Oshiponga oshinene sha ningilwa popepi nondjila yokapale koondhila

OSHIPONGA oshinene sheidhengomumwe lyiihauto osha ningilwa pokapale koondhila ka Ndangwa komatango gOsoondaha ya zi ko moka mwa sile aantu yaali noyendji yeehamekwa unene nokashona, Chief Inspecta, Moses Kashala, ngoka a keelela pehala lya Komanda gwOpolisi mOshana, Komufala Ndahangwapo Kashihakumwa, ota ti okaloli kuudha omaemele goopainda, ka adhika taka ziilile kOndangwa ka thinda nondjila ya Ngwediva nOshakati okiidhenge mumwe nohauto ya Angola mwa adhika aantu yane komuhingi noshowo noBMW moka mwa adhika aantu yatano kumwe nomuhingi gwawo.

Sho okaloli haka ki idhenge moohauto ndhoka ngawo, oka kandoma nokugalangata. Omuhingi okwa umbwa mo kumwe niitenda yimwe mbyoka ya mbonyauka nokwa hulitha ngawo. Ohauto ndjoka ya Angola omwa li ofamili, omusamane nomukulukadhi gwe noshowo omona gumwe nomuhingi gwawo. Otaku tiwa kutya oya li tayi fala omusamane koshipangelo koVenduka okuza kwaashoka sha Shakati, a ka mone omakonaakono giihwapo ngeno. Sho nee yi ipumu mumwe nokaloli ngawo, omukulukadhi ngoka a adhika ta fala omusamane gwe koshipangelo koVenduka, okwa hulitha , ye omusamane nomwana gwomumati nomuhingi taya hupu. Omusamane nomwana gwawo nguka oya ehama unene kwali noya falwa koshipangelo shopaumwene sha Ngwediva. Omuhingi ina ehama kwali.Chief Inspecta Kashala ota ti kutya mo BMW omwa li aagundjuka yatano, omumati gumwe naakadhona yane. Aakadhona oya mona ngaa aniwa uukulumuna nomuhingi gwawo okwa zi mo kee na okakulumuna. Aakadhona oya li ya falwa koshipangelo sha Nandjokwe hoka taya mono epango.Chief Inspecta Kashala ta ti nakusa gwomokaloli oye Arnes de Waal gwokoShiwakopo nOtjiwarongo nokwa adhika ta longele kOndangwa mOkamapani yokupainda omatungo, unene pOlunkono mpoka. Yamwe haya longo naye otaya ti kutya komatango gOsoondaha ndjoka, okwa li te ya kondjitha aniwa ya londe mokaloli hoka ya ye naye kokuma. Oya kala nee taye mu pula kutya otaya yi peni, ashike ka li a hala oku ya lombwela kutya otaya yi peni. Aaniilonga mbaka ye li yane, ota ya hokololele The Namibian kutya sho ya mono kutya ote ya kondjitha noonkondo, oya fadhuka po. Okuza mpoka de Waal okwa yi nee nokukiidhenga miihauto yaantu mbyoka ngawo nokukandoma nokusa.Chief Inspecta Kashala ta ti omukiintu gwomuAngola ngoka a hulitha moshiponga shika oye, Maria Lurdez. Ya yambukile kOwambu moAngola moka.Pokati mpoka The Namibian okwa kundana wo eso lyombaadhilila lyomulongisikola moshitopolwa sha Hangwena, Likius Nafuka Hamukwaya gwoomvula 55 ngoka a mana oondjenda dhe mOlyomakaya ga zi ko moshiponga shohauto, sho ohauto ye ya zi ko kopate nokukiidhenga momuti. Chief Inspecta Kashala ota ti kutya opolisi onkee tayi kunkilile oshigwana shi hinge nawa, nokweetha po iikolitha uuna tashi yi konima yositelinga.