Opolisi yaZambezi tayi kongo oonakudhipaga ondjambameya moKalimbeza

Opolisi yoshitopolwa shaZambezi otayi kongo ekwatho moshigwana molukongo lwaafekelwa yuukongo waali paveta wondjambameya ndjoka yi itsuwika ya sa, notaku hokololwa kutya oyi na ongushu yooN$100 000.

Moonkundathana noThe Namibian ohela, omupopiliko gwopolisi moZambezi, inspekta Kisco Sitali okwa popi kutya otaya ningi omakonakono goshipotha shuukongo waali paveta woshinamwenyo sha gamenwa, moshiningwanima shondjambameya ndjoka ya adhika ya kaama momulonga gwaZambezi metonatelwahala lyedhina Sikunga, popepi nohotela yedhina Mubala Lodge.

Ondjambameya ndjoka oyi itsuwika ongula yEtitano lya zi ko lwopotundi 10h00.

“Aafekelwa oya longitha ondjembo kaayishiwike okudhipaga ondjambameya ndjoka. Sigo oompaka aafekelwa kayeshiwike, nomakonakono otaga tsikile,” osho a popi ngaaka.

Omupopiliko gUuministili wOmidhingoloko, Omakuti nOmatalelopo Romeo Muyunda, okwa lombwele onzonkundaneki ndjika kutya onkalo ndjoka yoondjambameya tadhi dhipagwa moshitopolwa shaZambezi otayi indjipala nuuministili owu na lela eikwato pomutima.

Muyunda okwa popi kutya ongomulandu gwekeelelo lyuukongo mboka waali paveta, uuministili melongelokumwe nopolisi otaya ka nkondopeka epatololo lyomudhingoloko popepi nomulonga gwaZambezi.

“Oonzo ndhika odho tu na okukwatela po atuheni ndele hakukala twiihole tseyene. Iiyamakuti mbyoka tu na moshilongo oyo hayi nana aapashiyoni naashoka ohashi kwathele mokweeta po oompito dhiilonga, osho wo mokuhumitha komeho eliko lyoshilongo shetu,” osho a popi ngaaka.

Aakwashigwana mboka ye na uuyelele kombinga yaafekelwa mboka ya dhipaga ondjambameya ndjoka otaya indilwa ya tseyithile opolisi yi li popepi nenge aanambelewa yetonatelo lyomidhingoloko.MuFabuluali nomuMaalitsa numvo, omwa ndhindhilikwa oondjambameya mbali ndhoka kwa li dha dhipagwa pamukalo gwa faathana kaafekelwa kaayeshiwike momudhingoloko gwaMuyako.

“Otatu kondema lela uukongo mboka molwashoka otawu tidha aatelelipo mboka ye na ohokwe yokutalela po momudhingoloko ishewe otashi yono wo onkalo yopaushitwe,” osho Muyunda a popi ngaaka pethimbo ndyoka. Oondjambameya odha simana molwashoka ohadhi lemene pevi iihwa mbyoka yi li popepi nomulonga, nonkalo ndjoka ohayi kwathele aantu opo ya vule okuthika pomulonga osho wo pomahala galwe ngoka ge li popepi nomulonga.

“Oondjambameya ohadhi kwathele aakalimo, nopethimbo lyo opala uuna omukunda gwa ningi eindilo, ohaya vulu okupewa [ondjambameya] onyama, uuna sha ningwa okupitila pamilandu dhomondjila [ndhoka dha tulwa po],” osho omupopiliko a popi ngaaka.