Oshimaliwa osho handi futwa shi fike poN$773 000 ohandi shi yandje po – Kanyama

OMUNANGESHEFA Shapwa Kanyama okwa ti ota yandje po oshimaliwa osho a pewa moshibofa shekakeko loukwatya osho kwa li a tulila mo omupangi e li moshipundi shetulumuko kovanhu ovo hava ningilwa ominyonena dopamalungula.

Kanyama, oo e li omukwati weetendela doundjolowele, okwa findana oshibofa momhangu yopombada osho kwa li a tulila mo omupangi e li moshipundi shetulumuko Mathilde Kathikwa (61) Omaandaxa oshivike eshi.

Omupangi eli moshipundi shetulumuko okwa li a pulwa opo a fute Kanyama nomukulukadi waye Beata Kanyama, oshimaliwa shi fike poN$130 000 nosho yo oshimaliwa shavo osho va longifa movakalelipo vopaveta moshikumungu omu.

Ovakalelipo vopaveta vovalihomboli ava ove va pula oshimaliwa shi fike poN$643 000 shaoamyakulo avo moshikumungu eshi shekakeko ledina osho osho kwa li sha tulilwa mo Kadhikwa.

Ovalihomboli ava tete okwa li va pula Kadhikwa a fute oshimaliwa shi fike poN$400 000 muJuli momudo 2022 shi na sha noshikumungu eshi shokukakeka omadina avo.

Omunangeshefa, e shiivikile nawa okupewa otendela ya kilikita yeengumi, okwa ti kutya yee oimaliwa inei hala.

Eshi kwa li ta popi noThe Namibian, Etitatu, Kanyama okwa ti oshimaliwa otashi ka longifwa okuvatela oonakuningwa oihakanwa yomahepeko opamalungula opo va dule okukatukila ovaponokeli vavo eenghatu dopaveta.

“Ohandika yandja po oimaliwa ei kukeshe umwe ile kehangano lopaveta olo hali vatele ovanhu ovo tava ningilwa omahepeko opamalungula.

ovo ve na omadina a kakekwa puhe na etomeno lasha, medina ashike lehandu lomunhu wonumba.

Shixwepo ndi i yandje po kovanahu ovo opo yoo navao va dule okulandula pmilandu dopaveta ndee tava longifa oshimaliwa va ye komhangu,” Osho a ti ngaho.

Kanyama okwa weda po:”Elalakano lange kali shi lokumona oshimaliwa okudja kuye.

Elalakano loshinima eshi okukwashilipaleka kutya otwa fimanekafana. Ito dulu ashike okufikama ndee to tameke okupopila omunhu oinima ihe shi yoshili.

Sho osho handi yandjele po oimaliwa ei kukeshe omunhu a ningilwa oshinima shi li ngaha ngaashi ame opo a mone oshimaliwa.

Omutenya wEtitatu, Kanyama okwa li a tya ina mona natango ehangano olo ta ka pa oimaliwa ei. Tango okwa ti vali kakwa li noho e shi kutya Kadhikwa omukulupe.

OIMALIWA

Okambapila komafutilo kanyolwa momafiku 31 Juli odula ei, oko ka monika koThe Namibian, oka ulika kutya ovalaihomboli okwa li va pulwa oshimaliwa shi fike poN$3 750 sheenghundafana ashike dominute o90 nahahende wavo momafiku 12 Juli.

Okwa li vali va pulwa oshimaliwa shi fike poN$25 000 shefiku momafiku 15 Juli. Okwa li va pulwa oshimaliwa shi fike poN$75 000 shahahende wavo eshi a li e ya koihokolola yeevili omulongo momafiku 16 Juli neudo, nosho yo shikwao shokuninga eekopi shi fike poN$ 1 100
ovalihomboli ava okwa li vali va pulwa oshimaliwa shi fike poN$222 290 shomayakulo ahahende Lotta Ambuda-Nashilundo nosho yo oshimaliwa shi fike poN$300 150 shoilonga oyop ya longwa komushiiviveta akula Raymond Heathcote.

Ovalihombili ava ova futifa Kadhikwa konima kwa li a popya mokakilipa komalungula muMei womudo 2022 kombinga yohango yavo yongushu.

Nande kapu na edina kwa li la tumbulwa mo mokakilipa, omhupanguli womhangu yopombada Beatrix de Jager okwa mona kutya omapopyo aKadhikwa okwa li taa popi Shapwa Kanyma nokwa li a nyika okukakeka edina laye.

Ohauto yoToyota Fortuner yaKadhikwa okwa li tai ka landifwa po momafiku 21 Novemba moTsumeb.

Eshi oshe ya konima yetokolo lotete omo De Jager a pula Kadhikwa opo a fute oimaliwa oyo ya hepekwa movakalelipo vopaveta vaKanyama, osho sha ya fiyo okomaliko.

EMANGULUKO LOKUPOPYA

Eemhangu daNamibia moule weedula da pita oda kala nokwaamena ovanenenhu ovo va ya keemhangu shi na sha nomapopyo a ningwa komalungula.

Momudo 2021, omukulukadi waKanyama okwa li a futifa omupopiliko wongudu yoIndependence Patriots for Change (IPC) Imms Nashinge oshimaliwa shi fike poN$400 000 moshibofa shokukakeka edina.

Nashinge okwa li a itavela okufuta oshimaliwa shi fike poN$60 000 “molwokukakeka edina laBeata nongushu yaye”.

Momudo 2022, omunyekadi woshilongo Monica Geingos okwa li a findana oshibofa osho kwa li a tulila mo omuhongifikola wokOhangwena Abed Hishoono. Okwa li a findana po oshibofa ashike okwa ka dimina po Hishoono konima.

MuAuguste odula ei, omupedu minista woimaliwa Maureen Hinda okwa li a findana po oshibofa shekakeko loukwatya waye osho kwa li a patululila omuleli wongudu yoAffirmative Repostioning Job Amupanda.

Efimbo olo omhangu yopombada natango okwa li ya pula Amupanda a fute oimaliwa oyo ya longifwa kuHinda paveta.