Ehangano olo li li mwene woshipangelo shopaumwene shaNgwediva shedina Medipark ola lombwelwa opo li fute omukulunhuwiliki washo oo a kufwa moilonga, omundokotola Tshali Iithete, oshimaliwa shi fike peemiliyona N$3.3.
Ongwediva Medipark (Pty) Ltd natango oya lombwelwa opo oshipangelo shi shune Iithete moilonga ongomukulunhuwiliki okudja muDesemba, omupotokononi woinima ya pamba oilonga Moses Mazambo osho a yandja elombwelo li li ngaho Etitano.
Okwa pula yoo vali opo ehangano li fute Iithete ondjabi yeemwedi 20 ongomukulunhuwiliki, oyo a kanifa pefimbo kwa li a tewa moilonga, i fike peemiliyona N$3.36.
Mazambo okwa pula oshinima eshi konima a mona kutya Iithete okwa li a tewa moilonga shihe li pauyuki ongomukulunhuwiliki woshipangelo shopaumwe shaNgwediva shedina Medipark muSeptemba 2022.
Iithete okwa li a kufwa moilonga konima yomutumba omo kwa li a monika ondjo moshibofa shokuhena oshili, ekengelelo, okuninga oinima molwomauwa aye mwene naikwao imwe.
Mazambo okwa popya kutya Iithete okwa li umwe vomwaavo va tota Ongwediva Medipark, pamwe nomunangeshefa David Imbili, nokwa kala omukulunhuwiliki wehangano okudja ngaa momudo 2014.
Pefimbo lomutumba wokupotokonona oshiniama eshi kuMazambo, omunashipundi wewilikongudu loNgwediva Medipark, Riel Toit, okwa yandja oumbangi kutya Iithete okwa ya meudafano lopangeleshefa nehangano ledina RentWorks Namibia ponhele yOngwediva Medipark, ina pewa epitikilo kewilikongudu lehangano.
Paudafano olo, la shinwa muMarsa 2018, oshipangelo shaNgwediva Medipark osha landifa po oilongifo imwe yokoshikondo shovanaudu ovo vehe li nawa nandenande nosho yo koshikondo shounona kehangano RentWorks.
Du Toit natango okwa yandja oumbangi kutya Iithete okwa dopa okweeta pouyelele kutya okwa li e na oipambuliko mongeshefa, yoNorthern Surgical CC, oyo hai lande oilongifo yehangano.
Ombangi imwe, Matthias Braune, okwa yandja oumbangi kutya omakonakono oshimaliwa shoshipangelo eshi, okwa ulika kutya “opu na okulongifa oshimaliwa papuko neenghono” mwa kwatelwa oshimaliwa shi fike peemiliyona N$25 odo kwa li inadi pitikwa kewilikongudu lehangano nehangano okwa li tali kanifa oshimaliwa shi fike peemiliyona N$11 keshe omwedi nokwa li li li pokupata omanga Iithete ina kufwa moilonga momudo 2021.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
