Oshoongalele shokukahoolola pelesidente wongudu yoSwapo otashi ka ningwa muFebuluali

Oshoongalele shoSwapo shokuhoolola pelesidente wongudu otashi ka ningwa momafiku 28 Febuluali momudo tau ya, ashike itaku ka ningwa nande omafiyafano oupedu pelesidente wongudu.

Omhito ei paife oi niwe komuhoololwa pelesidente Netumbo Nandi-Ndaitwah, oo kwa teelelika a ka kolekwe a ninge omupelesidente woSwapo koshoongalele oko.

Ovaleli vamwe vongudu, nande ongaho, ove udite kutya omhito youpedu pelesidente nai tulwe omunhu.

Hamushangandjai wongudu yoSwapo Sophia Shaningwa okwa shiivifa oshoongalele osho sha fanekwa koshoongalele shongudumutima osho sha li mOvenduka Olomakaya.

Etivali okwaanya okutya ko sha, ta ti iha popi noThe Namibian.

Ovo va li koshoongalele shongudumutima vati okwa li va lombwelwa kutya itaku ka kala nande omafiyafanepo.
Swapo okwa kala ehe na pelesidente okudja ngaa pefyo lapelesidente Hage Geingob muFebuluali.

Omupedu pelesidente woSwapo Netumbo Nandi-Ndaitwah okwa kala ta longo ongomupelesidente wongudu wopakafimbo okudja opo.

Omupedu hamushangandjai wongudu Uahekua Herunga Etivali okwa ti ongudumutima inai likunda nande eemhito odo tadi ka kondjelwa.

“Kapwa li nande eenghundafana doludi olo. Itashi likolele kutya ovanhu ova hala shike. Onguduwiliki otai ke likunda oshikumungu eshi,” Herunga osho a ti ngaho.

Oilyo ivali yongudumutima yoSwapo oyaanya omapopyo aHerunga, tai ti okwa li sha shiivifwa koshoongalele kutya kapu na nande omakondjifafano a pitikwa naNandi-Ndaitwah ota ka kufa po oupelesidente wongudu noupedu pelesidente.

Vamwe, nande ongaho, ova itavela kutya oshinima eshi otashi dulu okweeta oupyakadi melelo longudu.

“Eshi osha handukifa ovanhu, shaashi omakondjifafano otaa ningi unene ahapu. Oshi lengifa,” Odjo osho ya ti ngaho.

Ngoloneya woshitopolwahoololo shaHardap Salomon April naye okwa pula elalakano lokutwala oshoongalele shokuhoolola pelesidente wongudu kuFebuluali. Tete, Swapo okwa li a tya oshinima eshi otashi ningwa shaashi kapu na oshimaliwa, omanga ovaleli vongudu, ngaashi Jerry Ekandjo, okwa li tava pula kuningwe oshoongalele eshi.

“Hamushangandjai nomupedu pelesidente okwa li va mwena omanga Herunga kwa li ta popile etokolo, ta ti ongudu oi na oimaliwa,” Odjo osho ya ti ngaho.

“Ovanhu vamwe okwa li va hala Nandi-Ndaitwah a twilike noupedu pelesidente fiyo omomudo 2027. Kashi ko, ngee omupedu pelesidente okwa fi? Ongudu itai kala i na omupedu pelesidente napelesidente. Inatu pitika oshinima osho,” Odjo osho ya ti ngaho.

Oilyo imwe yoSwapo otai kondjifa hamushanga mukulu wevava lovanyasha loSwapo Elijah Ngurare opo a hoololwe a ninge omupedu pelesidente wongudu.

Ekandjo oo a kala nokukondjifa kuningwe oshoongalele shokuhoolola pelesidente wongudu moule weemwedi nhatu konima yefyo laGeingob, Etivali okwa lombwela oThe Namibian kutya kakwa li e na eshiivo kombinga yetokolo longudu lokuninga oshoongalele osho momafiku 28 Febuluali.

Omupopiliko woSwapo Hilma Nicanor muAguste okwa li a shiivifa kutya ongudu otai ka ninga oshoongalele shayo muApilili momudo tau ya.

MuSeptemba, Shaningwa okwa li a tya ongudu kai na oshimaliwa shokuninga oshoongalele eshi.

Oshinima eshi okwa li e shi popya momukanda oo kwa li wa yandjwa komhangu yopombada. Swapo okwa li a yandja omukanda komhangu tau popile etokolo lokuhaninga oshoongalele shokuhoolola pelesidente wongudu.

“Ongudu oya yandja omayovi omafele pefimbo loyoongalele yopaitopolwahoololo momudo 2023,” Shaningwa osho a ti ngaho.
Okwa ti oimaliwa imwe okwa li ya longifwa moilonga yetungo lombelewa yakula yoSwapo.

“Ongudu oya pumbwa oshimaliwa shoikonga yomahoololo nokuhoolola ovanhu ovo tava ka ya mopaliamente,” Osho a ti ngaho.

Eshi okwa li sha landula onghatu yopaveta oyo kwa li ya kufwa koilyo imwe yongudu Reinhold Shipwikineni, Peter Shituula, Joshua-Vaino Martins navakwao, ovo kwa li va pula Swapo a ninge oshoongalele shokuhoolola pelesidente wongudu.

MuMarsa, ongudumutima yoSwapo okwa li ya koleka Nandi-Nandaitwah a ninge okandidate koSwapo momahoololo oupelsidente inaku ningwa oshoongalele eshi. Oilyo imwe yongudu oya ti oshinima eshi okuteya ekotamhango loSwapo nokwa li ya pula kuningwe oshoongalele.