“Eshi osha kwatela mo okuyandja omayakulo oshali pamalungula kovanaudu ve dulife po44 000 moNamibia, Zimbabwe, South Africa, Nigeria naRwanda okudja momudo 2019.
Momudo 2022, Luvindao okwa li a pewa epapa lefimano kuQueen Elizabeth II eshi a yandja omayakulo oshali opamalungula.
Omunyekadi mukulu Monica Geingos okwa li e likaleka kokule nomapopyo kutya okwa xwaxwameka euliko laLuvindao.
Geingos okwaanya kutya ina kwatelwa mo, ta ti kutya okwa uda ashike laLuvindao eshi kwa li la shiivifwa pashiwana.
“Inandi popya nande onomuleli wonhumba kombinga yeuliko lomunhu, ile nda yandja omayele keuliko lasha lopauministili.
“Omadilaadilo kutya ohandi xwaxwameke omauliko shin a sha nouwa wange mwene otaa nyemateke neenghono, okwa nyika oshiponga noita popile osho ndi lile po,” Osho a ti ngaho.
Geingos okwa weda po vali kutya: “Euliko leeminista ohali ningwa kupresidente nonda kumwa kutya opu na onghendabala yokuyandja oushima kushe vamwe ovo tuhe li momilandu omu.”
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
