Oosikola dhomOshana dha londodhwa kaadhi landithe oofoloma dhomataambo

Oosikola dhomOshana dha londodhwa kaadhi landithe oofoloma dhomataambo

Omukuluntuwiliki gwelongo moshitopolwa shaShana, Hileni Amukana, okwa gandja elondodho koosikola dhomOshana opo kaadhi landithe oofoloma dhomataambo gaanona moosikola.

Ndika olyo ethimbo oosikola odhindji moshilongo dhi ipyakidhila nomaindilo gomataambo gaanona gomumvo twa taalela.

Amukana, okupitila momukanda gwiikundaneki, mEtitano okwa popi kutya okwa ndhindhilikwa oosikola dhimwe tadhi pula ofuto nenge tadhi landitha oofoloma dhomaindilo gomataambo gaanona moosikola dhepangelo.

“Omaindilo gomataambo inaga longithwa okwiimonena iiyemo yoosikola, ishewe okulanditha nenge okupula ofuto oshinima shoka shi li ompinge nokatendo 53 [kOveta yElongo],” osho a popi ngaaka.

Amukana okwa popi kutya okupula ofuto yoofoloma dhomaindilo, oshinima shoka sha talika ko kaashi li nawa notashi ulike kutya oosikola ndhoka tadhi shi ningi kadhi na esimaneko lyomilandu dhuuministili.

“Oosikola ndhoka tadhi nyengwa okugandja ookopi kaavali ayehe mboka ya pumbwa oofoloma, otadhi indilwa dhi konge ekwatho koombelewa dhiikandjosikola nenge kombelewa yelongo moshitopolwa opo ku ningwe oofoloma ndhoka,” osho a popi ngaaka.

Okwa gwedha po kutya okuya kosikola kwaanona okuli oveta tayi dhengele moshilongo kukehe okanona okuza petameko lyomumvo uuna okanona ka gwanitha omimvo heyali.

“Okupula ofuto yomaindilo gomataambo otashi tongola aanona yaavali mboka itaaya vulu ofuto ndjoka,” osho a popi ngaaka.

Okwa gwedha po kutya uuministili welongo owa shilipaleka kutya oosikola adhihe dhepangelo odha pewa oofoloma dhomaindilo gomataambo gaanona.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News