Oshipangelo sha Muthiya osha tameka okulonga paklinika pethimbo ndika

OSHIPANGELO oshipe sha Muthiya shoka sha tungilwa Namibia ku China omagano, nokwa tilwe otashi tameke okulonga Omaandaha goshiwike shika, otashi longo ashike pamukalo gwopaklinika, molwashoka kashili pomuthika gwiipangelo ya Namibia.

The Namibian okwa li natango a talele po oshipangelo shika mEtiyali lyoshiwike shika nokwa adha po ashike aapangi taya yakula aavu pamukalo gwopauklinika.Yamwe mboka ya popiwa nayo kOshifo shika, oya ti kutya oondohotola inaya thika natango, onkee aavu mboka taya talele po oshipangelo shoka otaya pangwa ashike paklinika. Momuthiya omwa kala nale oklinika, ndjoka ya kala tayi yakula aavu omathimbo agehe ngoka ga zi ko. Oklinika ndjika oya patwa nee Omaandaha ngaka ga zi ko naayehe mboka ya kala ya pumbwa epango , oya lombwelwa ya ye koshipangelo oshipe oko ya ka mone eyakulo. Yamwe otaya ti kutya oshipangelo shoka sha Muthiya osha kala ethimbo ele itashi longithwa nonande sha gandjwa kepangelo pehulilo lyomumvo gwa yi, kwaamboka ya li taye shi tungu yokampani yAachina.Gavena,Penda yaNdakolo, okwa lombwelele The Namibian kutya okwa kutwa oondohotola dhi li ne (4) ndhoka tadhi ka panga moshipangelo oshipe sha Muthiya. Ta ti wo kutya omwa kutwa aapangipangi ye li 145 naamboka ye li pokuninga aapangipangi naaniilonga ye li pethele lwaampoka noshowo aaopaleki ye vulithe pethele nomilongondatu (130). Oyendji yomaaniilonga mbaka, ngashi aaopaleki, oya kutwa nale, ashike nee kombinga yaapangi, noondohotola, otaku tiwa kutya opwa fa pu na ombunda oku ya mona yiihwapo, ano ye thike mpoka. Molwashoka oshipangelo sha kala ethimbo ele inashi longithwa, konima sho sha pu kutungwa, iinima yimwe oyali ya teka mo nokuyonuuka.Oonakufekelwa oya kwatelwe, ashike gumwe otaku tiwa kutya okwe kiimangelekela mondholongo yopolisi ya Katope mOndonga. Osha fa nee shi li ngeyi kutya, iinima oyindji ya li ya yonuuka mo, pokati mpoka, oyi li tayi opalekwa nokutulwa kumwe pethimbo ndika kokampani yokutunga yedhina, China Jiangsu International Namibia, ndjoka ya tunga oshipangelo shika.Aakwashigwana yamwe mOmuthiya pokati mpoka oyo ye yile kOshifo shika, taya nyenyeta nokupula kutya omolwashike ano oshipangelo shika itashi lala. Ominista Yuundjolowele, Richard Kamwi okwa lombwele o The Namibian kutya oshipangelo shoka kashi li pomuthika gwiipangelo gwa Namibia. Kamwi okwa ti nando aaChina oye na omithika dhawo dhiipangelo, oshikondo she oshi na okusoshimpwiyu kutya omuthika gwiipangelo gwa Namibia ogwa gwanithwapo.Okwa ti iinima yimwe mbyoka inaa yi gwanapo moshipangelo shoka oya kwatelamo ehala lyoku telekela iikulya.Okwa tsikile a ti pethimbo ndika oshipangelo shoka oshina ashike esiga limwe lyokutelekela , naashika oshimwe shiiyimbi okweegulula oshipangelo shika.Okwa ti okupopya oshili, oshipangelo shoka ina shi gwanithapo iipumbiwa ayihe opo sheegululilwe oshigwana ongo onaasalesa yoku panga aantu.Kamwi okwa ti pethimbo ndika oshipangelo shika otashi kala ashike tashi longo ongo oklinika, no ita shi taambele aavu moombete ndhoka dhili omilongo hamano .