Oshike nee ngee NWR a landifwa po?

OVANAPOLITIKA OVAFIMANEKWA,

Eebiliyona mbali dovafuti voishoshela otamu di longifa shike?

Longifeni eebiliyona odo mbali mokukaleka po omahangano epangelo oo a kala nokudopa eedula dihapu.

Longifeni oshimaliwa osho mu wanife po omaudeneko eni oo mwa ninga poikonga yomahoololo.
I tuleni mombaanga ndee tai kala omo.

Onde lineekela keshe omunapolitika oo a mona omawi tee va twala kopaliamente neudo okwa hoolola po onomola onhivali nota ka longifa eebiliyona mbali a kufe po ondjala, okuhena oilonga, omumbwe yomaumbo, nehongo laaveshe…

Fyee koThe Namibian (notwa itavela kutya Ovanamibia vahapu ove li pamwe nafye) ongudu yovatoti veeveta otai ka tameka okukandula po omaupyakdi omoshilongo ndee tai xulifa po okulongifa oimaliwa yovafuti voishoshela yepangelo meeproyeka da nafangwa.

Eebiliyona mbali odo epangelo la faneka okulongifa momutengenekwafaneko wokomudo woneudo opo li kulile mo omahangano epangelo e li 11.

Onghenda! Omapopyo omafiku aa okudja kovatotiveta vamwe vape, noinima yakula oyo tai lalakanenwa kongudu tai pangele, itai etifa omukumo.

Oo he liufana “omweeti welunduluko” omuleli wongudu yoAffirmative Repositioning Job Amupanda oye waxuuninwa e tu kanghameka tu lipule ngee Namibia ota dulu ngaa okuwapaleka omadjuu eedula omilongo da pita.

Amupanda paife okwa hala okukelela okuwapaleka kwehangano leenhele domatalelepo depangelo odo di li meenhele daamenwa dehangano ledina Namibia Wildlife Resorts (NWR).

Ota popi kutya NWR otai kufa eenghatu odo tadi ka eta ovanailonga vahapu va ka kanife oilonga. “Oushili oyou kutya ova tameka omilandu dokulandifa ile dokuyandja po eeloodja edi di li 14 depangelo,” Amupanda osho a ti ngaho.


Omukulunhuwiliki woNWR Matthias Ngwangwama okwa yandja oushima kuAmupanda eshi aa ndjakaneka oipupulu nokwa ti kapwa li nande ondunge yokulandifa po ile yokuyandja po eeloodja edi.


Ngee ove lipaka mo shili mokwaamena NWR, okwiikala ku li ngaho okudjuu nokwiitavela.
NWR okwa pula nale omuyandjimayele a ninge “omavalulo a pumbiwa … opo a talele kutya eenhele detu dimwe edi otadi longo ngahelipi”.

Ehangano ola hala omawedelepo “kombinga yomahoololo ahapu, mwa kwatelwa okuya kumwe kwepangelo noikondo yopaumwene, okuyandja po eenhele edi keekondalaka ile keshe ngaa shimwe”.


Ovaleli vepangelo inava ngwangwana ndee tava kendabala va mweneke ovanhu ovo tava yandje ouyelele moshiwana. NWR nomahangano ahapu epangelo okwa pumbwa eenghatu delunduluko dolela ponhele yokuheka ovanapolitika.


Amupanda novaleli vakwao vamwe ovanandjungu ova pumbwa okupandula kutya eliko loshiwana itali pu po. Oimaliwa yovafuti voishoshela yepangelo nai longifwe moinima i na oshilonga.

Okwaamena omahangano oo taa wilikwa papuko okuhepeka ashike oimaliwa mokuhadeka eendjato dovakulunhuwiliki ovo tava wilike omahangano epangelo.

Epangelo ola longifa oshimaliwa shi dulife peebiliyona mbali momahangano oo kwa li a pubwa okuninga oiyemo ngeno okwa li taa wilikwa mondjila: NWR, Zambezi Waterfront, TransNamib, Road Contractor Company, Namibia Industrial Agency, Namibia Institute of Pathology, Namibia Airports Company, Meatco, Luderitz Waterfront, Epangelo Mining Company noAgro-Marketing Trade Agency.

Weda ko nee omahangano akwao oo inaa tumbulwa apa noimaliwa yovafuti voishoshela oyo ya longifwa keshe odula puhe na okukalelwa po nokapu na sha tashi etwa po.


NWR, ngaashi naana omahangano amwe epangelo okwa mona eemiliyona omafele di mu kulile mo ashike ovakufimbinga noshiwana shaNamibia kashi na eshi sha mona po.


Amupanda novanapolitika vakwao otava kala ashike nokutilila oimaliwa yavo meengeshefa odo ihadi di oiyemo ile kave na ko ashike nasha shaashi oimaliwa yovafuti voishoshela yepangelo?


Oshikumungu apa kashi shi ngee NWR, Air Namibia ile omahangano akwao epangelo naakulilwe mo kukwatelwe po oilonga ishona oyo tai pula oimaliwa ihapu.

Otava longo ngaa nelalakano naasho tashi lalakanenwaa? Itashi eta po sha ashike nandenande okulongifa oshimaliwa shi dulife peebiliyona mbali moinima itai wilikwa nawa omanga ovanhu ve fike pomiliyona imwe oshinghwanyu hamano tava fi ondjala fiyo nokuli opondodo yokukondjela oikulya koyoongalele yopolitika noitufi dimbuluko ile tava fi kondjala.