‘Opoosa yaShikongonayi pewe aagundjuka’

Omuleli gwongundu yo-Popular Democratic Movement, McHenry Venaani okwa popi kutya aapolisi aashona oyo naya pewe ompito yuuleli wetanga lyopolisi moshilongo.

Ndhoka okwe dhi popi sha landula sho omupresitente Nangolo Mbumba a gwedhele ko Joseph Shikongo oomvula ndatu opo a kale kakukutu gwetanga lyopolisi, konima owala sho a gwanitha omimvo 60.

Ekaleko miilonga lyaShikongo otali tameke momasiku 1 Kotoba sigo omomasiku 30 Septemba 2027.

Venaani, moonkundathana noDesert Radio oshiwike shika, okwa popi kutya mboka ya adha oomvula dhoshipundi shevululuko naya thigile aagundjuka iipundi.

“Shikongo omupolisi lela omwaanawa, okuume kandje lela, ashike otwa pumwa okugandja ompito kaagundjuka. Ondi na uupyakadhi natse, noshilongo shetu ashihe osho wo kehe gumwe e li mo.

Omolwashike wu na okugwedhela omuntu a kale miilonga omanga tu na aagundjuka oyendji moshilongo kaaye na iilonga? Otu na mo aapolisi aagundjuka muka mboka taya vulu okumona iilonga mbyoka,” osho a popi ngaaka.

Ashike nando ongaaka, Venaani okwa popi kutya omolwomahogololo ngoka twa taalelwa okwa li ngaa shili tashi pumbiwa Shikongo a gwedhelwe ko owala omvula yimwe.

“Ando onda tsu kumwe naMbumba okukala e mu gwedhela ko omvula yimwe. Okutala kutya omvula ndjika oyomahogololo, iilonga otayi ka kala oyindji.

Pamwe omuleli omupe ota ka nyengwa okukondola onkalo, ashike oshinima shokugwedhela ko aantu ya adha oomvula dhoshipundi shevululuko kashi li nande nawa,” osho Venaani a popi ngaaka. Omunandjungu Michael Amushelelo naye okwa pula kutya omolwashike Shikongo e na okugwedhelwa ko oomvula ndatu, omanga pu na okwiiyuthwa kOveta yOmayakulo gOshigwana.

“Mbumba okukala a gandjulula oshipundi kuShikongo nuule woomvula ndatu oshayela lela kutya osha ya pambambo Oveta yOmayakulo gOshigwana, molwashoka Shikongo keshi omunapolitika.

Ndele omupolisi gowala ngoka i iyadha a ninga ondjayi yetanga lyopolisi,”osho Amushelelo a popi ngaaka.

Paveta ndjoka, ngele omuntu okwa pewa a tsikile nopoosa ndjoka e na tashi ningwa muuwanawa woshigwana konima yomimvo 60, nena oshi na okuza papitikilo lye shi ikwatelela kepopilo lyOkomisi yOmayakulo gOshigwana osho wo kepitikilo okuza kOkabinete sigo okesiku lya hugunina lyomwedhi, moka ta ka gwanitha omimvo 67.

Amushelelo okwa popi kutya okuwete Shikongo a gwedhelwa ko omimvo kuuleli wopolisi nelalakano opo epangelo lyi li koshipundi li longithe uukengeleledhi pomahogololo twa taalela.

“Oshayela, otashi ulike kutya aantu mbaka otaya kambadhala uukengeleledhi momahogololo okushilipaleka kutya oye na mo aantu yawo mboka taya vulu okukondolola opolisi netanga lyegameno, opo ya vule okuninga shoka ya hala uuna oshizemo sha zi mo kaashi li muuwanawa wawo,” osho Amushelelo a popi ngaaka.

ETUMBA OKULONGELA
OSHIGWANA

Moonkundatha noDesert Radio oshiwike shika, Shikongo okwa popi kutya nonande okwa li a pyakudhukwa okuya moshipundi shevululuko, okupewa ompito yokutsikila nuuleli wopolisi moshilongo okwe shi taamba ko noku shi uvitile etumba.

“Ethimbo limwe owa hala wu ka vululukwe, ashike ngele owa tala kwaashoka oshigwana sha hala, kuna nkene owu na owala okukala po.

Onkene, oshi li etumba enene okukala ndi inekelelwa iilonga uule woomvula ndatu dha gwedhwa po okulela opolisi yaNamibia,” osho a popi ngaaka. Shikongo okwa kunkilile Aanamibia yi ikaleke kokule nokutuka aapolisi peha lyokukala taya longele kumwe nayo.

“Onda tegamena aantu ye tu yambidhidhe kutya nee oyopoonkatu dha yooloka dhopapolitika, oongundu dhopapolitika, oongundu dhopankalathano, dhuuthemba womuntu osho wo kehe gumwe opo opolisi yi vule okwa adha omalalakano gegameno lyaantu yetu,” osho Shikongo a popi ngaaka.